ខេត្តកំពង់ស្ពឺ ៖ ជនសង្ស័យចំនួន០២នាក់ ត្រូវបានឃាត់ខ្លួនបន្តបន្ទាប់ ខណៈដែលខ្ចីម៉ូតូអ្នកជិតខាងជិះឌុបមិត្តភក្តិហើយប្រុងយកទៅលក់ ម្ចាស់ម៉ូតូតាមទានឃាត់ប្រគល់ឱ្យនគរបាលតែម្តង។ ការឃាត់ខ្លួនក្រុមជនសង្ស័យខាងលើបានធ្វើឡើងកាលពីថ្ងៃទី២២ ខែកក្កដា ឆ្នាំ២០២៥ នៅក្នុងភូមិទី២…
ខេត្តកំពង់ស្ពឺ ៖ ជនសង្ស័យចំនួន០២នាក់ ត្រូវបានឃាត់ខ្លួនបន្តបន្ទាប់ ខណៈដែលខ្ចីម៉ូតូអ្នកជិតខាងជិះឌុបមិត្តភក្តិហើយប្រុងយកទៅលក់ ម្ចាស់ម៉ូតូតាមទានឃាត់ប្រគល់ឱ្យនគរបាលតែម្តង។ ការឃាត់ខ្លួនក្រុមជនសង្ស័យខាងលើបានធ្វើឡើងកាលពីថ្ងៃទី២២ ខែកក្កដា ឆ្នាំ២០២៥ នៅក្នុងភូមិទី២ ឃុំត្រែងត្រយឹង ស្រុកភ្នំស្រួច ខេត្តកំពង់ស្ពឺ។
នគរបាលស្រុកភ្នំស្រួចបាននិយាយឱ្យដឹងថា កាលពីវេលាម៉ោង១០ព្រឹកថ្ងៃទី២២ ខែកក្កដា ឆ្នាំ២០២៥ សមត្ថកិច្ចនគរបាលបានទទួលជនសង្ស័យ០១នាក់ មានឈ្មោះ វិចិត្រ សៀងហ័ង ភេទប្រុស អាយុ១៧ឆ្នាំមុខរបរមិនពិតប្រាកដ រស់នៅភូមិទី៥ ឃុំត្រែងត្រយឹង ស្រុកភ្នំស្រួច ខេត្តកំពង់ស្ពឺ និងវត្ថុតាងម៉ូតូ០១ គ្រឿង ម៉ាកហុងដា សេ១២៥ ពណ៌ខ្មៅ ស៊េរីឆ្នាំ២០១៨ គ្មានស្លាកលេខ ពីឈ្មោះ ដោក សំអូន ភេទប្រុស អាយុ៣៩ឆ្នាំ រស់នៅក្នុងភូមិទី២ ឃុំត្រែងត្រយឹង ស្រុកភ្នំស្រួច ពាក់ពន្ធ័ករណីរំលោភទំនុកចិត្ត។
នគរបាលស្រុកភ្នំស្រួចបាននិយាយបន្តថា នៅមុនពេលកើតហេតុ កាលពីវេលាម៉ោង០៣និង៣០នាទីរសៀល ថ្ងៃទី២១ ខែកក្កដា ឆ្នាំ២០២៥ នៅចំនុចភូមិទី៤ ឃុំត្រែងត្រយឹង ស្រុកភ្នំស្រួច ខេត្តកំពង់ស្ពឺ ឈ្មោះ សៀងហ័ងបានខ្ចីម៉ូតូរបស់ជនរងគ្រោះខាងលើមួយភ្លែតទៅក្រៅ ហើយក៏បាត់មិនឃើញត្រឡប់មកវិញយូរទៅៗ ម្ចាស់ក៏តាមរកជួបក៏ឃាត់នាំមកប្រគល់ឱ្យនគរបាលតែម្តង។
នគរបាលស្រុកភ្នំស្រួចបានបន្តថា ក្រោយធ្វើការសាកសួរឈ្មោះវិចិត្រ សៀងហ័ង បានឆ្លើយសារភាពថា ខ្លួនពិតជាខ្ចីម៉ូតូខាងលើពិតប្រាកដមែន រួមជាមួយបក្ខពួក០១នាក់ទៀតដែលមានឈ្មោះ អ៊ុក តារាវិសាល ភេទប្រុស អាយុ២២ ឆ្នាំមុខរបរមិនពិតប្រាកដ រស់នៅភូមិទី៥ ឃុំត្រែងត្រយឹង ស្រុកភ្នំស្រួច គោលបំណងដើម្បីយកទៅលក់។ បន្ទាប់ពីសួរនាំជនសង្ស័យខាងលើរួចហើយ កំណត់មុខសញ្ញាបាន កម្លាំងនគរបាលបន្តឃាត់ខ្លួនឈ្មោះ អ៊ុក តារាវិសាល នៅចំណុចក្នុងផ្ទះ ស្ថិតនៅក្នុងភូមិទី៥ ឃុំត្រឺងត្រយឹង ស្រុកភ្នំស្រួច តែម្តង ។
នគរបាលស្រុកភ្នំស្រួចបានបញ្ជាក់ថា ក្រោយធ្វើការឃាត់ខ្លួនក្រុមជនសង្ស័យខាងលើសមត្ថកិច្ចបានកសាងសំណុំរឿង បញ្ជូនជនសង្ស័យទាំង០២ រួមជាមួយវត្ថុតាង ទៅកាន់ស្នងការដ្ឋាននគរបាលខេត្តកំពង់ស្ពឺ ដើម្បីអនុវត្តបន្តតាមនិតិវិធី។ ចំណែកវត្ថុតាង ម៉ូតូខាងលើ នគរបាលបានប្រគល់ជូនជនរងគ្រោះយកទៅប្រើប្រាស់វិញហើយ៕
ចែករំលែកព័តមាននេះ