រាជធានីភ្នំពេញ ៖ ហាងលក់សម្លៀកបំពាក់កីឡាយីហោ «N1 Sport»ត្រូវបានអគ្គិភ័យឆាបឆេះផ្សែងហុយខ្មួលខ្មាញ់ បណ្តាលអោយសម្ភារៈមួយចំនួននៅក្នុងបន្ទប់ដេរ រួមមាន ៖ ម៉ាស៊ីនដេរចំនួន២០ គ្រឿង…
រាជធានីភ្នំពេញ ៖ ហាងលក់សម្លៀកបំពាក់កីឡាយីហោ «N1 Sport»ត្រូវបានអគ្គិភ័យឆាបឆេះផ្សែងហុយខ្មួលខ្មាញ់ បណ្តាលអោយសម្ភារៈមួយចំនួននៅក្នុងបន្ទប់ដេរ រួមមាន ៖ ម៉ាស៊ីនដេរចំនួន២០ គ្រឿង ម៉ាស៊ីនត្រជាក់២គ្រឿង និងក្រណាត់មួយចំនួនទៀតត្រូវបានបំផ្លាញទាំងស្រុងខណៈពេលដែលជាងផ្សារដែកធ្លាក់ផ្កាភ្លើងលើក្រណាត់ ។
ករណីខាងលើនេះបង្កអោយមានការភ្ញាក់ផ្អើល កាលពីវេលាម៉ោងប្រមាណម៉ោង១០និង៣០នាទីព្រឹក ថ្ងៃទី២៨ ខែសីហា ឆ្នាំ២០២៣នេះ នៅណុចហាងខាងលើ ស្ថិតនៅផ្ទះលេខ៤៧ តាមមហាវីថីភ្នំពេញហាណូយ(ផ្លូវ១០១៩)ខាងជើងស្ពានអាកាសផ្សារដីហុយ ក្នុងភូមិទឹកថ្លា សង្កាត់ទឹកថ្លា ខណ្ឌសែនសុខ រាជធានីភ្នំពេញ ។
តាមនគរបាលមូលដ្ឋានបានអោយដឹងថា ទីតាំងដែលត្រូវភ្លើងឆេះ បន្ទប់ដេរជាន់ទី១ របស់ហាងលក់សម្លៀកបំពាក់ខាងលើ ដែលមានម្ចាស់ឈ្មោះ ម៉េង សៅណេង ភេទប្រុស អាយុ៣៨ឆ្នាំ ។
តាមព័ត៌មានអោយដឹងថា នៅមុនពេលកើតហេតុ មានជាងបានទៅផ្សារដំបូលនៅជាន់ទី១ ដែលជាកន្លែងដេរខោអាវ ខណៈនោះផ្កាភ្លើង បានធ្លាក់ទៅលើកម្ទេចក្រណាត់ក្លាយជាអគ្គិភ័យឆាបឆេះផ្សែងហុយទ្រលោម និងបង្កអោយភ្ញាក់ផ្អើលដល់បុគ្គលិកនាំគ្នារត់ចេញប្រសាចនិងបានទាក់ទងហៅរថយន្តពន្លត់អគ្គិភ័យជាច្រើនគ្រឿងមកជួយ ។
តាមនគរបាលបង្ការពន្លត់អគ្គិភ័យ និងសង្គ្រោះបានអោយដឹងថា នៅក្នុងហេតុការណ៍នេះ រថយន្តពន្លត់អគ្គិភ័យចំនួន៦គ្រឿងទៅអន្តរាគមន៍បាញ់ពន្លត់អស់ទឹក២រថយន្ត ហើយភ្លើងបានរលត់ទៅវិញ ។ អគ្គិភ័យនេះ បណ្តាលមកពីជាងផ្សារដែក ។
តាមនគរបាលអោយដឹងទៀតថា អគ្គិភ័យនេះបណ្តាលអោយសម្ភារៈមួយចំនួន រួមមាន ៖ ម៉ាស៊ីនដេរចំនួន២០គ្រឿង ម៉ាស៊ីនត្រជាក់២គ្រឿង និងក្រណាត់មួយចំនួនរងការខូចខាតទាំងស្រុង ។ ទោះបីជាយ៉ាងណាភ្លើងពុំបានឆេះរាលដាល់ទៅកន្លែងតាំងលក់ខោអាវលក់ឡើយ ៕
ចែករំលែកព័តមាននេះ