ខេត្តបាត់ដំបង ៖ ពួកក្មេងទំនើងដែលតែងដេញកាប់ចាក់គ្នាយ៉ាងកក្រើកក្រុងបាត់ដំបង នាប៉ុន្មានសប្ដាហ៍កន្លងទៅនេះ ត្រូវកម្លាំងអធិការក្រុងបាត់ដំបងធ្វើការស្រាវជ្រាវបង្ក្រាប និងឃាត់ខ្លួនបានចំនួន០៦នាក់ជាបន្តបន្ទាប់ កាលពីវេលាទៀបភ្លឺថ្ងៃទី២១ សីហា ក្រោយពីប្រទះឃើញមុខសញ្ញាជនពាលនេះមួយចំនួន ដើរកាន់ដាវនៅលើសួនច្បារសាធារណៈក្នុងក្រុងបាត់ដំបង…
ខេត្តបាត់ដំបង ៖ ពួកក្មេងទំនើងដែលតែងដេញកាប់ចាក់គ្នាយ៉ាងកក្រើកក្រុងបាត់ដំបង នាប៉ុន្មានសប្ដាហ៍កន្លងទៅនេះ ត្រូវកម្លាំងអធិការក្រុងបាត់ដំបងធ្វើការស្រាវជ្រាវបង្ក្រាប និងឃាត់ខ្លួនបានចំនួន០៦នាក់ជាបន្តបន្ទាប់ កាលពីវេលាទៀបភ្លឺថ្ងៃទី២១ សីហា ក្រោយពីប្រទះឃើញមុខសញ្ញាជនពាលនេះមួយចំនួន ដើរកាន់ដាវនៅលើសួនច្បារសាធារណៈក្នុងក្រុងបាត់ដំបង ។
លោក ពេជ្រ សារ៉ែន អធិការក្រុងបាត់ដំបងបានប្រាប់ថា ក្រុមក្មេងអន្ធពាលទាំង០៦នេះ ដែលត្រូវកម្លាំងជំនាញរបស់លោកឃាត់ខ្លួនបាននេះ មានជាប់ពាក់ព័ន្ធនឹកការប្រព្រឹត្តអំពើហិង្សាចំនួន០២ករណីផ្សេងគ្នា ។ លោកបានបញ្ជាក់ថា ជនសង្ស័យទាំង០៦នាក់នេះ សុទ្ធតែជាក្រុមក្មេងទំនើង ដែលតែងធ្វើសកម្មភាពកាប់ចាក់គ្នាពេលយប់។ ពួកគេប្រើដាវកាំបិតកាប់ទៅលើភាគីម្ខាងបណ្ដាលឲ្យរងរបួស ហើយថែមទាំងកាប់បំផ្លាញម៉ូតូភាគីរងគ្រោះទៀតផង តែពេលនេះត្រូវកម្លាំងរបស់លោកឃាត់ខ្លួនបាន០៦នាក់ហើយ ខណៈដែលបក្សពួកមួយចំនួនកំពុងគេចខ្លួន ។
បើតាមរបាយការណ៍បានឲ្យដឹងថា ក្នុងចំណោមជនសង្ស័យចំនួន០៦នាក់នេះ មាន០៥នាក់បានប្រព្រឹត្តហិង្សា កាលពីវេលារំលងអធ្រាត្រ ឈានចូលថ្ងៃទី ១៦ សីហា នៅលើសួនច្បារសម្ដេចក្រឡាហោម ស ខេង ស្ថិតនៅភូមិរំចេក៤ សង្កាត់រតនៈ ក្រុងបាត់ដំបង បណ្ដាលឲ្យភាគីម្ខាងខូចខាតម៉ូតូ០៤គ្រឿង រីឯមនុស្សរត់រួចខ្លួន ។
