តុលាការសាលាដំបូងនៃខេត្តកៀនយ៉ាង (Kien Giang) ប្រទេសវៀតណាម សម្រេចផ្ដន្ទាទោសនារីជនជាតិវៀតណាមម្នាក់ឱ្យជាប់ពន្ធនាគារ៩ឆ្នាំពីបទរត់ពន្ធដោយលួចលាក់នូវកាំភ្លើង៦រយដើមពីខេត្តញ៉ាត្រាង (Nha Trang) ខេត្តដទៃទៀតនៃតំបន់ដីសណ្ដទន្លេមេគង្គ។ នារីឈ្មោះវូធីឌៀប (Vu…
តុលាការសាលាដំបូងនៃខេត្តកៀនយ៉ាង (Kien Giang) ប្រទេសវៀតណាម សម្រេចផ្ដន្ទាទោសនារីជនជាតិវៀតណាមម្នាក់ឱ្យជាប់ពន្ធនាគារ៩ឆ្នាំពីបទរត់ពន្ធដោយលួចលាក់នូវកាំភ្លើង៦រយដើមពីខេត្តញ៉ាត្រាង (Nha Trang) ខេត្តដទៃទៀតនៃតំបន់ដីសណ្ដទន្លេមេគង្គ។ នារីឈ្មោះវូធីឌៀប (Vu Thi Diep) អាយុ៣៣ឆ្នាំ ត្រូវតុលាការរកឃើញថាមានទោសកំហុសដូចការចោទប្រកាន់មែនពីបទផលិត កាន់កាប់ ដឹកជញ្ជូន ប្រើប្រាស់ និងជួញដូរអាវុធ ឬគ្រឿងបរិក្ខារយោធាដោយខុសច្បាប់។
ជនជាប់ចោទឈ្មោះហ្សឿងមិញទាន់ (Duong Minh Tuan) អាយុ៣១ឆ្នាំ ក៏ត្រូវតុលាការផ្ដន្ទាទោសឱ្យជាប់ពន្ធនាគារ៩ឆ្នាំផងដែរពាក់ព័ន្ធនឹងការចោទប្រកាន់ដូចគ្នា។ ជនជាប់ចោទ១៥នាក់ទៀតដែលជាបក្សពួកនៃក្រុមជួញដូរកាំភ្លើងនេះត្រូវជាប់ពន្ធនាគារពី៦ខែដល់១១ឆ្នាំ។ សូមរម្លឹកថាកាលពីឆ្នាំ២០១៩, តុលាការសាលាដំបូងនៃទីក្រុងហូជីមិញរកឃើញថានារីឈ្មោះវូធីឌៀប និងស្វាមីមានទោសពីបទលក់អាវុធខុសច្បាប់។
កាលនោះ, តុលាការផ្ដន្ទាទោសឱ្យនារីរូបនេះជាប់ពន្ធនាគារបីឆ្នាំ។ ប៉ុន្តែត្រូវព្យួរទោសដោយសារនារីនេះជាប់សម្រាលកូន និងត្រូវមើលថែទាំកូនតូច។ មិនយូរប៉ុន្មាន, នារីរូបនេះមិនចោលស្នៀតចាស់របស់ខ្លួនទេ។ នារីនេះបន្តរៀបចំខ្សែបណ្ដាញជាមួយបក្សពួកដទៃទៀតដើម្បីរត់ពន្ធអាវុធ។ នៅក្នុងចំណោមបក្សពួកនេះក៏មានបុរសឈ្មោះហ្សឿងមិញទាន់ម្នាក់ផងដែរ។
កាលពីខែសីហា ឆ្នាំ២០២២, សមត្ថកិច្ចខេត្តកៀនយ៉ាងចាប់បានបុរសឈ្មោះហ្សឿងមិញទាន់ នៅពេលកំពុងធ្វើសកម្មភាពខុសច្បាប់ចែកចាយគ្រឿងញៀនប្រភេទមេតំហ្វេតាមីន (ម៉ាទឹកកក) នៅក្នុងផ្ទះសំណាក់១កន្លែង។ ផ្ដើមចេញពីការចាប់គ្រឿងញៀននេះហើយដែលនាំឱ្យសមត្ថកិច្ចឈានទៅដល់ការបំបែកសំណុំរឿងផលិត និងចែកចាយកាំភ្លើង។ សមត្ថកិច្ចឆែកឆេរកន្លែងស្នាក់នៅរបស់ជនសង្ស័យ និងរកឃើញសម្ភារៈជាច្រើនប្រភេទដែលប្រើប្រាស់សម្រាប់ផលិតអាវុធ និងគ្រឿងផ្ទុះ។
