ADផ្ទាំងផ្សព្វផ្សាយពាណិជ្ជកម្ម

តុលាការថៃកា.ត់ទោ.សអតីតអនុប្រធានបក្សនយោបាយម្នាក់ពីបទបៀ.តបៀ.នផ្លូ.វ.ភេ.ទនា.រីវ័.យក្មេ.ង

3 ខែ មុន

២៤ ខែ សីហា ឆ្នាំ ២០២៣ ម៉ោង ០១:២៤

នៅទីបំផុត, តុលាការទីក្រុងបាងកកបានសម្រេចហើយលើករណីជនជាប់ចោទឈ្មោះព្រីន ផានិតភក្ដី (Prinn Panitchpakdi) ដែលជាអតីតអនុប្រធានគណបក្សប្រជាធិបតេយ្យ។ លោកត្រូវតុលាការផ្ដន្ទាទោសឱ្យគាត់ពន្ធនាគារ២ឆ្នាំ និង៨ខែពីបទបៀតបៀនផ្លូវភេទសិស្សស្រីវ័យក្មេងម្នាក់អាយុ១៨ឆ្នាំ។ តុលាការតម្រូវឱ្យគាត់អនុវត្តទោសភ្លាមៗដោយគ្មានការពន្យារពេលតទៅទៀតទេ។ ហេតុការណ៍បៀតបៀនផ្លូវភេទកើតឡើងកាលពីឆ្នាំ២០២១។ នេះបើយោងតាមការិយាល័យព្រះរាជអាជ្ញា។

អ្នកនាំពាក្យគណបក្សប្រជាធិបតេយ្យថ្លែងថាសេចក្ដីសម្រេចឱ្យជាប់ទោសនេះធ្វើឡើងដោយតុលា ការព្រហ្មទណ្ឌនៃទីក្រុងបាងកកកាលពីថ្ងៃទី១០ ខែសីហា។ នៅចំពោះមុខអង្គជំនុំជម្រះ, ព្រះរាជអាជ្ញាបង្ហាញភស្តុតាងដាក់បន្ទុកថាលោកព្រីនបានល្បួងនារីរងគ្រោះទៅជួបគាត់នៅឯភោជនីយដ្ឋានដែលស្ថិតនៅអគារជាន់លើបំផុត របៀបជាស្កាយបារ (sky bar)។ បន្ទាប់មក, គាត់ប្រើកាយវិការបៀតបៀនផ្លូវភេទនារីនោះ។ នាងបានដាក់ពាក្យប្ដឹងទៅប៉ុស្តិ៍នគរបាលកាលពីខែមេសា ឆ្នាំ២០២២។

តុលាការរកឃើញថាលោកព្រីនបានប្រព្រឹត្តកំហុសដូចការចោទប្រកាន់មែន។ ដូចនេះ តុលាការកាត់ទោសឱ្យគាត់ជាប់ពន្ធនាគារ២ឆ្នាំ និង៨ខែ។ ទោសនេះត្រូវតែអនុវត្តភ្លាមៗដោយមិនអនុញ្ញាតឱ្យពន្យារពេល ឬកិកកុកបានឡើយ។ នេះគ្រាន់តែជាចំណុចចាប់ផ្ដើមតែប៉ុណ្ណោះ។ អតីតអនុប្រធានបក្សរូបនេះនៅជាប់សំណុំរឿងចោទប្រកាន់ជាច្រើនករណីទៀតដែលសុទ្ធតែពាក់ព័ន្ធនឹងបញ្ហាផ្លូវភេទ និងការបៀតបៀនផ្លូវភេទ។

នៅថ្ងៃទី២៥ ខែកញ្ញាខាងមុខនេះ, តុលាការទីក្រុងបាងកកនឹងប្រកាសសេចក្ដីសម្រេចពាក់ព័ន្ធនឹងសំណុំរឿងបៀតបៀន១ករណីទៀតដែលប្រព្រឹត្តឡើងដោយអតីតអនុប្រធានគណបក្សប្រជាធិប តេយ្យដដែល។ ក្រៅពីនេះ, លោកព្រីននៅជាប់បណ្ដឹងជាច្រើនទៀតដែលតុលាការកំពុងយកមកពិនិត្យ និងត្រៀមបើកសវនាការ។ ដូច្នេះ បើសរុបទោសទាំងអស់, គាត់អាចជាប់ពន្ធនាគារមិនតិចឆ្នាំទេ។

បន្ទាប់ពីសំណុំរឿងទី១ត្រូវបែកធ្លាយជាសាធារណៈ, លោកព្រីនត្រូវតែបង្ខំចិត្តលាលែងពីតំណែងជាអនុប្រធានគណបក្សប្រជាធិបតេយ្យដែលទទួលបន្ទុកខាងសេដ្ឋកិច្ច។ ប៉ុន្តែគាត់នៅតែមិនព្រមទទួលស្គាល់ថាខ្លួនបានប្រព្រឹត្តដូចការចោទប្រកាន់ឡើយ។ សំណុំរឿងចោទប្រកាន់ដទៃទៀតចំពោះលោកព្រីនត្រូវបានទម្លាយឱ្យដឹងតាមរយៈមេធាវីល្បីឈ្មោះម្នាក់ឈ្មោះស៊ីត្រា (Sittra)។ គឺមេធាវីរូបនេះហើយដែលរៀបចំដាក់ពាក្យប្ដឹងអតីតអនុប្រធានបក្សជាផ្លូវការទៅនគរបាលយុត្តិធម៌។

មេធាវីស៊ីត្រាអះអាងថាស្ត្រីរហូតដល់ដប់នាក់ដែលហែលឆ្លងអំពើបៀតបៀនរបស់ជនសង្ស័យម្នាក់នេះ។ នៅក្នុងករណីធ្ងន់ធ្ងរ, នារី៥នាក់ប្រាប់ថាពួកខ្លួនត្រូវបានលោកព្រីនរំលោភសេពសន្ថវៈ។ រីឯនារី៥នាក់ទៀតចោទប្រកាន់ថាលោកព្រីនបានបៀតបៀនផ្លូវភេទ។ លោកព្រីនជាកូនប្រុសលោកស៊ុផាឆៃ (Supachai) ដែលជាអតីតឧបនាយករដ្ឋមន្ត្រីថៃ, ជាអតីតអគ្គនាយកអង្គការពាណិជ្ជកម្មពិភពលោក និងជាអតីតអគ្គលេខាធិការទទួលបន្ទុកខាងសន្និសីទពាណិជ្ជកម្ម និងការអភិវឌ្ឍ៕

ប្រភព៖ Bangkok Post
https://www.bangkokpost.com/thailand/politics/2634459/ex-democrat-deputy-leader-prinn-jailed-in-sexual-abuse-case