រាជធានីភ្នំពេញ ៖ ក្នុងន័យជួយដល់អ្នកជំងឺ និងគ្រូពេទ្យផ្សេងៗបានដឹងពីប្រវត្តិនៃការប្រើប្រាស់ថ្នាំរបស់អ្នកជំងឺ អ្នកឧកញ៉ា វេជ្ជបណ្ឌិត គួច ម៉េងលី តាមរយៈបទសម្ភាសន៍មួយពីបញ្ហាសុខភាព (គន្លឹះដើម្បីឲ្យគេលក់ស្កប់)…
រាជធានីភ្នំពេញ ៖ ក្នុងន័យជួយដល់អ្នកជំងឺ និងគ្រូពេទ្យផ្សេងៗបានដឹងពីប្រវត្តិនៃការប្រើប្រាស់ថ្នាំរបស់អ្នកជំងឺ អ្នកឧកញ៉ា វេជ្ជបណ្ឌិត គួច ម៉េងលី តាមរយៈបទសម្ភាសន៍មួយពីបញ្ហាសុខភាព (គន្លឹះដើម្បីឲ្យគេលក់ស្កប់) បានសំណូមពរវេជ្ជបណ្ឌិត លោកគ្រូពេទ្យ និងអ្នកគ្រូពេទ្យ «សុំកុំបកសំបកថ្នាំ»។
នៅក្នុងវីដេអូនោះដែរ អ្នកឧកញ៉ា វេជ្ជបណ្ឌិត គួច ម៉េងលី បាននិយាយជាង២៤នាទី បាន សំណូមពរដល់ លោកដុកទ័រ លោកគ្រូពេទ្យ និងអ្នកគ្រូពេទ្យទាំងអស់ មេត្តាបើកចិត្តទូលំទូលាយធ្វើបុណ្យធ្វើទានឲ្យបានច្រើនបន្តិច សូមហាម ឬសូមកុំបកសំបកថ្នាំពេទ្យចេញ ។
អ្នកឧកញ៉ាវេជ្ជបណ្ឌិត គួច ម៉េងលី ស្ថាបនិកប្រធានក្រុមប្រឹក្សាភិបាល និងជាអគ្គនាយកប្រតិបត្តិនៃក្រុមហ៊ុន ម៉េងលី ជេ. គួច អេឌ្យូខេសិន (MJQE) បានបន្តថា ៖ យើងជាវេជ្ជបណ្ឌិត រៀនពេទ្យមក មិនថា នៅស្រុកគេ ឬស្រុកណាទេ ខ្ញុំក៏ជាវេជ្ជបណ្ឌិតដែរ សូមហាមកុំបកសំបកថ្នាំ។ ក្នុងន័យនេះ បើសិនជាអ្នកជំងឺធ្លាប់ព្យាបាលជាមួយលោកគ្រូពេទ្យណាម្នាក់ ហើយក្រោយមកក៏ទៅព្យាបាលកន្លែងផ្សេង ឬចង់ទិញថ្នាំបន្ថែម នាំឱ្យពិបាក មិនដឹងថា អ្នកជំងឺធ្លាប់មានប្រវត្តិប្រើប្រាស់ថ្នាំអ្វីខ្លះ។
អ្នកឧកញ៉ាវេជ្ជបណ្ឌិត គួច ម៉េងលី បន្តថា ទោះបីគាត់ (អ្នកជំងឺ) មិនមកទិញយើង គាត់អាចទៅអ្នកផ្សេង គឺគាត់អាចដឹងថា គាត់ញាំថ្នាំអី (ថ្នាំដែលបកសំបកថ្នាំចេញ) ដើម្បីឲ្យគ្នាឆាប់ព្យាបាលឲ្យជា ។ អ្នកឧកញ៉ាវេជ្ជបណ្ឌិត គួច ម៉េងលី បន្ថែមថា ករណីមានក្រុមគ្រួសារខ្លះ ដែលមានប្តី ឬមានប្រពន្ធ ឬមានកូន មានដែលមានជំងឺផ្លូវចិត្តទៅហើយ វាមហាវេទនាណាស់ទៅហើយ។ ដូច្នេះហើយ មេត្តាធ្វើបុណ្យទានបន្តិចទៅសុទ្ធតែកូនខ្មែរ ជនជាតិខ្មែរដូចតែគ្នាទេ ។
