រាជធានីភ្នំពេញ ៖ លោកឧត្តមសេនីយ៍ទោ អ៊ីវ រិទ្ធ ដែលគេស្គាល់ថា ជាអនុប្រធាននាយកដ្ឋាននគរ បាលព្រហ្មទណ្ឌក្រសួងមហាផ្ទៃ បានធ្វើអត្តឃាតដោយបាញ់សម្លាប់ខ្លួនឯង នៅក្នុងបន្ទប់របស់កូនហើយ…
រាជធានីភ្នំពេញ ៖ លោកឧត្តមសេនីយ៍ទោ អ៊ីវ រិទ្ធ ដែលគេស្គាល់ថា ជាអនុប្រធាននាយកដ្ឋាននគរ បាលព្រហ្មទណ្ឌក្រសួងមហាផ្ទៃ បានធ្វើអត្តឃាតដោយបាញ់សម្លាប់ខ្លួនឯង នៅក្នុងបន្ទប់របស់កូនហើយ បានស្លាប់បាត់បង់ជីវីតទាំងកណ្តាលយប់ ។
ការធ្វើអត្តឃាតនេះ បង្កអោយមានការភ្ញាក់ផ្អើល កាលពីវេលាម៉ោងប្រមាណ១២និង៣០នាទីយប់រំលងអធ្រាត្រ ចូលថ្ងៃទី១៩ ខែសីហា នេះ នៅចំណុចផ្ទះលេខ២៩ ក្នុងបុរីភូមិអរគីដេរ សង្កាត់អូរបែកក្អម ខណ្ឌសែនសុខ រាជធានីភ្នំពេញ ។
ទាក់ទិន ការធ្វើអត្តឃាតនេះ គេពុំដឹងពីមូលហេតុអ្វីឡើយ ។ តែបើតាមព័ត៌មានទម្លាយអោយដឹងថា ដោយសារតែមានទំនាស់ក្នុងគ្រួសារ ។ តាមព័ត៌មានអោយដឹងទៀតថា មុនពេលកើតហេតុ នាយនគរបាលរូប បានត្រឡប់មកពីកម្មវិធី ហើយមានទំនាស់គ្នា ជាមួយភរិយារួចក៏បានឡើងទៅជាន់ទី១ចូលក្នុងបន្ទប់កូនស្រី ហើយបានបាញ់សម្លាប់ខ្លួនឯង១គ្រាប់ នឹងកាំភ្លើងខ្លីតែម្តង។
តាមព័ត៌មានអោយដឹងទៀតថា កន្លងមក នាយនគរបាលរូបនោះតែងមានទំនាស់គ្នាជារឿយៗ ជាមួយភរិយា ហើយធ្លាប់គំរាមចាញ់សម្លាប់ខ្លួនជាច្រើនដងមកហើយ ។ បន្ទប់ពីបាញ់សម្លាប់ខ្លួន នគរបាលមូលដ្ឋាន និង នគរបាលជំនាញក៏បានចុះទៅត្រួតពិនិត្យសពទាំងយប់ ។
តាមការត្រួតពិនិត្យ សមត្ថកិច្ចរកឃើញកាំភ្លើងខ្លីមួយដើម មានគ្រាប់ចំនួន៨គ្រាប់ និងរកឃើញ សំបកគ្រាប់១គ្រាប់ នៅក្បែរសព លោកឧត្តមសេនីយ៍ រូបនោះ។ តាមនគរបាល បានអោយដឹងថា មន្ត្រីនគរបាលរូបនោះបានបាញ់សម្លាប់ខ្លួនឯង នឹងកាំភ្លើង ខ្លីម៉ាកRUGER ចំសៀតការខាងស្តាំធ្លាយមកខាងឆ្វេង ។ បន្ទប់ពីត្រួតពិនិត្យ សពត្រូវបានក្រុមគ្រួសារកំកល់ធ្វើបុណ្យតាមប្រពៃណីនៅលំនៅឋានរបស់ខ្លួន ។
គួរបញ្ជាក់ថា លោកឧត្តមសេនីយ៍ទោ អ៊ីវ រិទ្ធ ជាមន្ត្រីនគរបាលមួយរូប ដែលមានស្នាដៃលេចធ្លោនៅក្នុងការដឹកនាំបង្ការនិងបង្ក្រាបបទល្មើស ។ ការបាត់បង់រូបលោកជាការបាត់បង់នូវធនធាននគរបាលជាតិដែលមានស្នាដៃក្នុងការបម្រើជាតិមាតុភូមិ ។
ចែករំលែកព័តមាននេះ