World Cup នារី ៖ ស៊ុយអែតទម្លាក់ជើងឯក៤សម័យកាល អាមេរិក ត្រឹមវគ្គ១៦ក្រុម
អូស្ត្រាលី ៖ ក្រុមបាល់ទាត់នារីសហរដ្ឋអាមេរិក ធ្លាក់ចេញពីព្រឹត្តិការណ៍ FIFA World Cup នារីឆ្នាំ
អូស្ត្រាលី ៖ ក្រុមបាល់ទាត់នារីសហរដ្ឋអាមេរិក ធ្លាក់ចេញពីព្រឹត្តិការណ៍ FIFA World Cup នារីឆ្នាំ ២០២៣ នៅត្រឹមវគ្គ១៦ក្រុមចុងក្រោយ កាលពីថ្ងៃទី០៦ ខែសីហា ឆ្នាំ២០២៣ បន្ទាប់ពីចាញ់ក្រុមនារីស៊ុយអែតយ៉ាងភ្ញាក់ផ្អើលជាទីបំផុត នៅក្នុងការទាត់បាល់ប៉េណាល់ទីកាត់សេចក្តីដោយលទ្ធផល ៥-៤ ក្រោយបញ្ចប់ការប្រកួត ១២០នាទី គ្មានគ្រាប់ស៊ុតបញ្ចូលទីគ្នា។
នៅក្នុងជំនួបធ្វើឡើងនៅឯកីឡដ្ឋាន Melbourne Rectangular ប្រទេសអូស្ត្រាលី ក្រុមការពារតំណែងជើងឯកអាមេរិក បានគ្រប់គ្រងការប្រកួតភាគច្រើន ១២០នាទី ប៉ុន្តែមិនអាចសម្រេចគ្រាប់បាល់បញ្ចូលទីបានឡើយ ដោយការពារសំណាញ់ទីជាប់ដោយអ្នកចាំទី Zecira Musovic ដែលសង្គ្រោះការស៊ុតពីសហរដ្ឋអាមេរិករហូតដល់ ១១ដងឯណោះ។
ជាមួយនឹងលទ្ធផលនេះ ក្រុមនារីស៊ុយអែតបានបញ្ចប់ដំណើរឈ្នះជើងឯក FIFA Women’s World Cup ជាលើកទី៥ របស់សហរដ្ឋអាមេរិក ដែលបច្ចុប្បន្នកំពុងឈរនៅក្នុងនាមក្រុមឈ្នះជើងឯកពានរង្វាន់បាល់ទាត់នារីធំបំផុតរបស់ពិភពលោកមួយនេះ ក្រោយឈ្នះ៤លើក នៅក្នុងឆ្នាំ ១៩៩១, ១៩៩៩, ២០១៥ និង ២០១៩។
ចាប់តាំងពីបង្កើតឡើងដំបូងនៅឆ្នាំ ១៩៩១ រហូតមកទល់ពេលនេះ ស៊ុយអែតមិនធ្លាប់ឈ្នះជើងឯកម្តងណាឡើយ ប៉ុន្តែកំណត់ត្រាល្អបំផុតរបស់ពួកគេ គឺព្រឹត្តការណ៍នៅឆ្នាំ ២០០៣ នៅសហរដ្ឋអាមេរិក ដោយបញ្ចប់ទៅក្នុងនាមក្រុមរងជើងឯក ក្រោយចាញ់អាល្លឺម៉ង់ ដោយលទ្ធផល ២-១។
ជាមួយនឹងជ័យជម្នះនេះ ក្រុមនារីស៊ុយអែត បន្តឡើងទៅវគ្គ៨ក្រុមចុងក្រោយ ដោយត្រូវប៉ះជើងខ្លាំងមកពីអាស៊ី ជប៉ុន នៅថ្ងៃទី១១ ខែសីហា ឆ្នាំ២០២៣ ឆាប់ខាងមុខនេះ នៅឯកីឡដ្ឋាន Eden Park ដែលមានមូលដ្ឋាននៅទីក្រុងអូកឡិន (Auckland) ប្រទេសនូវែលហ្សេឡង់៕
ចែករំលែកព័តមាននេះ