រាជធានីភ្នំពេញ ៖ បុរសអ្នកលក់ដូរម្នាក់បានពឹងបុរសម្នាក់ទៀតដែលជាមិត្តភក្ដិឲ្យជួយយកម៉ូតូទៅប្រគល់ឲ្យប្រពន្ធរបស់ខ្លួនជិះទៅផ្ទះ ស្រាប់តែមិត្តភក្ដិរូបនោះសុីដាច់រួចគេចខ្លួនបាត់ ដោយមិនបានយកម៉ូតូនោះទៅប្រគល់ឲ្យប្រពន្ធបុរសអ្នកលក់ដូរនោះឡើយ ។ លុះរយៈពេលជាង១០ថ្ងៃក្រោយមក ទើបម្ចាស់ម៉ូតូប្រទះឃើញ ជនសង្ស័យនោះដោយចៃដន្យរួចក៏បានធ្វើការឃាត់ខ្លួន ប្រគល់ឲ្យនគរបាលធ្វើការសាកសួរ ។ ខណៈនោះជនសង្ស័យខាងលើបានប្រាប់ថា មានមិត្តភក្ដិរបស់ខ្លួនម្នាក់ផ្សេងទៀតខ្ចីម៉ូតូនោះជិតបន្ត រួចបោកយកទៅបាត់ហើយ ប៉ុន្តែម្ចាស់ម៉ូតូសង្ស័យថា ជននោះបានយកម៉ូតូគាត់ទៅបញ្ចាំ ។
ហេតុការណ៍នោះបានកើតឡើងកាលពីថ្ងៃទី១៣ ខែកក្កដា ឆ្នាំ២០២៥ នៅក្នុងភូមិពូនភ្នំ ឃុំត្រពាំងសាប ស្រុកបាទី ខេត្តតាកែវ ។
ជនសង្ស័យខាងលើនោះឈ្មោះបូ ស័ក អាយុ៤០ឆ្នាំ ស្នាក់នៅភូមិត្រពាំងពោធិ៍ សង្កាត់ចោមចៅទី៣ ខណ្ឌពោធិ៍សែនជ័យ រាជធានីភ្នំពេញ ។ដោយឡែកបុរសជាម្ចាស់ម៉ូតូឈ្មោះវណ្ណា ចិត្ត្រា អាយុ៤០ឆ្នាំ មុខរបរលក់ដូរ មានទីលំនៅភូមិពូនភ្នំ ឃុំត្រពាំងសាប ស្រុកបាទី ខេត្តតាកែវ ។
នគរបាលបានប្រាប់ឲ្យដឹងថា កាលពី១៣ ខែកក្កដា ឆ្នាំ២០២៥ បុរសអ្នកលក់ដូររូបនោះបានជិះម៉ូតូម៉ូតូ១គ្រឿងម៉ាកហុងដាឌ្រីមសេ១២៥ស៊េរីឆ្នាំ២០២៥ ពណ៍ខ្មៅ ពាក់ស្លាកលេខភ្នំពេញ1LG-4205 ដឹកជនសង្ស័យចេញពីផ្សារជម្ពូវ័ន សង្កាត់ចោមចៅទី៣ ខណ្ឌពោធិ៍សែនជ័យ រាជធានីភ្នំពេញ ទៅកាន់ផ្ទះរបស់ខ្លួននៅភូមិពូនភ្នំ ឃុំត្រពាំងសាប ស្រុកបាទី ខេត្តតាកែវ ។ ក្រោយមកដោយសារតែជាប់រវល់ការងារ នៅផ្ទះ បុរសអ្នកលក់ដូរនោះ ក៏បានពឹងឲ្យជនសង្ស័យដែលជាមិត្តភក្ដិម្នាក់នោះ ជួយជិះម៉ូតូយកទៅប្រគល់ឲ្យប្រពន្ធគាត់ដែលកំពុងលក់ដូរនៅផ្សារជម្ពូវ័ន ដើម្បីឲ្យប្រពន្ធគាត់ជិះទៅផ្ទះនៅភូមិពូនភ្នំ ឃុំត្រពាំងសាប ស្រុកបាទី ខេត្តតាកែវវិញ ។
នគរបាលបានប្រាប់ឲ្យដឹងទៀតថា ពេលនោះជនសង្ស័យក៏បានជិះម៉ូតូខាងលើចេញទៅបាត់ពុំបានយកទៅប្រគល់ឲ្យប្រពន្ធបុរសឈ្មោះវណ្ណា ចិត្ត្រា នោះឡើយ មិនតែប៉ុណ្ណោះបានគេចខ្លួនបាត់ថែមទៀត ។ លុះ១ថ្ងៃក្រោយមកគឺនៅថ្ងៃទី១៤ ខែកក្កដា ឆ្នាំ២០២៥ បុរសម្ចាស់ម៉ូតូក៏បានដាក់ពាក្យបណ្ដឹងនៅប៉ុស្តិ៍នគរបាលចោមចៅទី៣ ខណ្ឌពោធិ៍សែនជ័យឲ្យជួយអន្តរាគមន៍ ។
នគរបាលបានបញ្ជាក់ប្រាប់បន្ថែមទៀតថា រហូតដល់ព្រឹកថ្ងៃទី២៤ ខែកក្កដា ឆ្នាំ២០២៥ ទើបជនរងគ្រោះប្រទះឃើញជនសង្ស័យនៅតាមផ្លូវជាតិលេខ៤ ចំណុចមុខវត្តជម្ពូវ័ន ក៏ឃាត់ខ្លួនឲ្យសមត្ថកិច្ចនគរបាលប៉ុស្តិ៍ចោមចៅទី៣សួរនាំ ។ បន្ទាប់មកនគរបាលប៉ុស្តិ៍ចោមចៅទី៣ បានប្រគល់ជនសង្ស័យនោះបន្តទៅឲ្យនគរបាលស្រុកបាទី ខេត្តតាកែវដើម្បីចាត់ការបន្ត ៕
ចែករំលែកព័តមាននេះ