រាជធានីភ្នំពេញ ៖ លោកជំទាវយិន ផាន្នី និងលោកឧកញ៉ាថុង អ៊ុយប៉ាង ស្ថាបនិកកាសែតកោះសន្តិភាព បានផ្តល់ប្រាក់សប្បុរសធម៌ ឧបត្ថម្ភដល់សពដែលស្លាប់គ្មានបងប្អូនសាច់ញាតិចំនួន១៥ម៉ឺនរៀល ដើម្បីរៀបចំចាត់ចែងបូជា ខណៈដែលលោកជំទាវ និងលោកឧកញ៉ាកើតក្តីរំជួលចិត្តអាណិតអាសូរដល់សពដែលក្រីក្រនេះ គឺសពបុរសម្នាក់ដែលអត់ស្គាល់អត្តសញ្ញាណ អាយុប្រមាណ៥០ឆ្នាំ បានស្លាប់បាត់បង់ជីវិតនៅមន្ទីរពេទ្យព្រះកុសុមៈ កាលពីថ្ងៃទី១១ ឧសភា បន្ទាប់ពីដួលម៉ូតូតែម្នាក់ឯងសន្លប់នៅភូមិថ្នល់បំបែក សង្កាត់ចោមចៅ ខណ្ឌដង្កោ កាលពីវេលាម៉ោង២និង៤០នាទីរំលងអធ្រាត្រចូលថ្ងៃទី៩ ឧសភា កន្លងមកនេះ ។
គួររំឭកថា កាលពីថ្ងៃទី៩ ឧសភា បុរសម្នាក់នេះបានជិះម៉ូតូម៉ាកសង់កូរ៉េ កាំប្រទះ ពណ៌កំបោរ ពាក់ស្លាកលេខ ឌ-២០៩៤ ភព១ បានជិះម៉ូតូដួលខ្លួនឯងបោកក្បាលនឹងថ្នល់បណ្តាលឱ្យសន្លប់ បន្ទាប់មករថយន្តសាមុយពោធិចិនតុង ដឹកយកទៅព្យាបាលនៅមន្ទីរពេទ្យព្រះកុសុមៈ។ ចំណែកម៉ូតូរបស់ជនរងគ្រោះ ប៉ូលិសប៉ុស្តិ៍បានយកទៅរក្សាទុកនៅប៉ុស្តិ៍ចោមចៅ ចាប់តាំងពីថ្ងៃកើតហេតុមកដល់ពេលនេះក៏គ្មានបងប្អូនមកសួររកដែរ ។ ខណៈព្យាបាលនៅមន្ទីរពេទ្យព្រះកុសុមៈ បុរសរងគ្រោះបានសន្លប់រហូតមិនដឹងខ្លួនទេ ហើយក៏គ្មានបងប្អូនមកសួររកដែរ រហូតដល់ថ្ងៃទី១១ ឧសភា បានស្លាប់បាត់បង់ជីវិត ។ ចំណែកសពតម្កល់ទុកនៅសាលតម្កល់សពនៃមន្ទីរពេទ្យព្រះកុសុមៈ រង់ចាំសាច់ញាតិបងប្អូនមករក ។
លោកសូ វុន អគ្គានុរក្សរងប្រចាំមន្ទីរពេទ្យព្រះកុសុមៈមានប្រសាសន៍ឱ្យដឹងថា ជាធម្មតាសពដែលគ្មានបងប្អូនមកសួររក គឺខាងមន្ទីរពេទ្យតម្កល់់ទុករយៈពេល២យប់៣ថ្ងៃ ប៉ុន្តែសពរូបនេះបើមិនឃើញបងប្អូនមករកទេ ថ្ងៃទី១៣ ឧសភា វេលាម៉ោង១២ថ្ងៃត្រង់ នឹងយកទៅបូជានៅវត្តពោធិចិនតុងហើយ។ សពមិនស្គាល់អត្តសញ្ញាណ និងគ្មានបងប្អូននេះ មានភិនភាគសម្បុរខ្មៅ សក់រាងឆកបន្តិច កម្ពស់១,៦២ម៉ែត្រ ។ ឃើញគួរឱ្យអាណោចអាធ័មបែបនេះ ទើបលោកជំទាវយិន ផាន្នី និងលោកឧកញ៉ាថុង អ៊ុយប៉ាង ផ្តល់ប្រាក់ឧបត្ថម្ភបូជាសព ដើម្បីឱ្យវិញ្ញាណក្ខន្ធទៅកាន់សុគតិភព៕
ចែករំលែកព័តមាននេះ