ខេត្តកណ្តាល ៖ អនុវត្តតាមបទបញ្ជាពីលោកឧត្តមសេនីយ៍ទោ ឈឿន សុចិត្ត ស្នងការខេត្តកណ្ដាល លោកវរសេនីយ៍ឯក ព្រំ សំណាង អធិការនគរបាលស្រុកកៀនស្វាយ…
ខេត្តកណ្តាល ៖ អនុវត្តតាមបទបញ្ជាពីលោកឧត្តមសេនីយ៍ទោ ឈឿន សុចិត្ត ស្នងការខេត្តកណ្ដាល លោកវរសេនីយ៍ឯក ព្រំ សំណាង អធិការនគរបាលស្រុកកៀនស្វាយ បានធ្វើការស្រាវជ្រាវក្រោយទទួលបានពាក្យបណ្ដឹងពីអាណាព្យាបាលសិស្សរងគ្រោះ ករណីលោកគ្រូម្នាក់គំរាមបង្ហោះរូបភាពសិស្សស្រី។ សមត្ថកិច្ចក៏បានឃាត់ខ្លួនលោកគ្រូរូបនេះកាលពីថ្ងៃទី២១ ខែកក្កដា ឆ្នាំ២០២៥ ។
លោកវរសេនីយ៍ឯក ព្រំ សំណាង អធិការស្រុកកៀនស្វាយ បានឲ្យដឹងថា ជនសង្ស័យមានឈ្មោះ ហឿន រ៉ាវី ភេទប្រុស អាយុ៣៨ ឆ្នាំ ជនជាតិខ្មែរ គ្រូបង្រៀននៅវិទ្យាល័យសិរីដីដុះ ថ្នាក់ទី៩ និង ទី១០ ផ្នែកគណិតវិទ្យា មានទីលំនៅភូមិកំពង់ស្វាយ២ ឃុំកំពង់ស្វាយ ស្រុកកៀនស្វាយ ខេត្តកណ្តាល។ ចំណែកជនរងគ្រោះមានឈ្មោះ ជ.ម.ន.ហ ភេទស្រី អាយុ ១៥ឆ្នាំ ជនជាតិខ្មែរ មុខរបរសិស្ស ថ្នាក់ទី ៩ ។
បើយោងតាមការបំភ្លឺកូនសិស្សឈ្មោះ ជ.ម.ន.ហ បានឲ្យដឹងថា ជាធម្មតាខ្លួនតែងតែមានការរាយការណ៍ជូនលោកគ្រូជាធម្មតា តាមរយៈតេឡេក្រាម ឬតាមឆាតពីការរៀនសូត្ររបស់សិស្សក្នុងថ្នាក់ ព្រោះយុវតីរងគ្រោះ គឺជាប្រធានថ្នាក់។ លុះដល់ពេលប្រឡងឌីផ្លូម (មធ្យមសិក្សាបឋមភូមិថ្នាក់ទី៩) រួចយុវតីរងគ្រោះបានឆាតសួរលោកគ្រូ ហឿន រ៉ាវី ពីលទ្ធផលប្រឡង។ ពេលនោះលោកគ្រូ បានប្រាប់ថា ឲ្យទៅមើលនៅផ្ទះលោកគ្រូ។ យុវតីរងគ្រោះ ក៏បានទៅដល់ផ្ទះលោកគ្រូ ឃើញបានពិន្ទុមធ្យម។ ពេលនោះ លោកគ្រូបានប្រាប់ថា ៖ ដាក់លុយយកពិន្ទុល្អ តែយុវតីរងគ្រោះ មិនបានបង់លុយឡើយ ក៏ត្រឡប់មកផ្ទះវិញ។ ស្រាប់តែលោកគ្រូ បានឆាតទៅជនរងគ្រោះឲ្យថតរូបបែបស៊ិចស៊ីឲ្យលោកគ្រូមើល បើចង់បានពិន្ទុល្អ។ ពេលនោះ ក៏បានថតរូបស្លៀកពាក់រ៉ូបពណ៌ស ហើយផ្ញើឲ្យលោកគ្រូមើល។ លោកគ្រូបានប្រាប់ថា ឲ្យស្លៀកពាក់បែបស៊ិចស៊ីវិញ យុវតីរងគ្រោះប្រាប់ថា អត់មានខោអាវនឹងទេ។ ក្រោយមក យុវតីរងគ្រោះ បានថតសារទាំងនោះផ្ញើទៅសួរមិត្តភក្ដិពីអត្ថន័យ ដែលខ្លួនឆាតជាមួយលោកគ្រូ ព្រោះចង់ដឹងថា តើមានមិត្តភក្ដិរូបណា ត្រូវលោកគ្រូធ្វើអ៊ីចឹង ឬអត់ ? ទើបមានគណនីឈ្មោះ (Bunthon Kanha) យកទៅផុសបន្ត ទើបបែកធ្លាយករណីខាងលើនេះឡើង ។
បើយោងតាមការស្រាវជ្រាវរបស់សមត្ថកិច្ចជំនាញស្រុកកៀនស្វាយ បានបញ្ជាក់ថា ជនសង្ស័យដែលជាលោកគ្រូគណិតវិទ្យា ពិតជាបានប្រព្រឹត្តអំពើដូចខាងលើទៅលើសិស្សស្រីមែន ហើយក៏ធ្លាប់ប្រព្រឹត្តអំពើបែបនេះដាក់លើសិស្សស្រីផ្សេងទៀតដែរ។ ផ្នែកជំនាញកំពុងបន្តស្រាវជ្រាវលើករណីខាងលើ ។
បច្ចុប្បន្ន ជនសង្ស័យជាគ្រូគណិតវិទ្យា កំពុងសួរនាំនៅអធិការដ្ឋានស្រុកកៀនស្វាយ និងបញ្ជូនទៅកាន់តុលាការដើម្បីអនុវត្តតាមនីតិវិធី ៕
ចែករំលែកព័តមាននេះ