តើ លោក ហ៊ុន ម៉ាណែត ដែលទើបត្រូវតែងតាំងជានាយករដ្ឋមន្ត្រីថ្មី ដោយព្រះមហាក្សត្រនោះ នឹងក្លាយជាបុរសខ្លាំងដូចឪពុករបស់លោកដែរឬទេ? នេះជាសំណួរមួយទាក់ទាញការចាប់អារម្មណ៍ ខណៈពេលដែលកម្ពុជា សម្រេចផ្តល់ឱកាសអោយមនុស្សជំនាន់ថ្មី ឬ
តើ លោក ហ៊ុន ម៉ាណែត ដែលទើបត្រូវតែងតាំងជានាយករដ្ឋមន្ត្រីថ្មី ដោយព្រះមហាក្សត្រនោះ នឹងក្លាយជាបុរសខ្លាំងដូចឪពុករបស់លោកដែរឬទេ? នេះជាសំណួរមួយទាក់ទាញការចាប់អារម្មណ៍ ខណៈពេលដែលកម្ពុជា សម្រេចផ្តល់ឱកាសអោយមនុស្សជំនាន់ថ្មី ឬឈា.មស្រស់ចូលដឹកនាំប្រទេស។
តាមការរំពឹងទុក លោកនឹងដឹកនាំគណៈរដ្ឋមន្ត្រីថ្មី ចាប់ពីថ្ងៃទី២២ ខែសីហា ឆ្នាំ២០២៣ ខាង មុខនេះតទៅ បន្ទាប់ពីសភាដែលមាន១២៥ អាសនៈ បោះឆ្នោតផ្តល់សេចក្តីទុកចិត្ត។
ប្រទេសកម្ពុជា នឹងមិនត្រឹមតែមាននាយករដ្ឋមន្ត្រីវ័យក្មេងទេ ប៉ុន្តែក៏មានរដ្ឋមន្ត្រីភាគច្រើន ជាមនុស្សជំនាន់ក្រោយផងដែរ។ ដូច្នេះ ការដឹកនាំរបស់លោក ហ៊ុន ម៉ាណែត និងគណៈរដ្ឋមន្ត្រីវ័យក្មេងរបស់លោក ទាក់ទាញការចាប់អារម្មណ៍ជាខ្លាំង បន្ទាប់ពីឪពុករស់លោក គឺសម្តេចតេជោ ហ៊ុន សែន បានលាលែងចេញពីតំណែងនាយករដ្ឋមន្ត្រី បន្ទាប់ពីកាន់តួនាទីនេះអស់រយៈពេលជិនបួនទស្សវត្សរ៍។
សម្តេចតេជោ ដែលជានិមិត្តរូបនៃសន្តិភាព ការបង្រួបបង្រួបជាតិ និងការអភិវឌ្ឍន៍ ត្រូវបានគេចាត់ទុកថា ជាបុរសខ្លាំងរបស់កម្ពុជា។
ដូច្នេះចាប់ពីពេលចុងខែសីហាទៅ ក្រសែភ្នែកជាតិ និងអន្តរជាតិនឹងតាមដានយ៉ាងយកចិត្តទុកដាក់ចំពោះការដឹកនាំរបស់លោក ហ៊ុន ម៉ាណែត ដើម្បីដឹងថា តើលោកនឹងខ្លាំងដូចជាឪពុករបស់លោកដែរឬទេ?
