ថៃកើបផលចំណេញយ៉ាងក្រាស់ក្រែលពីការហាមឃាត់ការនាំចេញអង្កររបស់ឥណ្ឌា
ប្រទេសថៃ ៖ រដ្ឋមន្ត្រីក្រសួងពាណិជ្ជកម្មថៃ នៅថ្ងៃទី០៧ ខែសីហា ឆ្នាំ២០២៣ នេះ បានអះអាងថា
ប្រទេសថៃ ៖ រដ្ឋមន្ត្រីក្រសួងពាណិជ្ជកម្មថៃ នៅថ្ងៃទី០៧ ខែសីហា ឆ្នាំ២០២៣ នេះ បានអះអាងថា
ប្រទេសថៃ ៖ រដ្ឋមន្ត្រីក្រសួងពាណិជ្ជកម្មថៃ នៅថ្ងៃទី០៧ ខែសីហា ឆ្នាំ២០២៣ នេះ បានអះអាងថា ប្រទេសថៃកំពុងទទួលបានអត្ថប្រយោជន៍ពីការហាមឃាត់ការនាំចេញអង្កររបស់ប្រទេសឥណ្ឌា ហើយរដ្ឋាភិបាលថៃ គ្មានហេតុផលណាមួយ ដើម្បីបញ្ឈប់ការនាំចេញអង្កររបស់ខ្លួននោះទេ។ នេះបើយោងតាមប្រភពពីទីភ្នាក់ងារសារព័ត៌មាន Reuters បានចេញផ្សាយ។
លោក Jurin Laksanawisit រដ្ឋមន្ត្រីក្រសួងពាណិជ្ជកម្មថៃ បានប្រាប់សន្និសីទសារព័ត៌មានមួយថា រដ្ឋាភិបាលថៃ នឹងធានាបាននូវទិន្នផលស្រូវគ្រប់គ្រាន់សម្រាប់ការប្រើប្រាស់ក្នុងស្រុក និងការនាំចេញ ហើយក៏ត្រូវប្រាកដថា តម្លៃក្នុងស្រុកមិនខ្ពស់ពេក។ លោកបានបន្តទៀតថា នៅក្នុងរយៈពេល៧ខែដំបូង នៃឆ្នាំនេះ ប្រទេសថៃបាននាំចេញអង្ករចំនួន ៤.៨លានតោន ដោយបន្ថែមការនាំចេញប្រចាំខែមានចំនួន ៧០ ទៅ ៨០ម៉ឺនតោន។
ដោយឡែក លោក Charoen Laothamatas ប្រធានសមាគមអ្នកនាំចេញអង្ករថៃ បានលើកឡើងថា ប្រទេសថៃ ដែលជាប្រទេសនាំចេញអង្ករធំជាងគេទី២ របស់ពិភពលោក បន្ទាប់ពីប្រទេសឥណ្ឌា ត្រូវបានគេរំពឹងថា នឹងនាំចេញអង្ករបានជាង៨លានតោន នៅឆ្នាំនេះ ពោលគឺកើនឡើងពី ៧.៧១លានតោន បើធៀបកាលពីឆ្នាំមុន។
ប្រភពពាណិជ្ជកម្មចំនួន២កាលពីសប្តាហ៍មុន បានធ្វើការចេញផ្សាយថា ក្រុមហ៊ុននាំចេញអង្ករមួយចំនួននៅក្នុងប្រទេសថៃ និងវៀតណាម កំពុងចរចាតម្លៃឡើងវិញលើកិច្ចសន្យាលក់ប្រហែលកន្លះលានតោន សម្រាប់ការនាំចេញនៅខែសីហា បន្ទាប់ពីប្រទេសឥណ្ឌា បានធ្វើឱ្យទីផ្សារពិភពលោកភ្ញាក់ផ្អើល ជាមួយនឹងការហាមឃាត់ការនាំចេញអង្ករសមិនមែនបាម៉ាទី ដើម្បីទប់ទល់នឹងការកើនឡើងតម្លៃក្នុងស្រុក។
គិតរហូតមកទល់ពេលនេះ ឥណ្ឌា គឺជាប្រទេសនាំចេញអង្ករដ៏ធំបំផុតរបស់ពិភពលោក ដែលស្មើនឹង ៤០% នៃពាណិជ្ជកម្មអង្ករពិភពលោក ខណៈដែលប្រទេសថៃ មានចំណែកទីផ្សារ ១៥% និងវៀតណាមមាន ១៤% ។ នេះបើយោងតាមប្រភពពីក្រសួងកសិកម្មសហរដ្ឋអាមេរិកបានចេញផ្សាយ៕
ចែករំលែកព័តមាននេះ