នាយករដ្ឋមន្ត្រីថៃថ្មីមានទំនុកចិត្តថា ៤ឆ្នាំបន្ទាប់នឹងមានការផ្លាស់ប្តូរ សម្រាប់សេដ្ឋកិច្ចកំពុងចុះខ្សោយ
ប្រទេសថៃ ៖ នាយករដ្ឋមន្ត្រីថ្មីរបស់ប្រទេសថៃ បានសន្យាថា នឹងចាប់ផ្តើមស្តារសេដ្ឋកិច្ច ដែលរង
ប្រទេសថៃ ៖ នាយករដ្ឋមន្ត្រីថ្មីរបស់ប្រទេសថៃ បានសន្យាថា នឹងចាប់ផ្តើមស្តារសេដ្ឋកិច្ច ដែលរងគ្រោះដោយសារជំងឺរាតត្បាតកូវីដ-១៩ តាមរយៈការជំរុញប្រាក់ចំណូលប្រជាជន និងគាំទ្រដល់អាជីវកម្មខ្នាតតូច។ នេះបើតាមប្រភពពីទីភ្នាក់ងារសារព័ត៌មានរ៉យទ័រ ចេញផ្សាយកាលពីថ្ងៃទី២៤ ខែសីហា ឆ្នាំ២០២៣។
លោក ស្រេតថា ថាវីស៊ីន (Srettha Thavisin) មហាសេដ្ឋីអចលនទ្រព្យ មកពីគណបក្សភឿថៃ ដែលឈ្នះការបោះឆ្នោតពីសភា កាលពីថ្ងៃទី២២ ខែសីហា ឆ្នាំ ២០២៣ បានក្លាយជានាយករដ្ឋមន្ត្រីទី៣០របស់ប្រទេសថៃ ក្រោយទទួលការតែងតាំងដោយព្រះមហាក្សត្រថៃ កាលពីថ្ងៃទី២៣ ខែសីហា ឆ្នាំ ២០២៣ កន្លងទៅ ដើម្បីដឹកនាំប្រទេសសេដ្ឋកិច្ចធំលំដាប់ទី២ របស់អាស៊ីអាគ្នេយ៍មួយនេះ។
មួយថ្ងៃមុនពេលក្លាយជានាយករដ្ឋមន្ត្រីផ្លូវការ លោក ស្រេតថា នៅក្នុងសភាថៃបានរាយការណ៍ថា សេដ្ឋកិច្ចខ្លួនបានកើនឡើងត្រឹមតែ ១.៨% ប៉ុណ្ណោះ អំឡុងខែមេសា ដល់ខែមិថុនា បើធៀបនឹងឆ្នាំមុន ពោលគឺទាបជាងការព្យាករណ៍កំណើន ៣.១% ដោយអ្នកសេដ្ឋកិច្ច។
លោក Sethaput Suthiwartnaruput ប្រធានធនាគារកណ្តាលថៃ បានលើកឡើងក្នុងសុន្ទរកថា ដែលបានកត់ត្រាកាលពីថ្ងៃទី២៣ ខែសីហា កន្លងទៅ ថា ការនាំចេញបានធ្លាក់ចុះជាងការរំពឹងទុក ដែលជាផ្នែកសំខាន់ចំពោះការធ្លាក់ចុះនៃប្រទេសចិន។ ការចំណាយសរុបពីវិស័យទេសចរណ៍ ក៏បានធ្លាក់ចុះបន្តិចផងដែរ ដោយសារតែភ្ញៀវទេសចរចិនតិចជាងការរំពឹងទុក។
ក្រៅពីស្រមោលនៃការធ្លាក់ចុះដោយប្រទេសចិន ដែលជាដៃគូពាណិជ្ជកម្មដ៏ធំបំផុតរបស់ប្រទេសថៃ បំណុលគ្រួសារខ្ពស់ និងការកើនឡើងអត្រាការប្រាក់ ក៏បានធ្វើឱ្យមានទម្ងន់លើការប្រើប្រាស់ក្នុងស្រុកផងដែរ។ ទិន្នន័យបង្ហាញថា វិស័យទេសចរណ៍ ដែលជាកត្តាជំរុញដ៏សំខាន់នៃសេដ្ឋកិច្ចថៃ បានគ្រប់គ្រងការងើបឡើងវិញដ៏រឹងមាំ បើទោះបីជាការមកដល់ និងការចំណាយរបស់ភ្ញៀវទេសចរទាបជាងកម្រិតមុនការរីករាលដាល់ជំងឺកូវីដ-១៩ យ៉ាងណាក៏ដោយ។