លោក ហ៊ុន ម៉ាណែត បានប្តេជ្ញាថា លោកនឹងធ្វើអោយកម្ពុជាបន្តមានសន្តិភាព មានស្ថេរភាពសង្គម មានការរីកចម្រើនសេដ្ឋកិច្ច ហើយប្រជាជនមានជីវភាពកាន់តែល្អប្រសើរ។
លោក ហ៊ុន ម៉ាណែត បានក្លាយជានាយករដ្ឋមន្ត្រីកម្ពុជា តាមព្រះរាជក្រិត្យមួយដែលឡាយព្រហស្តលេខា ដោយព្រះមហាក្សត្រកាលពីថ្ងៃទី៧ ខែសីហា ។ ភ្លាមៗ បន្ទាប់នោះ លោកក៏បានធ្វើលិខិតមួយថ្វាយព្រះមហាក្សត្រ ដើម្បីសម្តែងការដឹកគុណ និងបង្ហាញការប្តេជ្ញាចិត្តរបស់លោក ដើម្បីដឹកនាំប្រទេសកម្ពុជាអោយមានសន្តិភាព ស្ថិរភាព និងការរីកចម្រើនទៅមុខទៀត។
នៅក្នុងលិខិតចុះថ្ងៃទី៧ ខែសីហា ថ្វាយព្រះមហាក្សត្រ លោក ហ៊ុន ម៉ាណែត ដែលជាកូនប្រុសរបស់សម្តេចតេជោ ហ៊ុន សែន បាននិយាយថា «ទូលព្រះបង្គំជាខ្ញុំ រួមជាមួយឥស្សរជនទាំងអស់ក្នុងរាជរដ្ឋាភិបាល នីតិកាលទី៧ នៃរដ្ឋសភា សូមប្តេជ្ញាខិតខំបំពេញបេសកកម្មជាតិដ៏ឧត្តុង្គឧត្តមថ្លៃថ្លានេះ ប្រកបដោយវីរភាព, សេចក្តីស្មោះត្រង់ និងការទទួលខុសត្រូវខ្ពស់ ក្នុងការបម្រើជាតិ មាតុភូមិ និងប្រជាជនកម្ពុជា ពិសេសការបន្តធានាការពារឯករាជ្យជាតិ អធិបតេយ្យជាតិ និងបូរណភាពទឹកដី, ការធានាការពារជាដាច់ខាត់នូវរាជបល្ល័ង្ក និងរបបរាជានិយមអាស្រ័យរដ្ឋធម្មនុញ្ញនៅកម្ពុជា, ការបន្តធានាការពារឱ្យបានដាច់ខាតនូវសុខសន្តិភាព និងស្ថិរភាពសង្គមជាតិ, ការបន្តជំរុញ ការអភិវឌ្ឍប្រទេសជាតិឱ្យមានការរីកចម្រើនជឿនលឿន និងការបន្តលើកកម្ពស់ជីវភាពរស់នៅរបស់ប្រជាជនកម្ពុជា ក៏ដូចជាការបន្តលើកស្ទួយកិត្យានុភាព ជាតិនៅលើឆាកអន្តរជាតិ»។
ដោយផ្អែកលើខ្លឹមសារនៃលិខិតនេះ លោក ហ៊ុន ម៉ាណែត ផ្តល់ក្តីសង្ឃឹមមួយដល់ប្រជាជនកម្ពុជា ថា លោកនឹងក្លាយជាមេដឹកនាំដ៏ល្អសម្រាប់ប្រទេស និងប្រជាជនកម្ពុជា។ លោកប្តេជ្ញាការពារសន្តិភាព ធ្វើការអភិឌ្ឍប្រទេស និងពិសេសធ្វើអោយប្រជាជនកម្ពុជានឹងកាន់តែមានជីវភាពខ្ពង់ខ្ពស់ ដូចបណ្តាប្រទេសជឿនលឿន។
ប៉ុន្តែទោះបីជាយ៉ាងណាក៏ដោយចុះ ការអភិវឌ្ឍន៍សេដ្ឋកិច្ចអោយកាន់តែរីកចម្រើន នៅក្នុង ដំណាក់កាលនេះ នឹងក្លាយជាការលំបាកសម្រាប់រូបលោក និងគណៈរដ្ឋមន្ត្រីរបស់លោក ដោយទាមទារអោយមានកិច្ចប្រឹងប្រែងដ៏ខ្លាំងក្លា និងប្រាកដប្រជាពីគណៈរដ្ឋមន្ត្រីទាំងមូលរបស់លោក។
