- ភ្នំពេញ
លោក បណ្ឌិត ហ៊ុន ម៉ាណែត នាយរដ្ឋមន្ត្រីតែងតាំងនឹងទៅបំពេញទស្សនកិច្ចនៅប្រទេសចិនចំនួនពីរដង គឺនៅខែកញ្ញា និង បន្ទាប់មកនៅខែតុលា ។ ប្រទេសចិនទំនងជានឹងក្លាយជាប្រទេសដំបូងគេដែលលោក…
លោក បណ្ឌិត ហ៊ុន ម៉ាណែត នាយរដ្ឋមន្ត្រីតែងតាំងនឹងទៅបំពេញទស្សនកិច្ចនៅប្រទេសចិនចំនួនពីរដង គឺនៅខែកញ្ញា និង បន្ទាប់មកនៅខែតុលា ។
ប្រទេសចិនទំនងជានឹងក្លាយជាប្រទេសដំបូងគេដែលលោក បណ្ឌិតនឹងធ្វើដំណើរទស្សនកិច្ចដោយឆ្លុះបញ្ចាំងអំពីទំនាក់ទំនងខ្លាំងក្លាបំផុតរវាងកម្ពុជា និងចិន ។ ទស្សនកិច្ចផ្លូវការរបស់លោកបណ្ឌិតទៅកាន់ប្រទេសចិនត្រូវបានអោយដឹងជាសាធារណ:ក្នុងអំឡុងពេលទស្សនកិច្ចផ្លូវការ របស់លោក វ៉ាង យី រដ្ឋមន្ត្រីការបរទេសចិនមកកម្ពុជា កាលពីថ្ងៃទី១២ និង១៣ ខែសីហា កន្លងទៅនេះ ។
បើយោងតាមអត្ថបទដែលបានផូស នៅក្នុងហ្វេសប៊ុករបស់លោកបណ្ឌិត ហ៊ុន ម៉ាណែត បានអោយដឹងថា នៅក្នុងជំនួបររវាងលោកបណ្ឌិតហ៊ុន ម៉ាណែត និងលោក វ៉ាង យ៊ី កាលពីថ្ងៃទី១៣ ខែសីហា នៅវិមានសន្តិភាព ឯកឧត្តមកិតិ្តទេសាភិបាល បណ្ឌិត ហ៊ុន ម៉ាណែត និងឯកឧត្តម វ៉ាង យី ប្តេជ្ញាបន្តលើកកម្ពស់កិច្ចសហប្រតិបត្តិការរវាងប្រទេសទាំងពីរកម្ពុជា-ចិន ឱ្យកាន់តែជិតស្និទ្ធបន្ថែមទៀត ។
លោក វ៉ាង យី បានបញ្ជាក់អំពីជំហបន្តជំរុញការអនុវត្តការងារ ប្រកបដោយប្រសិទ្ធភាព និងភាពជិតស្និទ្ធជាមួយកម្ពុជា ហើយភាគីមិត្តចិននឹងត្រៀមទទួលស្វាគមន៍ដំណើរទស្សនកិច្ចផ្លូវការ និងការចូលរួមរបស់ឯកឧត្តម កិតិ្តទេសាភិបាល បណ្ឌិត នៅក្នុងពិព័រណ៍ចិន-អាស៊ាន លើកទី២០ ឆ្នាំ២០២៣ ដែលនឹងប្រព្រឹត្តទៅនៅទីក្រុងណាននីង ខេត្តក្វាងស៊ី ប្រទេសចិន នាពាក់កណ្តាលខែកញ្ញា ឆ្នាំ២០២៣ ខាងមុខ ។
ជាមួយគ្នានេះ ឯកឧត្តមកិតិ្តទេសាភិបាលបណ្ឌិត បានឆ្លើយតបទៅនឹងការអញ្ជើញរបស់ភាគីមិត្តចិនទៅចូលរួមពិធីខួបលើកទី១០ នៃការបង្កើតគំនិតផ្តួចផ្តើមខ្សែក្រវាត់ និងផ្លូវនៅរដ្ឋធានីប៉េកាំង សាធារណរដ្ឋប្រជាមានិតប្រទេសចិន នាពាក់កណ្តាល ខែតុលា ឆ្នាំ២០២៣ ខាងមុខ ។
ទស្សនកិច្ចរបស់លោក វ៉ាង យ៊ី គឺជានទស្សនកិច្ចផ្លូវការដំបូងគេរបស់បរទេសមកកាន់កម្ពុជា ដើម្បីផ្តល់ការគាំទ្រចំពោះការដឹកនាំអនាគតរបស់លោក បណ្ឌិត ហ៊ុន ម៉ាណែត ដែលនឹងដឹកនាំគណរដ្ឋមន្ត្រីថ្មីរបស់លោកទៅកាន់សភា ដើម្បីសុំសេចក្តីទុកចិត្តនៅថ្ងៃទី២២ ខែ សីហា។ ការចូលកាន់តំណែងរបស់លោកបណ្ឌិត ហ៊ុន ម៉ាណែត ទាក់ទាញការយកចិត្តទុកដាក់ខ្លាំងទាំងក្នុងប្រទេស និងក្រៅប្រទេស ដោយនេះ គឺជាការផ្លាស់ប្តូរការដឹកនាំពីមនុស្សជំនាន់ចាស់មកមនុស្សជំនាន់ថ្មីកម្ពុជា ។
បន្ទាប់ពីការទទួលការតែងតាំងពីព្រះមហាក្សត្រជានាយករដ្ឋមន្ត្រីកម្ពុជា លោកបណ្ឌិត ហ៊ុន ម៉ាណែត បានសន្យាថា នឹងដឹកនាំប្រទេសអោយបន្តមានសន្តិភាព ស្ថិរភាពសង្គម ព្រមទាំងធ្វើអោយសេដ្ឋកិច្ចមានការរីកចម្រើន ហើយប្រជាជនកាន់តែមាន ជីវភាពធូរធា ។ លោក វ៉ាង យី បានចាកចេញពីកម្ពុជា កាលពីល្ងាចថ្ងៃទី១៣ ខែ សីហា បន្ទាប់ពីទស្សនកិច្ចផ្លូវការរយ:ពេលពីរថ្ងៃនៅកម្ពុជា៕ ដោយ ប្រេវីន
ចែករំលែកព័តមាននេះ