ជនសង្ស័យ១ក្រុមធ្វើសកម្មភាពមុខផ្ទះប្រជាពលរដ្ឋបានសម្រេច តែគេចមិនផុត
- កំពង់ស្ពឺ
ខេត្តកំពង់ស្ពឺ ៖ ក្រុមជនសង្ស័យចំនួន២នាក់ ត្រូវបានកម្លាំងនគរបាលស្រុកឱរ៉ាល់ ដែលដឹកនាំ
ខេត្តកំពង់ស្ពឺ ៖ ក្រុមជនសង្ស័យចំនួន២នាក់ ត្រូវបានកម្លាំងនគរបាលស្រុកឱរ៉ាល់ ដែលដឹកនាំដោយលោកវរសេនីយ៍ឯក ប៊ុត ប៊ុនធឿន អធិការនគរបាលស្រុកឱរ៉ាល់ឃាត់ខ្លួនបានភ្លាមៗ ខណៈដែលក្រុមជនសង្ស័យទាំង២នាក់ បានធ្វើសកម្មភាពឌុបគ្នាមកលួចយកម៉ូតូពីមុខផ្ទះរបស់ប្រជាពលរដ្ឋ បានហើយព្យាយាមជិះគេចខ្លួន ប៉ុន្តែត្រូវបានលោកអធិការនគរបាលស្រុកបញ្ជាកម្លាំងតាមបណ្តាប៉ុស្តិ៍នគរបាលរដ្ឋបាលឃុំធ្វើការឡោមព័ទ្ធតែម្តង។
លោកវរសេនីយ៍ឯក ប៊ុត ប៊ុនធឿន អធិការនគរបាលស្រុកឱរ៉ាល់បានប្រាប់ឱ្យដឹងថា ក្រុមជនសង្ស័យទាំង២នាក់បានធ្វើសកម្មភាពលួចម៉ូតូប្រជាពលរដ្ឋ កាលពីវេលាម៉ោង៦និង៣៥នាទីព្រឹកថ្ងៃទី១៨ ខែសីហា ឆ្នាំ២០២៣ នៅក្នុងផ្ទះតាមផ្លូវ៤៤ចន្លោះគីឡូម៉ែត្រលេខ៣៦ ទៅលេខ៣៧ស្ថិតនៅភូមិមនោរម្យ ឃុំហោងសំណំ ស្រុកឱរ៉ាល់ ខេត្តកំពង់ស្ពឺ ។
លោកអធិការនគរបាលស្រុកឱរ៉ាល់បានប្រាប់ឱ្យដឹងបន្តថា នៅមុនពេលកើតហេតុ មានករណីចោរកម្ម(លួចម៉ូតូ)មួយកើតឡើង ដែលបង្ករឡើងដោយជនសង្ស័យឈ្មោះ អ៊ី គឹមលេង ភេទប្រុស អាយុ ២៩ឆ្នាំ រស់នៅភូមិមាន់ដប់លើ ឃុំមានជ័យ ស្រុកស្រីសន្ធរ ខេត្តកំពង់ចាម បានធ្វើសកម្មភាពលួចយកម៉ូតូមួយគ្រឿងម៉ាក beat ពណ៌សលាយខៀវ ពាក់ផ្លាកលេខភ្នំពេញ 1JL .7794 ជាកម្មសិទ្ធិ របស់ឈ្មោះ អ៊ុក ខុន ភេទប្រុស អាយុ៥៩ឆ្នាំរស់នៅភូមិឃុំកើតហេតុខាងលើ ។
លោកអធិការបានឱ្យដឹងបន្តថា ក្រោយទទួលបានព័ត៌មានខាងលើភ្លាមៗ កម្លាំងរបស់អធិការដ្ឋាននគរបាលស្រុកឱរ៉ាល់ ដែលដឹកនាំដោយរូបលោកផ្ទាល់ រួមជាមួយកម្លាំងប៉ុស្តិ៍នគរបាលរដ្ឋបាលហោងសំណំ ធ្វើការដេញស្ទាក់ចាប់បានជនសង្ស័យខាងលើ និងម៉ូតូរបស់ជនរងគ្រោះ យកមកកាន់អធិការដ្ឋាននគរបាលស្រុកឱរ៉ាល់ដើម្បីធ្វើការសាកសួរ ដោយជនសង្ស័យបានប្រាប់ថា បក្ខពួកខ្លួនមានម្នាក់ទៀតដែលកំពុងជិះម៉ូតូមួយគ្រឿងទៀតគេចខ្លួន។
លោកអធិការនគរបាលស្រុកឱរ៉ាល់បានឱ្យដឹងបន្តទៀតថា ភ្លាមៗនោះកំលាំងរបស់អធិកាដ្ឋាន ដែលដឹកនាំដោយលោកអធិការផ្ទាល់ ធ្វើការស្ទាក់ចាប់បានជនសង្ស័យម្នាក់ទៀតឈ្មោះ ភាព បញ្ញា ភេទប្រុស អាយុ១៥ឆ្នាំ រស់នៅភូមិមាន់ដប់ក្រោម ឃុំមានជ័យ ស្រុកស្រីសន្ធរ ខេត្តកំពង់ចាម កំពុងជិះម៉ូតូ១គ្រឿងម៉ាកហុងដា ធុនសេ១២៥ ស៊េរីឆ្នាំ២០១៥ ដែលជាមធ្យោបាយជិះឌុបគ្នាធ្វើសកម្មភាពលួច នៅចំណុចតាមផ្លូវ៤៤ ចន្លោះបង្គោលគីឡូម៉ែត្រ៣៣ទៅលេខ៣៤ ស្ថិតនៅក្នុងភូមិតាំងស្រឹង ឃុំសង្កែសាទប ស្រុកឱរ៉ាល់ ខេត្តកំពង់ស្ពឺ។
