ប្រជាពលរដ្ឋរស់នៅភូមិគោកតែក ឃុំចន្ទ្រា បាននាំគ្នាត្អូញត្អែររឿងរថយន្តធុនយក្សប្រភេទវ៉េអង ដឹកទំនិញ កំពុងតែបំផ្លាញផ្លូវនារដូវវស្សានេះ។ ហើយការត្អូញត្អែរនេះដែរ
ខេត្តស្វាយរៀង ៖ ប្រជាពលរដ្ឋរស់នៅភូមិគោកតែក ឃុំចន្ទ្រា បាននាំគ្នាត្អូញត្អែររឿងរថយន្តធុនយក្សប្រភេទវ៉េអង ដឹកទំនិញ កំពុងតែបំផ្លាញផ្លូវនារដូវវស្សានេះ។ ហើយការត្អូញត្អែរនេះដែរ បានកើតឡើងនៅរសៀលថ្ងៃទី៨ ខែសីហា ឆ្នាំ២០២៣ ស្ថិតនៅភូមិគោកតែក ឃុំចន្ទ្រា ស្រុកចន្ទ្រា។
បើប្រភពពីសមត្ថកិច្ចម្នាក់ សុំមិនបញ្ចេញឈ្មោះ បានប្រាប់កោះសន្តិភាពឱ្យដឹងថា ករណីឈ្មួញដឹកទំនិញតាមរថយន្តធុនធំ ប្រភេទវ៉េអង បង្កឲ្យស្រុតខូចផ្លូវនេះ បានកើតឡើងរយៈពេលជិត១ខែមកហើយ គឺចាប់ពីចុងខែកក្កដា ឆ្នាំ២០២៣ រហូតមកដល់ថ្ងៃទី៨ ខែសីហា ឆ្នាំ២០២៣នេះ គឺឈ្មួញសម្រុកដឹកទំនិញឆ្លងដែនទៅប្រទេសវៀតណាម តាមច្រករបៀងគោកតែក ស្ថិតក្នុងភូមិគោកតែក ឃុំចន្ទ្រា ស្រុកចន្ទ្រា។
ប្រភពដដែលបន្តថា ហើយរថយន្តដឹកទំនិញធ្វើចរាចរណ៍ទាំងយប់ទាំងថ្ងៃ ដោយក្នុង១ថ្ងៃ ចាប់ពី៧គ្រឿងទៅ១០គ្រឿង និងដឹកទំនិញភាគច្រើនរួមមាន ស្ករ.ស និងគ្រឿងអេឡិកត្រូនិកជាដើម។
ប្រភពដដែលបន្តទៀតថា ក្រុមឈ្មួញបានដឹកទំនិញទាំងអស់នោះទៅដាក់នៅជិតប៉ុស្តិ៍ច្រករបៀងគោតែក រួចផ្ទេរបន្តដាក់ក្នុងទូកតឹកយ៉ាង ដើម្បីឆ្លងដែនទៅប្រទេសវៀតណាម ដូចគេហែកឋិនអ៊ីចឹង ដោយមិនដឹងថា តើទំនិញទាំងនោះ គឺជាទំនិញគេចពន្ធ ឬបានបង់ពន្ធចូលរដ្ឋដែរនោះទេ?។ ហើយសមត្ថកិច្ចប្រចាំការច្រករបៀងគោកតែក ក៏មិនបានផ្តល់ព័ត៌មានដល់អ្នកសារព័ត៌មានយើង។
ទាក់ទិននឹងករណីខាងលើនេះដែរ លោកវរសេនីយ៍ យ៉ន សុផល នាយនគបាលវរៈការពារព្រះដែនលេខ៦០៩ បានឆ្លើយតាមទូរស័ព្ទនារសៀលថ្ងៃទី៨ ខែសីហា នេះថា សូមទំនាក់ទំនងទៅលោកស្នងការរងទទួលផែនសេដ្ឋកិច្ច នៃស្នងការដ្ឋាននគបាលខេត្តស្វាយរៀង ទើបអាចបំភ្លឺជូនបាន។
ចំណែលលោកស្នងការរង អូម សំអោ ទទួលផែនសេដ្ឋកិច្ច នៃស្នងការដ្ឋាននគបាលខេត្តស្វាយរៀង ក៏បានមានប្រសាសន៍តាមទូរស័ព្ទនារសៀលថ្ងៃទី៨ ខែសីហា នេះថា លោកមិនបានដឹងទេ ក៏ប៉ុន្តែកន្លងមក គឺមានឈ្មួញដឹកទំនិញស្ករ.ស និងគ្រឿងអេឡិកត្រូនិចគ្រឿងជជុះ ដូចជាអេតចាយម្តងម្កាល មិនរាល់ថ្ងៃទេ។ ហើយទំនិញគ្រឿងអេឡិចត្តូនិចជជុះទាំងនោះ គឺខាងមន្ត្រីគយ បានចុះទៅពិនិត្យមើលដែរ ក៏ប៉ុន្តែពុំឃើញបង់ពន្ធទេ ទំនងជាទំនិញគ្រឿងជជុះ អេតចាយ ហើយវៀតណាមគេមិនទិញ ទើបឈ្មួញទម្លាក់ពីលើរថយន្តគរទុកចោលនៅជិតប៉ុស្តិ៍ ហើយបើករថយន្តចេញមកវិញ។
ពាក់ព័ន្ធនឹងករណីខាងលើនេះ មហាជនបានលើកឡើងថា រថយន្តទម្លាក់ទំនិញនៅជិតប៉ុស្តិ៍នគរបាលវរៈការពារព្រំដែនច្រករបៀងគោកតែកនោះ ហើយពេលយប់ទើបលើកទំនិញដាក់លើទូកវៀតណាម រួចឆ្លងដែនទៅប្រទេសវៀតណាម។
បើប្រជាពលរដ្ឋវិញ ក៏បានលើកឡើងដែរថា ពួកគាត់មិនខ្វល់រឿងឈ្មួញដឹកទំនិញគេចពន្ធឆ្លងដែនទៅប្រទេសវៀតណាមអីនោះទេ ពួកគាត់សូមអំពាវនាវដល់អាជ្ញាធរ មានសមត្ថកិច្ចមកពិនិត្យដោះស្រាយរឿងរថយន្តដឹកទំនិញធុនយក្ស ដែលកំពុងតែបំផ្លាញផ្លូវ ធ្វើឱ្យស្រុតខូចក្រហេងក្រហូង លិចទឹកពិបាកធ្វើដំណើរ សូមឲ្យអាជ្ញាធរដោះស្រាយផង៕
ចែករំលែកព័តមាននេះ