ខេត្តបាត់ដំបង ៖ សមត្ថកិច្ចជំនាញនៃស្នងការដ្ឋានខេត្ត បានឆ្មក់ចូលឆែកឆេរលំនៅឋានរបស់ឈ្មួញចែកចាយថ្នាំញៀនមួយកន្លែងកាលពីវេលាម៉ោង១០ព្រឹកថ្ងៃទី១២ ឧសភា ២០១១ នៅចំណុចក្រុមទី៤ ភូមិរំចេក៣ សង្កាត់រតនៈ ក្រុងបាត់ដំបង ។ កិច្ចប្រតិបត្តិការនេះសមត្ថកិច្ចបានរកឃើញថ្នាំញៀនប្រភេទមេតំហ្វេតាមីន២៣២គ្រាប់
ខេត្តបាត់ដំបង ៖ សមត្ថកិច្ចជំនាញនៃស្នងការដ្ឋានខេត្ត បានឆ្មក់ចូលឆែកឆេរលំនៅឋានរបស់ឈ្មួញចែកចាយថ្នាំញៀនមួយកន្លែងកាលពីវេលាម៉ោង១០ព្រឹកថ្ងៃទី១២ ឧសភា ២០១១ នៅចំណុចក្រុមទី៤ ភូមិរំចេក៣ សង្កាត់រតនៈ ក្រុងបាត់ដំបង ។ កិច្ចប្រតិបត្តិការនេះសមត្ថកិច្ចបានរកឃើញថ្នាំញៀនប្រភេទមេតំហ្វេតាមីន២៣២គ្រាប់ និងប្រភេទម៉ាទឹកកក៨កញ្ចប់តូច ហើយម្ចាស់ផ្ទះត្រូវបានឃាត់ខ្លួន។
លោកចៅ សុវង្ស នាយការិយាល័យនគរបាលប្រឆាំងគ្រឿងញៀនបានថ្លែងថា កិច្ចប្រតិបត្តិការនេះធ្វើឡើងក្រោយពីមានការស៊ើបអង្កេតក្នុងរយៈពេលច្រើនខែកន្លងមក ហើយជនសង្ស័យមួយចំនួនដែលបានឃាត់ខ្លួនកន្លងមក បានប្រាប់អំពីសកម្មភាពចែកចាយថ្នាំញៀនរបស់ម្ចាស់ផ្ទះខាងលើនេះ ដែលមានឈ្មោះប៊ុន សួរលាងស៊ុង អាយុ៤០ឆ្នាំ និងប្រពន្ធឈ្មោះប៊ុនឡឹក អាយុ៤០ឆ្នាំ ។
លោកចៅ សុវង្ស បានបញ្ជាក់ថា កិច្ចប្រតិបត្តិការដែលមានការចូលរួមពីសមត្ថកិច្ច និងអាជ្ញាធរមូលដ្ឋានផងនេះគឺក្រោមការបញ្ជាផ្ទាល់ពីលោកឧត្តមសេនីយ៍ត្រីសរ ថេត ស្នងការខេត្ត និងលោកនួន សាន តំណាងអយ្យការអមសាលាដំបូងខេត្ត ។ ក្រៅពីការរកឃើញថ្នាំញៀនប្រភេទមេតំហ្វេតាមីនចំនួន២៣២គ្រាប់ និងម៉ាទឹកកកចំនួន៨កញ្ចប់តូច យើងក៏បានឃាត់ខ្លួនបុរសម្ចាស់ផ្ទះឈ្មោះប៊ុន សួរលាងស៊ុង សាកសួរផងដែរ ។ លោកនិយាយថា ជននេះជាមុខសញ្ញាចែកចាយគ្រឿងញៀនយ៉ាងសកម្មបំផុតដែលសមត្ថកិច្ចរបស់លោកតាមដានសកម្មភាពរបស់គេច្រើនខែមកហើយ។ ក្រោយពីត្រូវឃាត់ខ្លួនមកកាន់ការិយាល័យជំនាញជនសង្ស័យឈ្មោះប៊ុន សួរលាងស៊ុង បានសារភាពទាំងអស់អំពីសកម្មភាពរកស៊ីល្មើសច្បាប់របស់ខ្លួននាពេលកន្លងមក៕
ចែករំលែកព័តមាននេះ