រាជធានីភ្នំពេញ ៖ អ្នកនាំពាក្យក្រសួងការបរទេសជប៉ុនបានឲ្យដឹងថា រដ្ឋាភិបាលជប៉ុនបានគាំទ្រការវិលត្រឡប់ទៅរកប្រក្រតីភាពទំនាក់ទំនងកម្ពុជា-ថៃ តាមរយៈGBC និងការអនុវត្តបទឈប់បាញ់កាន់តែមានភាពច្បាស់លាស់ ។ យោងតាមសេចក្តីថ្លែងការណ៍របស់អ្នកនាំពាក្យក្រសួងការបរទេសជប៉ុន នៅថ្ងៃទី២៣ ខែតុលា…
រាជធានីភ្នំពេញ ៖ អ្នកនាំពាក្យក្រសួងការបរទេសជប៉ុនបានឲ្យដឹងថា រដ្ឋាភិបាលជប៉ុនបានគាំទ្រការវិលត្រឡប់ទៅរកប្រក្រតីភាពទំនាក់ទំនងកម្ពុជា-ថៃ តាមរយៈGBC និងការអនុវត្តបទឈប់បាញ់កាន់តែមានភាពច្បាស់លាស់ ។
យោងតាមសេចក្តីថ្លែងការណ៍របស់អ្នកនាំពាក្យក្រសួងការបរទេសជប៉ុន នៅថ្ងៃទី២៣ ខែតុលា ឆ្នាំ២០២៥ បានលើកឡើងថា រដ្ឋាភិបាលជប៉ុនសូមស្វាគមន៍ចំពោះវឌ្ឍនភាពកិច្ចប្រជុំណៈកម្មាធិការព្រំដែនទូទៅកម្ពុជា-ថៃ ដែលបានធ្វើឡើងនាថ្ងៃទី២៣ ខែតុលា នៅប្រទេសម៉ាឡេស៊ី ដែលបានពិភាក្សាអំពីការវិលត្រឡប់ទៅរកប្រក្រតីភាពឡើងវិញនៃទំនាក់ទំនងរវាងប្រទេសទាំងពីរ និងឯកភាពគ្នាលើការបង្កើតក្រុមសង្កេតការណ៍អាស៊ាន(AOT) ដែលជាការរួមចំណែកក្នុងការធ្វើឱ្យកិច្ចព្រមព្រៀងបទឈប់បាញ់កាន់តែមានភាពច្បាស់លាស់ ។
រដ្ឋាភិបាលជប៉ុនក៏សូមសម្តែងនូវការគោរពចំពោះកិច្ចខិតខំប្រឹងប្រែងការទូតរបស់គ្រប់ភាគីពាក់ព័ន្ធ រួមទាំងសហរដ្ឋអាមេរិក និងប្រទេសម៉ាឡេស៊ីជាប្រធានអាស៊ានដែលបានគាំទ្រដល់ការពិភាក្សារវាងប្រទេសកម្ពុជា និងថៃ ។
រដ្ឋាភិបាលជប៉ុនបានលើកឡើងថា ភាពប្រសើរឡើងវិញនៃទំនាក់ទំនងរវាងប្រទេសកម្ពុជា និងថៃ មានសារសំខាន់សម្រាប់ស្ថិរភាព និងការអភិវឌ្ឍក្នុងតំបន់ទាំងមូល។ រដ្ឋាភិបាលជប៉ុនសង្ឃឹមថា ប្រទេសទាំងពីរនឹងបន្តគោរពតាមកិច្ចព្រមព្រៀងបទឈប់បាញ់ ហើយភាពតានតឹងរវាងប្រទេសទាំងពីរនឹងត្រូវបានបន្ធូរបន្ថយដោយសន្តិវិធីតាមរយៈការសន្ទនា ។
ក្នុងន័យនេះ ជប៉ុននឹងបន្តខិតខំប្រឹងប្រែង ដើម្បីជំរុញការអនុវត្តយ៉ាងប្រាកដប្រជានូវកិច្ចព្រម ព្រៀងបទឈប់បាញ់ និងបន្ថយភាពតានតឹងដោយសហការជាមួយប្រទេសពាក់ព័ន្ធនានា ៕
ចែករំលែកព័តមាននេះ