រាជធានីភ្នំពេញ ៖ ក្រុមចោរឆក់ ដែលទើបតែពេញវ័យ ០៣នាក់ ក្នុងចំណោមបក្ខពួក០៧នាក់ ត្រូវបានកម្លាំងកងរាជអាវុធហត្ថរាជធានីភ្នំពេញ ចាប់ឃាត់ខ្លួន បញ្ជូនទៅតុលាការ ដើម្បីផ្តន្ទាទោសតាមច្បាប់…
រាជធានីភ្នំពេញ ៖ ក្រុមចោរឆក់ ដែលទើបតែពេញវ័យ ០៣នាក់ ក្នុងចំណោមបក្ខពួក០៧នាក់ ត្រូវបានកម្លាំងកងរាជអាវុធហត្ថរាជធានីភ្នំពេញ ចាប់ឃាត់ខ្លួន បញ្ជូនទៅតុលាការ ដើម្បីផ្តន្ទាទោសតាមច្បាប់ ។
ក្រុមចោរឆក់ ទាំង០៣នាក់ រួមមាន ៖
១. ឈ្មោះ ផាត មករា (ហៅអាពេជ្រ) អាយុ១៨ឆ្នាំ
២. ឈ្មោះ ពេជ្រ សីហា អាយុ១៨ឆ្នាំ
៣. ឈ្មោះ សំ វិសាល (ហៅសាន់) អាយុ១៨ឆ្នាំ ។
បើយោងតាមកងរាជអាវុធហត្ថរាជធានីភ្នំពេញ បានអោយដឹងថា ក្រុមចោរឆក់ខាងលើនេះ តែងតែធ្វើសកម្មភាពឆក់យ៉ាងសកម្ម ក្នុងភូមិសាស្ត្ររាជធានីភ្នំពេញ, ខេត្តកណ្តាល និងខេត្តកំពង់ស្ពឺ ត្រូវបានកម្លាំងជំនាញមូលដ្ឋានអាវុធហត្ថខណ្ឌកំបូល សហការជាមួយកម្លាំងជំនាញការិយាល័យប្រឆាំងបទល្មើស ព្រហ្មទណ្ឌ កងរាជអាវុធហត្ថរាជធានីភ្នំពេញ ធ្វើការឃាត់ខ្លួនជាបន្តបន្ទាប់ កាលពីថ្ងៃទី១៥ ខែសីហា ឆ្នាំ២០២៣ ខណៈពួកគេរៀបគម្រោងចេញឆក់ទូរសព្ទ និងកាបូប ក្នុងភូមិសាស្ត្រ រាជធានីភ្នំពេញ ។
តាមចម្លើយសារភាពរបស់ជនសង្ស័យទាំង០៣នាក់ បានឲ្យដឹងដូចៗគ្នាថា កន្លងមកពួកខ្លួនរួមជាមួយបក្ខពួក ០៤នាក់ផ្សេងទៀត មានឈ្មោះ អាចូវ, អាចាក់ជ្រូក, អាឆាយ និង អាស៊ុយទ្រី ធ្លាប់បានធ្វើសកម្មភាពឆក់ទូរសព្ទ និងកាបូបជាច្រើនដងមកហើយ ទាំងនៅរាជធានីភ្នំពេញ ខេត្តកណ្ដាល និងខេត្តកំពង់ស្ពឺ រួមមាន ដូចជា ៖ ឆក់នៅម្តុំផ្សារជម្ពូវ័ន្ត, ឆក់នៅចំណុចមុខក្លោងទ្វារបុរីសែនមនោរម្យ, ឆក់នៅចំណុចផ្សារបែកចាន ខេត្តកណ្តាល, ឆក់នៅចំណុចផ្សារថ្នល់ទទឹង ខេត្តកំពង់ស្ពឺ, ឆក់នៅផ្លូវជាតិលេខ៣ ក្នុងភូមិសាស្ត្រខេត្ដកណ្តាល, ឆក់នៅចំណុចមុខព្រលានយន្តហោះអន្តជាតិភ្នំពេញ, ឆក់នៅចំណុចស្ពានអាកាសផ្សារដីហុយ, ឆក់នៅចំណុចភ្នំបាសិត ភូមិសាស្ត្រខេត្តកណ្តាល, ឆក់នៅចំណុចជិតស្ពានស្ទឹងមានជ័យ, ឆក់នៅចំណុចផ្សារដើមគរ, ឆក់នៅចំណុចមហាវិថីឈ្នះៗ, ឆក់នៅចំណុចផ្សារឈូកមាស, ឆក់នៅចំណុចផ្លូវវេងស្រេង, ឆក់នៅចំណុចទីរួមស្រុកអង្គស្នូល ខេត្តកណ្តាល, និងចុងក្រោយនេះ កំពុងនាំគ្នារៀបចំចេញឆក់ក្នុងភូមិសាស្ត្រ រាជធានីភ្នំពេញ ក៏ត្រូវបានសមត្ថកិច្ចអាវុធហត្ថចាប់ខ្លួនតែម្តង។ មុនពេលចេញឆក់ម្ដងៗ ពួកខ្លួនតែងតែប្រមូលផ្ដុំគ្នាប្រើប្រាស់សារធាតុញៀនជាមុន ទើបចេញធ្វើសកម្មភាព។ តាមការទទួលព័ត៌មាន ក៏នៅមានទីតាំងជាច្រើនផ្សេងទៀត ដែលក្រុមទាំងនេះបានចេញធ្វើសកម្មភាពឆក់ ផងដែរ ។
បច្ចុប្បន្ន ជនសង្ស័យទាំង០៣នាក់ខាងលើ ត្រូវបានកម្លាំងជំនាញការិយាល័យប្រឆាំងបទល្មើសព្រហ្មទណ្ឌ នៃកងរាជអាវុធហត្ថរាជធានីភ្នំពេញ កសាងសុំណុំរឿងបញ្ជូនទៅតុលាការ ដើម្បីចាត់ការតាមនីតិវិធីច្បាប់ ចំណែកឯបក្ខពួក០៤នាក់ទៀត ដែលរត់គេចខ្លួន សមត្ថកិច្ចជំនាញ អាវុធហត្ថរាជធានីភ្នំពេញ កំពុងស្រាវជ្រាវឃាត់ខ្លួនបន្ត (មិនឲ្យនរណាម្នាក់រួចខ្លួនឡើយ យកល្អ ចូលសារភាពទោស) ៕
ចែករំលែកព័តមាននេះ