ភ្នំពេញ៖ សម្តេចតេជោ ហ៊ុន សែន ប្រធានគណបក្សប្រជាជនកម្ពុជា បានស្នើឲ្យសមាជិក សមាជិកា​របស់​គណបក្សប្រជាជនកម្ពុជា មានវ័យត្រឹមអាយុ ៧៤ឆ្នាំចុះ អាចឈរឈ្មោះក្នុង​តំណែង​សមាជិកព្រឹទ្ធសភា។ ការលើកឡើងដូច្នេះ ដើម្បីកុំឲ្យស្ថាប័នព្រឹទ្ធសភារបស់យើង សំបូរទៅដោយមនុស្សចាស់។

ក្នុងពិធីសំណេះសំណាលជាមួយសមាជិករាជរដ្ឋាភិបាល អាណត្តិចាស់ និងរាជរដ្ឋាភិបាល អាណត្តិថ្មី នាល្ងាចថ្ងៃទី១០ ខែសីហានេះ សម្តេចតេជោ ហ៊ុន សែន បានមានប្រសាសន៍បន្តថា សម្តេចផ្ទាល់ អាចស្ថិតនៅក្នុងស្ថាប័នព្រឹទ្ធសភា ក្នុងរយៈពេលត្រឹមតែមួយអាណត្តិប៉ុណ្ណោះ ព្រោះសម្តេច មានវ័យកាន់តែចាស់ហើយ ហើយដើម្បីទុកឱកាសឲ្យយុវជនបន្តវេនរបស់យើង ដឹកនាំ​បន្ត ពីយើង។

​​​​សម្ដេចតេជោ មានប្រសាសន៍បន្តថា បើនិយាយពីការកាន់អំណាច និងដឹកនាំប្រទេសកម្ពុជា រូបសម្តេចផ្ទាល់ បានដឹកនាំ និងគ្រប់គ្រងរយៈពេលជាង ៣៨ឆ្នាំរួចមកហើយ។ ពេលនេះ គឺជាពេលវេលាមួយ ដែលរូបសម្តេច ត្រូវតែលះបង់អំណាចជាងគេ ដើម្បីផ្ដល់​ឲ្យយុវជនរបស់​យើងដែលជាអ្នកបន្តវេន គឺជាអ្នកដឹកនាំជោគវាសនាអនាគតប្រទេសជាតិ បន្តពីមនុស្សជំនាន់មុន។

សម្តេចតេជោ បន្តថា សម្តេច អាចកាន់អំណាចមួយអាណត្តិ ទៅពីរអាណត្តិទៀតបាន។ ប៉ុន្តែពេលនេះ សម្តេចសូមសម្រេចចិត្ត មិនបន្តកាន់អំណាចតទៅទៀត​នោះទេ ដើម្បី​ផ្តល់ជូនយុវជនរបស់យើង ជាអ្នកដឹកនាំអំណាចបន្តពីសម្តេច។

​ដោយ​ចំណាយពេលប្រមាណជិត ១ម៉ោង ដើម្បីថ្លែងសំណេះសំណាលនេះ សម្តេចតេជោ នាយករដ្ឋមន្ត្រី មានប្រសាសន៍ ចង់ឃើញគណៈរដ្ឋមន្ត្រីថ្មី ដែលជាយុវជនវ័យក្មេងចេញដំណើរ​ដោយស្វាហាប់ អង់អាចក្លាហាន មានឆន្ទៈពិត​ប្រាកដ ក្នុងការបម្រើប្រទេសជាតិ បម្រើប្រជាជន និង​ដឹកនាំសេដ្ឋកិច្ចដ៏រឹងមាំ។

សម្ដេចតេជោ មានប្រសាសន៍បន្តថា យើងនឹងវាស់ស្ទង់មើលលើការ​ចេញដំណើររបស់​គណៈរដ្ឋមន្ត្រីថ្មី ដែលជាយុវជនវ័យក្មេង ក្នុងរយៈពេល ១០០ថ្ងៃដំបូង បន្ទាប់ពីការបង្កើតឡើង​នូវរាជរដ្ឋាភិបាល នីតិកាលទី៧ នៃ​រដ្ឋសភា ថាតើយុវជនរបស់យើង បានធ្វើសកម្មភាពអ្វីខ្លះ? ដោះស្រាយនូវរាល់បញ្ហាប្រឈមអ្វីខ្លះ? ដែលជាបញ្ហារបស់ប្រទេសជាតិ និងអន្តរជាតិ។

