រាជធានីភ្នំពេញ ៖ ស្របពេលដែលការចចារប្រាក់ខែគោលកម្មករក្នុងវិស័យកាត់ដេរ ឆ្នាំ២០២៤ កំពុងដំណើរការ នាយករដ្ឋមន្ត្រីបានប្រកាសថា រដ្ឋាភិបាលនឹងខិតខំដំឡើងប្រាក់ខែជូនកម្មករកម្មការិនី ។ ភ្លើងខៀវពីនាយករដ្ឋមន្ត្រីបែបនេះ បានធ្វើឱ្យកម្មករកាត់ដេរមានសង្ឃឹម…
រាជធានីភ្នំពេញ ៖ ស្របពេលដែលការចចារប្រាក់ខែគោលកម្មករក្នុងវិស័យកាត់ដេរ ឆ្នាំ២០២៤ កំពុងដំណើរការ នាយករដ្ឋមន្ត្រីបានប្រកាសថា រដ្ឋាភិបាលនឹងខិតខំដំឡើងប្រាក់ខែជូនកម្មករកម្មការិនី ។ ភ្លើងខៀវពីនាយករដ្ឋមន្ត្រីបែបនេះ បានធ្វើឱ្យកម្មករកាត់ដេរមានសង្ឃឹម ដ្បិតអី បច្ចុប្បន្ននេះពួកគេត្អូញថា ការចំណាយប្រចាំថ្ងៃកាន់តែច្រើនដោយសារទំនិញលើទីផ្សារបានឡើងថ្លៃគ្រប់មុខ។
នៅក្នុងជំនួបជាមួយកម្មករ-កម្មការិនីចំនួន១៨ ០០០នាក់ នៅខណ្ឌពោធិ៍សែនជ័យ នាព្រឹកថ្ងៃទី២៩ ខែសីហា ឆ្នាំ២០២៣ ដំបូងគេក្នុងនាមជា នាយករដ្ឋមន្ត្រីកម្ពុជា ឯកឧត្តម ហ៊ុន ម៉ាណែត បានលើកឡើងថា ការបន្តដំឡើងប្រាក់ខែឈ្នួលអប្បបរមាដល់កម្មករនិយោជិត គឺជាគោលនយោបាយដែលរាជរដ្ឋាភិបាលបន្តអនុវត្ត ។ លោកបានបានថ្លែងថា រាជរដ្ឋាភិបាលបានខិតខំទាញអ្នកវិនិយោគ និងការចរចាដំឡើងប្រាក់បៀវត្ស ដើម្បីបានផលប្រយោជន៍ដល់ប្រជាពលរដ្ឋ ។
កាលពីថ្ងៃទី២៨ សីហា ក្រុមប្រឹក្សាជាតិប្រាក់ឈ្នួលអប្បបរមាបានបន្តបើកកិច្ចពិភាក្សារបស់ខ្លួនជាលើកទី២ ដើម្បីបន្តពិភាក្សាកំណត់ប្រាក់ឈ្នួលអប្បបរមាផ្នែកវាយនភណ្ឌកាត់ដេរ ផលិតស្បែកជើង និងផលិតផលិតផលធ្វើដំណើរ និងកាបូបសម្រាប់ឆ្នាំ២០២៤ ។
ទោះនៅមិនទាន់ដឹងពីលទ្ធផល តែក្រសួងការងារ និងបណ្តុះបណ្តាលវិជ្ជាជីវៈបានឱ្យដឹងថា ភាគីតំណាងកម្មករនិយោជិត និងភាគីតំណាងនិយោជកបានលើកហេតុផល និងបង្ហាញនូវគោលជំហរផ្ទៃក្នុងរបស់ខ្លួនទៅវិញទៅមកប្រកបដោយវិជ្ជាជីវៈ និងភាពចាស់ទុំ ។ នៅក្នុងកិច្ចប្រជុំនេះ ភាគីរាជរដ្ឋាភិបាលក៏បានសម្របសម្រួល និងផ្តល់នូវការពន្យល់បន្ថែមលើចំណុចនានាដែលភាគីទាំងពីរមានចម្ងល់ផងដែរ ។
ប្រភពពីអ្នកចូលរួមប្រជុំបានថ្លែងឱ្យដឹងថា ខាងរដ្ឋាភិបាល និងសហជីពបានស្នើឱ្យមានការដំឡើងប្រាក់ខែគោល ប៉ុន្តែខាងក្រុមថៅកែមិនគាំទ្រចំពោះការដំឡើងនោះទេ ដោយគិតថា ប្រាក់ខែកម្មករបច្ចុប្បន្ននេះ ស្ថិតក្នុងកម្រិតមួយខ្ពស់ទៅហើយ ។ ក្រោយពីការពិភាក្សា និងការសម្របសម្រួលនេះហើយ អង្គប្រជុំបានឯកភាពគ្នាកំណត់កិច្ចពិភាក្សាបន្តទៀតនៅថ្ងៃទី៤ ខែកញ្ញា ឆ្នាំ២០២៣ ខាងមុខ ។
កន្លងមកមានកម្មករ និងសហជីពមួយចំនួនបានទទួចឱ្យមានការដំឡើងប្រាក់គោលដល់២១៥ នៅឆ្នាំ២០២៤ខាងមុខ គឺដំឡើង១៥ដុល្លារពីឆ្នាំ២០២៣នេះ។ កញ្ញាមុំធ្វើការនៅរោងចក្រមួយម្តុំសង្កាត់ទួលសង្កែនិយាយថា ទំនិញនៅទីផ្សារបានឡើងថ្លៃគ្រប់មុខ ។ កញ្ញានិយាយថា ប៊ីចេង ស្ករ ទឹកត្រី របស់របរមួយចំនួនទៀតក្នុងផ្ទះបាយបានឡើងថ្លៃ ដែលជារួមពីមុនរបស់ទាំងអស់នេះកញ្ញាចំណាយត្រឹម២០ម៉ឺនរៀលក្នុងមួយខែ តែពេលនេះឡើងដល់ជាង៣០ម៉ឺនរៀល។
នៅក្នុង២០២៣នេះ ប្រាក់ឈ្នួលអប្បបរមារបស់កម្មករនិយោជិតក្នុងវិស័យវាយនភណ្ឌ កាត់ដេរសម្លៀកបំពាក់ ផលិតស្បែកជើង និងផលិតផលធ្វើដំណើរ និងកាបូប គឺមានចំនួន២០០ដុល្លារក្នុងមួយខែប្រសិនបើបូកនឹងប្រាក់អត្ថប្រយោជន៍ផ្សេងៗបន្ថែម កម្មករនិយោជិតម្នាក់អាចទទួលបានប្រាក់ឈ្នួលចន្លោះពី២១៧ ទៅ២២៨ដុល្លារក្នុងមួយខែ ។ នេះបើតាម ការបញ្ជាក់របស់ក្រសួងការងារ ៕
ចែករំលែកព័តមាននេះ