ជនសង្ស័យឈ្មោះឌឿងមិញទាន់ឆ្លើយសារភាពតាមត្រង់ថាខ្លួនចេះផលិតកាំភ្លើង។ ចាប់ពីខែឧសភាដល់ខែសីហា ឆ្នាំ២០២៣នេះ, ខ្លួនបានសហការជាមួយបក្សពួកមួយចំនួនទៀតផលិតបានប្រភេទកាំភ្លើងបាញ់គ្រាប់កៅស៊ូចំនួន១៥ដើម។ បក្សពួករបស់គេផលិតតែកាំភ្លើងទេ។ ចំណែកគ្រាប់កាំភ្លើងផ្គត់ផ្គង់ដោយ២នាក់ប្ដីប្រពន្ធ ម្នាក់ឈ្មោះកៅវ៉ាន់ហយ (Cao Van Hoai) និងម្នាក់ទៀតឈ្មោះវ៉ូង៉ុកត្រាំ (Vo Ngoc Tram)។ នៅពេលបានមួយកំផ្លេហើយ, ពួកគេក៏ចាត់ចែងក្រុមការងារសម្ងាត់ដើម្បីរកទីផ្សារ និងបញ្ចេញលក់ផលិតផលរបស់ខ្លួន។
ឈ្មោះហ្សឿងមិញទាន់ប្រាប់ថាខ្លួនបានលក់កាំភ្លើងប្រភេទនេះចំនួន៨ដើម តម្លៃ១ដើមៗចាប់ពី១លានដុង ដល់៥លាន ៥សែនដុង ឬស្មើនឹង៤២ដុល្លារទៅ២៣១ដុល្លារ។ ក្រៅពីនេះ, ខ្លួនក៏លក់គ្រាប់កាំភ្លើង៥០គ្រាប់នៅខេត្តកៀនយ៉ាង, ខេត្តអានយ៉ាង (An Giang) និងកាម៉ៅ (Ca Mau)។ មានម្ដងនោះ, គាត់ឱ្យកាំភ្លើង១ដើមទៅអតិថិជនទុកជាកាដូអនុស្សាវរីយ៍។
សមត្ថកិច្ចក៏ចុះឆែកឆេរផ្ទះរបស់២នាក់ប្ដីប្រពន្ធឈ្មោះកៅវ៉ាន់ហយ និងវ៉ូង៉ុកត្រាំ និងរកឃើញកាំភ្លើង៧០ដើម និងគ្រាប់កាំភ្លើង២៣៩គ្រាប់។ អ្នកទាំង២ឆ្លើយថានារីឈ្មោះវូធីឌៀបជាមេគំនិតធំជាងគេ និងជាអ្នកចែកចាយកាំភ្លើង និងគ្រាប់កាំភ្លើង។ ពោលគឺនារីវូធីឌៀបម្នាក់នេះប្រៀបដូចជាអ្នកបោះដុំនូវកាំភ្លើង និងគ្រាប់កាំភ្លើងសម្រាប់ឱ្យម៉ូយរបស់ខ្លួនយកទៅលក់បន្ត។
សមត្ថកិច្ចក៏ឈានទៅដល់ការចាប់ខ្លួននារីឈ្មោះវូធីឌៀបនៅទីក្រុងហូជីមិញ និងចាប់ខ្លួនបក្សពួកបីនាក់ជាបុរសនៅខេត្តប៊ិញហ្សឿង (Binh Duong) និងខាញ់ហា (Khanh Hoa)។ សមត្ថកិច្ចឆែកឆេរកន្លែងរោងជាងរបស់នារីឈ្មោះវូធីឌៀបនៅខេត្តញ៉ាត្រាង និងខាញ់ហា និងរកឃើញកាំភ្លើង២២៩ដើម គ្រាប់កាំភ្លើង៦គ្រាប់ និងរបស់របរមួយចំនួនទៀត។
សមត្ថកិច្ចឱ្យដឹងថាកាលពីឆ្នាំ២០២២, វូធីឌៀបបានបោះដុំទៅឱ្យឈ្មោះកៅវ៉ាន់ហយ និងវ៉ូង៉ុកត្រាំនូវកាំភ្លើងចំនួន៤រយដើម, គ្រាប់កាំភ្លើងជ័រ១៣០០គ្រាប់ និងគ្រាប់កាំភ្លើងខ្យល់១៣០០គ្រាប់។ បន្ទាប់ពីទទួលទំនិញបានហើយ ឈ្មោះកៅវ៉ាន់ហយ និងវ៉ូង៉ុកត្រាំក៏លក់កាំភ្លើងបន្តទៅអតិថិជនរបស់ខ្លួនបាន៤០ដើម និងលក់ឱ្យអតិថិជនរបស់នារីឈ្មោះវូធីឌៀបបាន១៩០ដើម៕
ប្រភព៖ Vietnam Express និងប្រភពដទៃទៀត
https://e.vnexpress.net/news/news/woman-gets-9-years-for-gun-running-4643571.html
ចែករំលែកព័តមាននេះ