បញ្ហាកូវីដ១៩ និងសង្គ្រាម រវាងរុស្ស៊ី និងអ៊ុយក្រែន ព្រមទាំងការប្រកួតប្រជែងគ្នា ដណ្តើមឧត្តមភាពរវាងអាមេរិកនិងចិន បានធ្វើអោយសេដ្ឋកិច្ចពិភពលោកដាំក្បាលចុះ និងប្រឈមមុខនឹងអនាគតដ៏មិនប្រាកដប្រជាមួយ។ សេដ្ឋកិច្ចកម្ពុជា ក៏ស្ថិតនៅក្នុងស្ថានភាពលំបាកដូចប្រទេសភាគច្រើននៅក្នុងពិភពលោកដែរ ទោះបីជាសេដ្ឋកិច្ចកម្ពុជា ចាប់ផ្តើមមានសន្ទុះឡើងវិញចាប់ពីឆ្នាំ២០២២ក្តី។
ទោះបីជាយ៉ាងណាក៏ដោយចុះ កម្ពុជាបានក្រោកចេញពីវិបត្តិសេដ្ឋកិច្ចយ៉ាងឆាប់រហ័ស កាលពីឆ្នាំ២០២២ ក្រោមការដឹកនាំរបស់សម្តេចតេជោ ហ៊ុន សែន ជាមួយនឹងកំណើនសេដ្ឋកិច្ចប្រមាណជា៥,២ភាគរយ។ នេះបើតាមធនាគារពិភពលោក។
ធនាគារពិភពលោក ថែមទាំងនិយាយថា សេដ្ឋកិច្ចកម្ពុជា នឹងមានកំណើនប្រមាណជា៥,៥ភាគរយ នៅឆ្នាំ២០២៣។ ប៉ុន្តែធនាគារពិភពលោកបានទាក់ទាញការយកចិត្តទុកដាក់ថា ដើម្បីអោយកម្ពុជាបន្ត ស្ថិតលើផ្លូវនៃការរីកចម្រើនឡើងវិញ ចេញពីវិបត្តិសេដ្ឋកិច្ចពិភពលោក នោះ កម្ពុជាចាំបាច់ត្រូវធ្វើការពង្រីកវិស័យទេសចរណ៍របស់ខ្លួន ហើយលើកកម្ពស់វិស័យពាណិជ្ជកម្មតាមរយៈការលើកកម្ពស់ ភាពប្រកួតប្រជែងផ្នែកពាណិជ្ជកម្ម។
ជាមួយគ្នានោះ កម្ពុជាក៏ត្រូវពង្រឹងផងដែរ វិស័យកសិកម្ម វិស័យសំណង់ និងវិស័យសុខាភិបាល ព្រមទាំងវិស័យមួយចំនួនទៀតដែលមានភាពប្រទាក់ក្រឡាគ្នា។
តាមរយៈការសិក្សាដ៏ជ្រៅជ្រៅរបស់លោក និងការងារដ៏មត់ចត់របស់លោក គួបផ្សំការយល់ដឹងពីភាពជាអ្នកដឹកនាំពីឪពុករបស់លោក យើងរំពឹងថា លោក ហ៊ុន ម៉ាណែត នឹងពុះពាររាល់ការលំបាក ដើម្បីធ្វើអោយសេដ្ឋកិច្ចកម្ពុជា កាន់តែរីកចម្រើន ហើយប្រជាជនកាន់តែមានជីវភាពធូរធា។
ចំណែកប្រជាជនកម្ពុជាទាំងអស់ ក៏ត្រូវតែផ្តល់ការទុកចិត្ត និងគាំទ្រលោក និងរដ្ឋាភិបាលរបស់លោក ដែលនឹងបង្កើតឡើងនៅថ្ងៃទី២២ ខែសីហា ដើម្បីអោយលោក និងសហការីរបស់លោកអាចធ្វើអោយសេដ្ឋកិច្ចកម្ពុជា ឆ្លងកាត់ការលំបាកទាំងឡាយ ហើយកម្ពុជាកាន់តែរីកលូតលាស់ និងមានកេរ្ដិ៍ឈ្មោះល្បីរន្ទឺទាំងក្នុងប្រទេស និងពិភពលោក។
លោក ហ៊ុន ម៉ាណែតធ្វើដំណើរមកកាន់តំណែងនាយករដ្ឋមន្ត្រី ដោយរបៀបណា?
