កម្លាំងកងរាជអាវុធហត្ថប្រដេញតាមចាប់រថយន្តដឹកឈើមួយគ្រឿងឆ្លងខេត្តទៅក្រចេះ
- ស្ទឹងត្រែង
រថយន្តល្មើសច្បាប់មួយគ្រឿង ត្រូវបានកម្លាំងកងរាជអាវុធហត្ថប្រដេញតាមបង្ក្រាបបាន ខណៈកំពុងតែដឹកឈើឆ្លងកាត់ពីស្រុកសៀមប៉ាង ឆ្ពោះទៅខេត្តក្រចេះ
ខេត្តស្ទឹងត្រែង ៖ រថយន្តល្មើសច្បាប់មួយគ្រឿង ត្រូវបានកម្លាំងកងរាជអាវុធហត្ថប្រដេញតាមបង្ក្រាបបាន ខណៈកំពុងតែដឹកឈើឆ្លងកាត់ពីស្រុកសៀមប៉ាង ឆ្ពោះទៅខេត្តក្រចេះ កាលពីវេលាម៉ោងប្រមាណជា៥ទៀបភ្លឺ ថ្ងៃទី១១ ខែសីហា ឆ្នាំ២០២៣ នៅលើផ្លូវលំមួយខ្សែ ត្រង់ចំណុចអូរម្រះ ស្ថិតក្នុងឃុំអូរក្រៀង ស្រុកអូរក្រៀងសែនជ័យ ខេត្តក្រចេះ។
បើតាមប្រភពព័ត៌មាន បានអោយដឹងថា ការស្ទាក់ចាប់រថយន្តដឹកឈើខាងលើនេះ កម្លាំងកងរាជអាវុធហត្ថខេត្តស្ទឹងត្រែង ដឹកនាំបញ្ជាផ្ទាល់ពីលោកឧត្តមសេនីយ៍ត្រី អៀង វ៉ាន់ឌី បានពន្លាតដែនដីពីខេត្តស្ទឹងត្រែង ដោយសហការជាមួយមេបញ្ជាការកងរាជអាវុធហត្ថខេត្តក្រចេះ ទើបបង្ក្រាបបាន។
ប្រភពដដែលឲ្យដឹងថា រថយន្តខាងលើ គឺជារថយន្ត១គ្រឿង ក្នុងចំណោមរថយន្តចំនួន៤គ្រឿង ដែលធ្វើសកម្មភាពដឹកជញ្ជូនឈើចេញពីស្រុកសៀមប៉ាង ឆ្លងកាត់ដីក្រុងស្ទឹងត្រែង ឆ្ពោះទៅកាន់ខេត្តក្រចេះ។
ប្រភពដដែលបន្តទៀតថា រថយន្តដែលចាប់បាននេះ ជាប្រភេទហាយឡែនឌ័រ ពណ៌ស ពាក់ស្លាកលេខ ភ្នំពេញ២N.៤១៤៨ ដឹកឈើប្រភេទតាត្រាវ ជាច្រើនដុំ និងសន្លឹក ហើយក៏ត្រូវកម្លាំងកងរាជអាវុធហត្ថបញ្ជូនមកកាន់បញ្ជាការដ្ឋានកងរាជអាវុធហត្ថខេត្តស្ទឹងត្រែង ដើម្បីបើកការស្រាវជ្រាវស្វែងរកមេឈ្មួញឈើ និងចងក្រងសំណុំរឿងចាត់ការតាមនីតិវិធីច្បាប់ផងដែរ៕
ចែករំលែកព័តមាននេះ