អ្នកបើកបរឡានដឹកទំនិញងោកមួយភាំង បង្កគ្រោះផ្អើលផ្លូវជាតិលេខ៣
- ភ្នំពេញ
រាជធានីភ្នំពេញ ៖ រថយន្តទ្រុងដឹកទំនិញ១គ្រឿងបានរេចង្កូតឡើងទៅលើខឿនផ្លូវ រួចបុ.ករះរថយន្ត
រាជធានីភ្នំពេញ ៖ រថយន្តទ្រុងដឹកទំនិញ១គ្រឿងបានរេចង្កូតឡើងទៅលើខឿនផ្លូវ រួចបុ.ករះរថយន្តឡិចស៊ីសរបស់សាលាបង្រៀនបើកបរ និងម៉ូតូ២គ្រឿង ព្រមទាំងផ្ទះលក់គ្រឿងបរិក្ខាអគ្គិសនី និងសំយ៉ាបផ្ទះលក់នំបញ្ចុកស្ថិតនៅជាប់គ្នានោះ បណ្ដាលឲ្យរងការខូចខាតនិងកំពប់សម្លនំបញ្ចុកអស់១ឆ្នាំង បន្ទាប់មកអ្នកបើកបររថយន្តខាងលើត្រូវបានពលរដ្ឋឃាត់ខ្លួនបានរួចប្រគល់ឲ្យនគរបាលនាំទៅសាកសួរ។
ហេតុការណ៍ខាងលើនេះកើតឡើង កាលពីវេលាម៉ោង១១និង៣០នាទីព្រឹកថ្ងៃទី១៧ ខែសីហា ឆ្នាំ២០២៣ នៅតាមផ្លូវជាតិលេខ៣ ស្ថិតនៅក្នុងភូមិព្រៃព្រីងត្បូង២ សង្កាត់ចោមចៅទី៣ ខណ្ឌពោធិ៍សែនជ័យ រាជធានីភ្នំពេញ។
តាមប្រភពព័ត៌មានបានឲ្យដឹងថា នៅមុនកើតហេតុរថយន្តទ្រុងខាងលើម៉ាក ISUZU ពណ៌ស ពាក់ស្លាកលេខ ភ្នំពេញ 2BE-6448 ដឹកទំនិញបើកបរដោយបុរសម្នាក់ រួមដំណើរជាមួយដោយបុរសម្នាក់ទៀតដែលជាព្រូ បានបើកបរធ្វើដំណើរក្នុងទិសដៅពីជើងទៅត្បូង ។ លុះពេលទៅដល់ត្រង់ចំណុចកើតហេតុ ស្រាប់តែរេចង្កូតឡើងខឿនផ្លូវបុករះរថយន្តម៉ាកឡិចស៊ីស RX300 ពណ៌ស្ករ ១គ្រឿងពាក់ស្លាកលេខ ភ្នំពេញ 2T-0337 ជារថយន្តរបស់សាលាបង្រៀនបើកបរ ៨ មិនា ចតនៅមុខផ្ទះ។ រួចជ្រុលទៅបន្តទៅ ម៉ូតូម៉ាកហុងដាស្គូពី ពណ៌ក្រហម ពាក់ស្លាកលេខ ភ្នំពេញ 1HP-4431 និងម៉ូតូ១គ្រឿងទៀត ម៉ាកHonda FTR ពណ៌ស ពាក់ស្លាកលេខ ភ្នំពេញ 1GT-0981 ព្រមទាំងផ្ទះលក់គ្រឿងសម្ភារៈបរិក្ខាអគ្គិសនី និងកំពប់ទឹកសម្លនំបញ្ចុក១ឆ្នាំង បាក់ទ្វារនិងបាក់សំយ៉ាបផ្ទះអស់៣ល្វែង ហើយរបួសជាងភ្លើងម្នាក់ បន្ទាប់មកប្រជាពលរដ្ឋបានឃាត់អ្នកបើកបរនិងព្រូប្រគល់ឲ្យនគរបាល ។
ក្រោយឃាត់ខ្លួនបុរសអ្នកបើកបររថយន្តបង្កខាងលើបាននិយាយថា គាត់ងើបធ្វើការបើករថយន្តដឹកទំនិញដាក់ឲ្យម៉ូយនៅតាមបណ្ដាហាងនានា តាំងពីវេលាម៉ោង៣ទៀបភ្លឺម្ល៉េះ ។ គាត់ងងុយដេកខ្លាំង តែមិនហ៊ានសម្រាកហើយ ខណៈដែលកំពុងបើកតាមបណ្តោយផ្លូវជាតិលេខ៣ ស្រាប់តែងោកមួយភាំង ក៏បាត់បង់ម្ចាស់ការក្នុងការបើកបរហើយក៏បមានគ្រោះថ្នាក់បែបនេះកើតឡើងតែម្ដង។
ក្រោយពេលកើតហេតុ ខាងក្រុមហ៊ុនរថយន្តបង្កបានសុំធ្វើការសម្របសម្រួល ដើម្បីទទួលចេញសងថ្លៃខូចខាត ហើយបានហៅជាងមកវាយតម្លៃលើការជួសជុលរថយន្តឡិចស៊ីស RX-300 របស់សាលាបង្រៀនបើកបរ ។ ជាងបានប្រាប់ថាការជួសជុលអស់១៧០០ដុល្លារ ដោយឡែកនៅគ្រឿងសម្ភារៈបរិក្ខាអគ្គិសនី រួមទាំងផ្ទះលក់នំបញ្ចុកនិងម៉ូតូ២គ្រឿងទៀតអត់ទាន់ដេងថាត្រូវចំណាយប៉ុន្មានទៀតឡើយ ៕
ចែករំលែកព័តមាននេះ