ទីក្រុងវ៉ាស៊ីនតោន៖ លោកត្រាំថ្លែងនៅក្នុងបទសម្ភាសថ្មីៗនេះថាលោកមានកំហឹងយ៉ាងខ្លាំងនៅពេលលោកពូទីននិយាយរិះគន់រដ្ឋាភិបាលរបស់លោកហ្សេឡិនស្គី ហើយចាត់ទុកថារបបដឹកនាំអ៊ុយក្រែនសព្វថ្ងៃមិនគួរឱ្យជឿទុកចិត្តទាល់តែសោះ។ លោកត្រាំយល់ថាលោកពូទីននិយាយបែបនេះមិនមែនដើរនៅលើផ្លូវត្រឹមត្រូវទេ។ ការថ្លែងដូច្នេះបន្ទាប់ពីលោកពូទីនស្នើឱ្យបង្កើតរដ្ឋាភិបាលបណ្ដោះអាសន្ន និងរៀបចំការបោះឆ្នោតនៅអ៊ុយក្រែន។
ប្រភពខ្លះថាសំណើរបស់លោកពូទីនអាចនឹងផាត់ចោលលោកហ្សេឡិនស្គីមិនឱ្យចូលរួមនៅក្នុងរដ្ឋាភិបាលចម្រុះ។ នៅក្នុងបទសម្ភាសជាមួយទូរទស្សន៍អឹនប៊ីស៊ី (NBC) នៅថ្ងៃអាទិត្យ លោកត្រាំថ្លែងថាបើរុស្ស៊ី និងលោកមិនអាចសម្រេចបានកិច្ចព្រមព្រៀងបញ្ចប់សង្គ្រាមដ៏បង្ហូរឈាមនៅអ៊ុយក្រែនទេ និងបើលោកគិតថាវាជាកំហុសរបស់រុស្ស៊ី លោកនឹងដំឡើងពន្ធប្រេងរបស់រុស្ស៊ី។ មានន័យថាបើអ្នកទិញប្រេងពីរុស្ស៊ី អ្នកមិនអាចរកស៊ីនៅអាមេរិកទេ។ លោកនឹងដំឡើងពន្ធ២៥%។
គេនៅចាំបានថាកាលពីមុននេះ លោកត្រាំធ្លាប់រិះគន់លោកហ្សេឡិនស្គី។ លោកថាលោកចាប់ផ្ដើមធុញទ្រាន់នៅពេលលោកហ្សេឡិនស្គីមិនអាចបញ្ចប់សង្គ្រាម និងថាលោកហ្សេឡិនស្គីជាមេដឹកនាំផ្ដាច់ការដែលបន្តកាន់អំណាចដោយមិនបោះឆ្នោត។ តាមចិត្តរបស់លោកត្រាំ លោកចង់បញ្ចប់សង្គ្រាមនេះឱ្យបានឆាប់ដើម្បីងាកទៅគិតគូរអំពីបញ្ហាអ្វីផ្សេង។ កាលពីសប្ដាហ៍មុន រុស្ស៊ី និងអ៊ុយក្រែនបានទទួលយកបទឈប់បាញ់នៅសមុទ្រខ្មៅ និងយល់ព្រមផ្អាកវាយប្រហារទីតាំងផលិតថាមពល។
លោកត្រាំព្រមានថាបើនៅក្នុងរយៈពេលមួយខែទៅមុខទៀតគ្មានកិច្ចព្រមព្រៀងនៃបទឈប់បាញ់ទេ លោកនឹងដំឡើងពន្ធទៅលើទំនិញរបស់រុស្ស៊ីបន្ថែមពីលើទណ្ឌកម្មសេដ្ឋកិច្ចដែលមានស្រាប់។ លោកថាលោកពូទីនដឹង មិនមែនមិនដឹងទេថាលោកមានកំហឹង។ ប៉ុន្តែលោក និងលោកពូទីននឹងបន្តមានទំនាក់ទំនងល្អនឹងគ្នាជានិច្ច។ ត្រាំថាគាត់ខឹងតែមួយឆាវប៉ុណ្ណោះហើយឆាប់បាត់ទៅវិញ សំខាន់ឱ្យតែលោកពូទីនធ្វើរឿងត្រឹមត្រូវ។
សូមរំលឹកថានៅក្នុងបទសម្ភាសជាមួយអឹនប៊ីស៊ី (NBC) ដដែលកាលពីយប់ថ្ងៃសៅរ៍ លោកត្រាំព្រមានទម្លាក់គ្រាប់បែក និងដំឡើងពន្ធអ៊ីរ៉ង់បន្ថែមពីលើទណ្ឌកម្មសេដ្ឋកិច្ចដែលមានស្រាប់បើអ៊ីរ៉ង់មិនព្រមចុះកិច្ចព្រមព្រៀងជាមួយអាមេរិកដើម្បីធានាថាខ្លួនមិនផលិតអាវុធនុយក្លេអ៊ែរ។ លោកថ្លែងថាបើពួកគេមិនព្រមចរចាឱ្យមានកិច្ចព្រមព្រៀងទេ អាមេរិកនឹងទម្លាក់គ្រាប់បែកយ៉ាងខ្លាំងក្លាដែលពុំធ្លាប់មានពីមុនមក។ លោកត្រាំថានៅពេលនេះ មន្ត្រីរដ្ឋាភិបាលអាមេរិក និងអ៊ីរ៉ង់កំពុងជជែកគ្នា។
ផ្ទុយពីការអះអាងនេះ ប្រធានាធិបតីអ៊ីរ៉ង់ថ្លែងនៅក្នុងសេចក្ដីប្រកាសនៅថ្ងៃអាទិត្យថាលោកសូមបដិសេធមិនចរចាគ្នាដោយផ្ទាល់ជាមួយអាមេរិកដើម្បីដោះស្រាយបញ្ហានុយក្លេអ៊ែរទេ។ នេះជាការឆ្លើយតបដោយប្រយោលជាលើកដំបូងចាប់តាំងពីលោកត្រាំផ្ញើលិខិតមួយច្បាប់ទៅអគ្គមគ្គុទ្ទេសក៍អ៊ីរ៉ង់ លោកអាចារ្យអាយ៉ាតូឡា អាលី ខាមេនី (Ayatollah Ali Khamenei)៕
ចែករំលែកព័តមាននេះ