ជប៉ុនក្លាយជាក្រុម Top Favorite ក្នុងការឈ្នះជើងឯក World Cup នារីឆ្នាំនេះ
នូវែលហ្សេឡង់-អូស្ត្រាលី ៖ ការប្រកួតព្រឹត្តិការណ៍ FIFA World Cup នារីឆ្នាំ ២០២៣ បានឈានដល់វគ្គ៨
នូវែលហ្សេឡង់-អូស្ត្រាលី ៖ ការប្រកួតព្រឹត្តិការណ៍ FIFA World Cup នារីឆ្នាំ ២០២៣ បានឈានដល់វគ្គ៨
នូវែលហ្សេឡង់-អូស្ត្រាលី ៖ ការប្រកួតព្រឹត្តិការណ៍ FIFA World Cup នារីឆ្នាំ ២០២៣ បានឈានដល់វគ្គ៨ក្រុមចុងក្រោយហើយ ដោយ៦ក្រុមក្នុងចំណោម៨ក្រុមចុងក្រោយរួមមាន ជប៉ុន ស៊ុយអែត អង់គ្លេស បារាំង អូស្ត្រាលី និងហូឡង់ ដែលសុទ្ធតែធ្លាប់បានឈានដល់វគ្គនេះ កាលពីព្រឹត្តិការណ៍មុនៗ លើកលែងតែ អេស្ប៉ាញ និងកូឡុំប៊ី ប៉ុណ្ណោះ ដែលឈានដល់វគ្គនេះជាលើកដំបូង។ ប៉ុន្តែទោះយ៉ាងណា នៅក្នុងចំណោម៦ក្រុមខាងលើ មានតែជប៉ុនមួយគត់ ដែលធ្លាប់ឈ្នះជើងឯកម្តង កាលពីឆ្នាំ ២០១១ នៅប្រទេសអាល្លឺម៉ង់។
រហូតមកទល់ពេលនេះ ជប៉ុន គឺជាក្រុម Top Favorite ដែលអ្នកវិភាគ និងអតីតកីឡាការិនីបាល់ទាត់ជាច្រើននាក់ បានព្យាករណ៍ថា មានភាគរយខ្ពស់ជាងគេក្នុងការឈ្នះតំណែងជើងឯកនៅឆ្នាំនេះ បន្ទាប់ពីក្រុមចំនួន៤ក្នុងចំណោមក្រុមកំពូលទាំង៨របស់ពិភពលោក គ្មានវត្តមាននៅវគ្គនេះទេ។
អាល្លឺម៉ង់ ក្រុមលេខ២ កាណាដា ក្រុមលេខ៧ និងប្រេស៊ីល ក្រុមលេខ៨ សុទ្ធតែហាលអាវត្រឹមវគ្គចែកពូល ខណៈដែលក្រុមការពារតំណែងជើងឯក សហរដ្ឋអាមេរិក ដែលជាក្រុមចំណាត់ថ្នាក់លេខ១ពិភពលោក ហាលអាវត្រឹមវគ្គ១៦ក្រុមចុងក្រោយ បន្ទាប់ពីចាញ់ស៊ុយអែត ដោយការទាត់បាល់ប៉េណាល់ទីកាត់សេចក្តី។
ក្រុមនារីជប៉ុន ដែលឈរនៅចំណាត់ថ្នាក់លេខ១១ពិភពលោក ត្រូវបានគេចាត់ទុកជាក្រុមមានបច្ចេកទេសខ្ពស់បំផុត នៅក្នុងការប្រកួតនេះ ដោយបានស៊ុតបាល់បញ្ចូលទីច្រើនជាងគេចំនួន១៤គ្រាប់ របូតតែ១គ្រាប់ប៉ុណ្ណោះ នៅក្នុង៤ប្រកួត ដែលពួកគេឈ្នះទាំងអស់កន្លងមក ។ រហូតមកទល់ពេលនេះ កីឡាការិនីជប៉ុន Hinata Miyazawa កំពុងឈរជាអ្នកស៊ុតបញ្ចូលទីច្រើនជាងគេ គិតត្រឹមបញ្ចប់វគ្គ១៦ក្រុមចុងក្រោយ ដោយរកបាន៥គ្រាប់។
ជប៉ុន បានទម្លាក់ន័រវែស នៅវគ្គ១៦ក្រុម ក្រោយយកឈ្នះលទ្ធផល ៣-១ ដើម្បីបន្តឡើងមកប៉ះស៊ុយអែត នៅវគ្គ៨ក្រុម បន្ទាប់ពីបានផ្តួលសហរដ្ឋអាមេរិក ដោយការទាត់បាល់ប៉េណាល់ទីកាត់សេចក្តីលទ្ធផល ៥-៤ ក្រោយបញ្ចប់១២០នាទី គ្មានគ្រាប់ស៊ុតបញ្ចូលទីគ្នា។
៤ប្រកួតឈ្នះទាំងអស់កន្លងមករបស់ក្រុមនារីជប៉ុន រួមមាន ៖
-២២/០៧/២០២៣ ហ្សាំប៊ី ០-៥ ជប៉ុន (វគ្គចែកពូល)
-២៦/០៧/២០២៣ ជប៉ុន ២-០ កូស្តារីកា (វគ្គចែកពូល)
-៣១/០៧/២០២៣ ជប៉ុន ៤-០ អេស្ប៉ាញ (វគ្គចែកពូល)
-០៥/០៨/២០២៣ ជប៉ុន ៣-១ ន័រវែស (វគ្គ១៦ក្រុម)
កាលវិភាគប្រកួតវគ្គ៨ក្រុមចុងក្រោយ ៖
-១១/០៨/២០២៣ អេស្ប៉ាញ ប៉ះ ហូឡង់ ម៉ោង ០៨:០០នាទីព្រឹក (ម៉ោងនៅកម្ពុជា)
-១១/០៨/២០២៣ ជប៉ុន ប៉ះ ស៊ុយអែត ម៉ោង ០២:៣០នាទីរសៀល
-១២/០៨/២០២៣ ម្ចាស់ផ្ទះអូស្ត្រាលី ប៉ះ បារាំង ម៉ោង ០២:០០នាទីរសៀល
-១២/០៨/២០២៣ អង់គ្លេស ប៉ះ កូឡុំប៊ី ម៉ោង ០៥:៣០នាទីរសៀល៕ (ប្រភពពី LA Times)
ចែករំលែកព័តមាននេះ