ជនសង្ស័យទាំង០៥នាក់នេះ មាន ១-ឈ្មោះ រិទ្ធ ដារ៉ា អាយុ១៦ឆ្នាំ ២-ឈ្មោះ លី រ៉ូហ្សា អាយុ២០ឆ្នាំ ៣-ឈ្មោះ គង់ សំណាង អាយុ១៧ឆ្នាំ ៤-ឈ្មោះគិន ទិត្យ អាយុ១៦ឆ្នាំ និង ៥-ឈ្មោះ ទុយ សុខវីរ៉ា អាយុ១៧ឆ្នាំ ។ ដោយឡែក ជនម្នាក់ទៀតដែលឃាត់ខ្លួនជាមួយគ្នានេះដែរ គឺឈ្មោះ យ៉េន ចាន់ប៊ុនធឿន ហៅ លីន អាយុ១៧ឆ្នាំ នៅភូមិសូរភី១ សង្កាត់រតនៈ។ សមត្ថកិច្ចបានប្រាប់ថា ជននេះមានបក្ខពួក០៤នាក់ បានជិះម៉ូតូដេញកាប់ភាគីម្ខាងទៀត កាលពីវេលារំលងអធ្រាត្រឈានចូលថ្ងៃទី ២០ សីហា នៅម្ដុំរង្វង់មូលព្រះនរាយ ក្នុងសង្កាត់អូរចា បណ្ដាលឲ្យភាគីម្ខាងរងរបួសក្បាលធ្ងន់ធ្ងរ។ លោក ពេជ្រេ សារ៉ែន បាននិយាយថា បើតាមចម្លើយសារភាពរបស់ជនសង្ស័យ ក្រុមទំនើងចំនួន០៥នាក់ដែលត្រូវឃាត់ខ្លួននេះ គឺមានបក្ខពួកសរុបចំនួន០៧នាក់ តែ០២នាក់កំពុងគេចខ្លួន ។
ដោយឡែក ជនម្នាក់ទៀត ដែលត្រូវឃាត់ខ្លួនរួមគ្នាដែរ គឺមានបក្សពួកសរុបចំនួន០៤នាក់ តែ០៣នាក់កំពុងគេចខ្លួនដែរ ។ សូមបញ្ជាក់ថា ប៉ុន្មានសប្ដាហ៍ចុងក្រោយនេះ ក្រុមក្មេងអន្ធពាលហាក់បង្កើនសកម្មភាពយ៉ាងខ្លាំងដេញកាប់ចាក់គ្នាកក្រើកក្រុងបាត់ដំបង នៅពេលយប់ ។ សមាសភាពក្រុមក្មេងអន្ធពាលទាំងនេះ ត្រូវគេកត់សម្គាល់ថា ភាគច្រើនជាពួកប្រព្រឹត្តិគ្រឿងញៀន។ ពួកនេះតែងប្រព្រឹត្តបទល្មើស ដេញកាប់ចាក់គ្នាកណ្ដាលរាត្រីនៅតាមដងផ្លូវ ឬ នៅលើសួរច្បារសាធារណៈនានា ក្នុងក្រុងបាត់ដំបង ក្រោយពេលពួកគេចេញពីក្លិបរាត្រី។
បើតាមការពិនិត្យជាក់ស្ដែង និងការសួរនាំពួកក្មេងទំនើងដែលច្បាំងគ្នាកណ្ដាលយប់នេះ គ្មានភាគីណាជាជនរងគ្រោះទេ ។ ពួកគេកាប់គ្នាទៅវិញទៅមក តែនៅពេលភាគីណាច្បាំងចាញ់ មានរបួសស្នាម ឬខូចខាតធ្ងន់ធ្ងរក៏អះអាងថា ខ្លួនជាភាគីរងគ្រោះ ។ តាមពិត សុទ្ធតែពួកក្មេងទំនើងដូចគ្នា។ យ៉ាងណាក្ដី ពេលនេះ ត្រូវសមត្ថកិច្ចបង្ក្រាបបានភាគីដែលច្បាំងឈ្នះមួយចំនួនហើយ ខណៈបក្សពួកមួយចំនួនកំពុងរត់ចោលស្រុក ហើយសមត្ថកិច្ចកំពុងតាមរកមុខ ។
បើតាមប្រភពព័ត៌មានបានបង្ហើបឲ្យដឹងថា ក្រុមជនអន្ធពាលមួយចំនួនកំពុងរត់គេចទៅសំងំលាក់ខ្លួននៅក្រុងប៉ោងប៉ែត ។
ព័ត៌មានបន្ថែម កោះសន្តិភាពនឹងមានផ្សាយជូនបន្ត ។
ចែករំលែកព័តមាននេះ