«ទី១ យើងខ្វះជំនាញស្រាប់ផង ខ្វះវេជ្ជបណ្ឌិតខាងហ្នឹង (ខាងជំងឺគេងមិនលក់ ឬកើតជំងឺផ្លូវចិត្ត)។ ទី២ ប្រជាជនយើងក្រទៀត អ៊ីចឹងបើយើងព្យាបាលមេត្តាឲ្យថ្នាំគ្នា សរសេរទៅ (ចេញវេជ្ជបញ្ជាត្រឹមត្រូវ) ហើយចេញថ្នាំតាមហ្នឹងទៅ»។ នេះជាការសំណូមពររបស់អ្នកឧកញ្ញាវេជ្ជបណ្ឌិត គួច ម៉េងលី ដោយបានបន្ថែមទៀតថា «បើសិនគាត់មកយើងមិនជាទេ គាត់បាត់ទំនុកចិត្ត គាត់ទៅពេទ្យផ្សេងគាត់មានសំបកថ្នាំ គាត់ប្រាប់ពេទ្យផ្សេង (ថាធ្លាប់ប្រើថ្នាំអី) គាត់អាចដូរថ្នាំ ទៅតាមហ្នឹង ដើម្បីឲ្យគ្នាឆាប់ជា ចូលរួមសង្គមនឹងគេនឹងឯង ដើម្បីកាត់បន្ថយការពិបាកក្នុងគ្រួសារ»។
អ្នកឧកញ៉ាវេជ្ជបណ្ឌិត គួច ម៉េងលី បន្តថា «ដូច្នេះហើយខ្ញុំសុំសំណូមពរមេត្តាយោគយល់គ្នា អីចឹងក្នុងនាមជាវេជ្ជបណ្ឌិតមួយដែរ ក្នុងនាមជាឯកជន ឬបុគ្គល ព្រោះខ្ញុំមិនអាចធ្វើអ្វីបានច្រើនទេ បានចូលរួមបន្តិចបន្តួចតាមសន្តានចិត្តរបស់ខ្ញុំ» ។
ជាមួយគ្នានោះដែរ លោក គួច ម៉េងលី បានបញ្ជាក់ថា អ៊ីចឹងខ្ញុំសំណូមពរថា ផ្លូវចិត្តដែលសង្គមយើងប្រឈមច្រើនដោយសារសម្ពាធសង្គ្រាម ជះឥទ្ធិពលដល់សព្វថ្ងៃធ្វើឲ្យប្រជាជនក្រីក្រ ឆ្លងកាត់ពិបាក អ៊ីចឹងអាសង្គ្រាមគ្រួសារ សង្គ្រាមផ្លូវចិត្ត សេដ្ឋកិច្ច សង្គ្រាមសង្គមហ្នឹងធ្វើឲ្យ មានរឿងរ៉ាងយ៉ាងច្រើនដល់ផ្លូវចិត្ត អ៊ីចឹងបើយើងអាចជួយដោះស្រាយបាន ក្នុងការព្យាបាល គឺសូមមេត្តាជួយ ហើយខ្ញុំមានតែសំណូមពរប៉ុណ្ណឹងទេតាមមិត្ត រួមមិត្តភក្តិពេទ្យទាំងអស់ ដែលគេហៅថា ជាវិស័យតែមួយ និងសូមអភ័យទោសក្នុងការខុសឆ្គង ប៉ុន្តែខ្ញុំជឿជាក់ថា ពួកយើងទាំងអស់គ្នាសុទ្ធតែមានសន្តានចិត្តល្អហើយបានជាចូលធ្វើពេទ្យហ្នឹង ៕
ចែករំលែកព័តមាននេះ