សម្តេចតេជោ បន្តថា នៅពេលដ៏ខ្លីខាងមុខ យើងនឹងរៀបចំនូវព្រឹត្តិការណ៍ជាតិជាច្រើន ដូចជាបុណ្យ​អ៊ុំទូក បុណ្យឯករាជ្យជាតិ។ ប្រសិនបើយុវជនបន្តវេនរបស់យើង ដឹកនាំ និងដោះ​ស្រាយ​បានជោគជ័យនោះ ក៏ជាការបង្កនូវភាពជឿជាក់របស់ប្រជាជាតិយើងទាំងមូល។

សម្តេចតេជោ​ បានស្នើដល់គណៈរដ្ឋមន្ត្រី ដែលត្រូវបានតែងតាំងនាពេលខាងមុខ ត្រូវចុះទៅតាមមូលដ្ឋាន ជួបប្រាស្រ័យជាមួយប្រជាពលរដ្ឋ ដោះស្រាយ​ការងារជូនប្រជាពលរដ្ឋ ដែលជួបការលំបាក ពិសេសចុះជួបកម្មករ​កម្មការិនី តាមរោងចក្រសហគ្រាស តាមអ្វីដែលសម្តេច​ផ្ទាល់ បានសន្យាជាមួយ​កម្មករ កម្មការិនី នៅមុនពេលបោះឆ្នោតកន្លងទៅ។

សម្តេចតេជោ ក៏បានស្នើដល់រាជរដ្ឋាភិបាលថ្មី ដែលត្រូវតែងតាំង នៅពេលខាង មុខ ត្រូវចូលរួមបង្ក្រាបឲ្យខានតែបាននូវការជួញដូរគ្រឿងញៀន បំផ្លាញដល់ឬសគល់នៃ​ឧក្រិដ្ឋកម្ម​គ្រឿង​ញៀន។ ក្នុងនោះ សម្តេចបានស្នើឲ្យមាន​ការធ្វើកែទម្រង់ដល់អាជ្ញាធរប្រយុទ្ធ​ប្រឆាំងគ្រឿងញៀន ដើម្បីឲ្យសង្គមកម្ពុជា គ្មានគ្រឿងញៀន។

ជាមួយគ្នានេះ សម្តេចតេជោ​ ក៏បានស្នើដល់គណៈរដ្ឋមន្ត្រីថ្មី បន្តការយកចិត្តទុកដាក់​ចំពោះមន្ត្រីចាស់ៗ តាមរយៈការផ្ដល់ជាទីប្រឹក្សា នៅតាមក្រសួងស្ថាប័នរបស់ខ្លួន។

សម្តេចតេជោ ក៏បានស្នើដល់រាជរដ្ឋាភិបាលថ្មី បន្តយកចិត្តទុកដាក់ដល់​ការដោះស្រាយលើរបបសន្តិសុខសង្គម ចំពោះជនងាយរង​គ្រោះ ដូចអ្វីដែលរាជរដ្ឋាភិបាលចាស់ បានដោះស្រាយ នាពេលកន្លងមក។

សម្តេចតេជោ​ មាន​ប្រសាសន៍​ថា នៅថ្ងៃទី៩ ទី១០ ខែធ្នូ ឆ្នាំ២០២៣ គណបក្សប្រជាជនកម្ពុជា នឹងប្រារព្ធមហាសន្និបាតវិសាមញ្ញ​តំណាងទូទាំងប្រទេស ដើម្បីបោះឆ្នោតជ្រើសរើសបន្ថែមទៀត នូវសមាជិក​សមាជិកា​គណៈអចិន្ត្រៃយ៍គណៈកម្មាធិការកណ្តាលគណបក្សប្រជាជនកម្ពុជា ក្នុងនោះ រួម​មានឥស្សរជន ដែលជាយុវជន ក្នុងគណៈរដ្ឋមន្ត្រីថ្មីរបស់យើងផងដែរ៕