នៅក្នុងនាមជាបញ្ញវ័ន្តវ័យក្មេង លោកបណ្ឌិត ហ៊ុន ម៉ាណែត បានចាប់ផ្តើមបម្រើការងារជាកងទ័ព តាំងពីឆ្នាំ១៩៩៥ ហើយក៏បានបន្តការសិក្សាលើជំនាញយោធាពីសាលាយោធា ដ៏ល្បីរបស់ពិភពលោកនៅសហរដ្ឋអាមេរិក គឺសាលា «West Point» រហូតទទួលបានជោគជ័យនៅឆ្នាំ១៩៩៩។ លោកបណ្ឌិត ក៏បានបន្តការសិក្សាអនុបណ្ឌិត ផ្នែកសេដ្ឋកិច្ច នៅសាកលវិទ្យាល័យញូវយ៉ក នាឆ្នាំ២០០២ ហើយទទួលសញ្ញាប័ត្របណ្ឌិតសេដ្ឋកិច្ច នៅសាកលវិទ្យាល័យ «ប្រ៊ីស្តូល» នៅចក្រភពអង់គ្លេស នាឆ្នាំ២០០៨។
ពាក់ព័ន្ធនឹងជីវិតឯកជនវិញ លោកបណ្ឌិត ហ៊ុន ម៉ាណែត បានរៀបអាពាហ៍ពិពាហ៍ជាមួយនឹងលោកស្រី ពេជ ចន្ទមុន្នី បច្ចុប្បន្នជាអនុប្រធានក្រុមប្រឹក្សាភិបាល នៃសមាគមគ្រូពេទ្យស្ម័គ្រចិត្តយុវជនសម្តេចតេជោ ដែលបានបញ្ចប់សញ្ញាប័ត្របណ្ឌិតសុខភាពសាធារណៈពីចក្រភពអង់គ្លេស ដោយទទួលបានបុត្រី២រូប និងបុត្រាមួយរូប។
លោកបណ្ឌិត ហ៊ុន ម៉ាណែត និងលោកស្រី ពេជ ចន្ទមុន្នី បានលេចធ្លោបំផុតនៅក្នុងអំឡុង សង្គ្រាមប្រឆាំងនឹងការរីករាលដាលនៃមេរោគកូវីដ-១៩ នៅកម្ពុជា ក្នុងឆ្នាំ២០២០-២០២២។ សម្រាប់ការងារនយោបាយ លោកបណ្ឌិត ហ៊ុន ម៉ាណែត បានទទួលការគាំទ្រនៅក្នុងជួរគណបក្សប្រជាជនកម្ពុជា ជាបេក្ខជននាយករដ្ឋមន្ត្រីបន្តវេន ក្រោយពេលដែលលោកបានត្រូវ តែងតាំងជាសមាជិកគណៈអចិន្ត្រៃយ៍គណៈកម្មាធិការកណ្តាលគណបក្ស និងជាប្រធានយុវជនគណបក្ស នោះមិនរាប់បញ្ចូលស្នាដៃនៅក្នុងការធ្វើទំនើបកម្មកងទ័ពនៅក្នុងតំណែង ដែលលោកទទួលខុសត្រូវជាមេបញ្ជាការកងទ័ពជើងគោក និងជាអគ្គមេបញ្ជាការរង នៃកងយោធពលខេមរភូមិន្ទ នោះឡើយ។
ផ្អែកតាមបទពិសោធន៍ការងារ ការអប់រំ ការគ្រប់គ្រងគ្រួសារ និងការងារទទួលខុសត្រូវ ចំពោះ កាតព្វកិច្ច និងភារៈកិច្ចរបស់ប្រទេសជាតិ លោកបណ្ឌិត នឹងជ្រើសរើសសមាសភាព គណៈ រដ្ឋមន្ត្រីថ្មី ដែលពោរពេញទៅដោយបុគ្គល និងឥស្សរជនវ័យក្មេង និងមានបទពិសោធន៍ការងារ ព្រមទាំងការអប់រំខ្ពស់ ដើម្បីធ្វើយ៉ាងណា ជួយចូក ជួយចែវ ជួយជម្រុញល្បឿននៃការអភិវឌ្ឍន៍ប្រទេសជាតិ។
សរុបមកវិញ នៅក្នុងនាមជាបញ្ញវ័ន្ត ដែលទទួលការបណ្តុះបណ្តាលនៅក្រៅប្រទេស ហើយសុទ្ធតែប្រទេសមហាអំណាចបច្ចឹមប្រទេស និងទទួលបានបទពិសោធន៍ ក៏ដូចជាមេរៀនជាច្រើនដែលផ្ទេរតាមដំណើរនៃសង្គមនីយកម្មរបស់គ្រួសារ ដែលមានឪពុកជាអ្នកដែលដឹកនាំ ប្រទេសរហូតដល់៣៨ឆ្នាំ ៧ខែ និង៨ថ្ងៃ ។ លោកបណ្ឌិតអាចនឹងសំយោគចេញនូវទស្សនៈ វិស័យនយោបាយ និងមគ្គុទេសភាពថ្មីមួយ ដែលសមស្របនឹងបរិយាកាស និងសង្គម ជីវភាពនៅកម្ពុជា ក៏ដូចជាចរន្តនៃសាកលភាវូបនីយកម្ម ។
លោក ហ៊ុន ម៉ាណែត មេដឹកនាំថ្មីរបស់កម្ពុជា នឹងក្លាយជាក្តីសង្ឃឹមថ្មីរបស់ប្រទេស និងប្រជាជនកម្ពុជា៕ ដោយ ៖ ប្រេវីន និង ហេង ចេស្តា
ចែករំលែកព័តមាននេះ