លោកវរសេនីយ៍ឯក ប៊ុត ប៊ុនធឿន អធិការនគរបាលស្រុកឱរ៉ាល់បានបញ្ជាក់ទៀតថា ក្រោយពេលឃាត់ខ្លួនក្រុមជនសង្ស័យទាំង០២នាក់ខាងលើ សមត្ថកិច្ចក៏បានដកហូតសម្ភារៈនិងវត្ថុតាងដូចដូចជា ១-ម៉ូតូចំនួន០២គ្រឿង ក្នុងនោះម៉ូតូមួយគ្រឿងម៉ាកហុងដា ធុនសេ១២៥ ពណ៌ខ្មៅ ស៊េរីឆ្នាំ២០១៥ ពាក់ស្លាក់លេខ កំពង់ចាម 1S-8224 (ម៉ូតូជនសង្ស័យ) និងម៉ូតូមួយគ្រឿងម៉ាកប៊ីត ពណ៌ខៀវលាយសរ ស៊េរីឆ្នាំ២០២២ ពាក់ស្លាកលេខ ភ្នំពេញ 1JL-7794, ២-អត្តសញ្ញាណប័ណ្ណចំនួន០៨ សន្លឹក ខ្មែរចំនួន០៧សន្លឹកនិងថៃចំនួន០១សន្លឹក អត្តសញ្ញាណប័ណ្ណជនសង្ស័យចំនួន០១សន្លឹក ឈ្មោះ អ៊ី គឹមលេង ។
៣-ប័ណ្ណចាក់វ៉ាក់សាំងកូវីដ.១៩ ចំនួន០១សន្លឹក ឈ្មោះ អ៊ី គឹមលេង, ៤-កាតធានាគាវីងចំនួន០១សន្លឹក ប័ណ្ណព័ត៌មានចំនួន០១សន្លឹក, ៥-កូនកាបូបដៃចំនួន២កាបូប, ៦-ខ្សែកាបូបចំនួន០២ខ្សែកាបូបយួរចំនួន០១និងខ្សែស្ពាយចំនួន១, ៧-ពោះវៀនម៉ូតូចំនួន០២, ៨-បំពង់ក្រែមចំនួន០២បំពង់,
៩-ប្រេងលាបក្លៀកចំនួន០១ដប និងម្សៅលាបមុខចំនួន០១ប្រអប់ ,១០-ចិញ្ចៀនត្បូងលោហធាតុពណ៌ក្រហមចំនួន០១វង់ និងខ្សែដៃដាំត្បូងលោហធាតុពណ៌ក្រហមចំនួន ០១ខ្សែ, ១១-ប្រាក់រៀលចំនួន ១០០០០រៀល(មួយម៉ឺនរៀល), ១២-កញ្ចប់បារីចំនួន០១និងបារីចំនួន០៥ដើម, ១៣-ដែកកេះចំនួន០៤ដើម, ១៤-កូនសោកុងតាក់ម៉ូតូម៉ាកហុងដាចំនួន០២, ១៥-កូនសោដោះបាឡុងលេខ១៤ចំនួន០១ដើម និង១៦-ស្កុតមុខពីរចំនួន០២ដុំ ។
បច្ចុប្បន្ន ក្រុមជនសង្ស័យ យកមកអធិការដ្ឋាននគរបាលស្រុកឱរ៉ាល់ ដើម្បីកសាងសំណុំរឿងបញ្ជូនទៅកាន់ការិយាល័យជំនាញនៃស្នងការដ្ឋាននគរបាលខេត្តកំពង់ស្ពឺ ចាត់ការបន្តតាមផ្លូវច្បាប់។
បើតាមចម្លើយសារភាពរបស់ជនសង្ស័យទាំងពីរនាក់ខាងលើបានបំភ្លឺថា ខ្លួនបានធ្វើសកម្មភាពលួចម៉ូតូ០២លើកមកហើយ បានម៉ូតូចំនួន០២គ្រឿង និងលួចកាបូបលុយ០១លើកកាលពីថ្ងៃទី១៧ ខែសីហា ឆ្នាំ២០២៣នៅក្នុងឃុំព្នាយ ស្រុកសំរោងទង បានលុយចំនួន៨ម៉ឺនរៀល។
ចំណែកម៉ូតូជនរងគ្រោះ ត្រូវបានលោកអធិការនគរបាលស្រុកឱរ៉ាល់បានប្រគល់ជូនម្ចាស់យកទៅប្រើប្រាស់វិញហើយ៕
ចែករំលែកព័តមាននេះ