ក្រុមអ្នកវិភាគបានលើកឡើងថា បន្ទាប់ពីមានរដ្ឋបាលចាំផ្ទះជាច្រើនខែ និងការជាប់គាំងនយោបាយបន្ទាប់ពីការបោះឆ្នោតសកលខែឧសភា រដ្ឋាភិបាលថ្មី គួរតែជួយធ្វើឱ្យទីផ្សារដែលកំពុងស្ងប់ស្ងាត់ ត្រឡប់មករកសភាពល្អប្រសើរឡើងវិញ។
សន្ទស្សន៍ភាគហ៊ុនសំខាន់របស់ប្រទេសថៃ (.SETI) បានកើនឡើង ០.២% កាលពីថ្ងៃទី២៣ ខែសីហា ប៉ុន្តែប្រាក់បាតបានធ្លាក់ចុះ ០.២% ធៀបនឹងប្រាក់ដុល្លារអាមេរិក បន្ទាប់ពីការកើនឡើង កាលពីថ្ងៃទី២២ ខែសីហា កន្លងទៅ។
ក្នុងសុន្ទរកថាជាលើកដំបូងរបស់នាយករដ្ឋមន្ត្រីថ្មី កាលពីថ្ងៃទី២៣ ខែសីហា លោក ស្រេតថា បានប្តេជ្ញាថានឹងផ្តល់ដំណោះស្រាយ ដើម្បីជួសជុលសេដ្ឋកិច្ចរបស់ប្រទេសថៃ ក្នុងចំណោមវិធានការផ្សេងទៀត និងគ្រប់គ្រងថវិកាប្រកបដោយតម្លាភាព។ បុរសអ្នកបាងកកវ័យ៦១ឆ្នាំរូបនេះ បានលើកឡើងថា «ប្រទេសថៃស្ថិតក្នុងចំណុចប្រសព្វដ៏សំខាន់មួយ ខ្ញុំមានទំនុកចិត្តថា ៤ឆ្នាំបន្ទាប់នឹងក្លាយជា៤ឆ្នាំនៃការផ្លាស់ប្តូរ»។
ការដាក់បញ្ចូលគ្នានូវថវិកាជាតិចំនួន ៣.៣៥ទ្រីលានបាត ដែលស្មើនឹង ៩៥.៩៦ពាន់លានដុល្លារ សម្រាប់ឆ្នាំសារពើពន្ធ ២០២៤ នឹងក្លាយជាកិច្ចការសំខាន់មួយសម្រាប់លោក ស្រេតថា ដែលជាអ្នកនយោបាយថ្មីថ្មោង ដែលភឿថៃណែនាំដល់អ្នកបោះឆ្នោតថា ដៃមានបទពិសោធន៍ ដើម្បីដឹកនាំសេដ្ឋកិច្ចប្រទេសដែលមានប្រជាជនជាង ៧១លាននាក់។
គេនៅចាំបានថា នៅមុនការបោះឆ្នោតសកល លោក ស្រេតថា និងគណបក្សភឿថៃ ដែលមានប្រជាប្រិយភាព បានដាក់ការសន្យាដែលរួមមាន ការកំណត់គោលដៅកំណើនសេដ្ឋកិច្ច ៥% ជារៀងរាល់ឆ្នាំ, គម្រោងផ្តល់ជំនួយមានតម្លៃ ៥៦០ពាន់លានបាត ស្មើនឹង ១៦.០៤ពាន់លានដុល្លារ, ដំឡើងប្រាក់ឈ្នួលអប្បបរមាប្រចាំថ្ងៃ និងប្រាក់ចំណូលកសិករលើ៣ដង។ គណបក្សនេះ ក៏បានសន្យាថា នឹងកាត់បន្ថយថ្លៃឈ្នួលផ្លូវដែកក្នុងទីក្រុង ថ្លៃថាមពល ថ្លៃអគ្គិសនី និងឧស្ម័ន ក្រៅពីផ្តល់ការផ្អាកសងបំណុលរយៈពេល១ឆ្នាំ សម្រាប់អាជីវកម្មខ្នាតតូច ដែលរងគ្រោះដោយកូវីដ-១៩។ ប៉ុន្តែសមត្ថភាពនៃការប្រតិបត្តិរបស់ខ្លួន នឹងអាស្រ័យលើការគាំទ្រពីយោធា ដែលបក្សភឿថៃបានចងសម្ព័ន្ធភាពជាមួយ ដើម្បីអាចបង្កើតរដ្ឋាភិបាលបាន៕
ចែករំលែកព័តមាននេះ