ភ្ញាក់ផ្អើលនឹងការរកឃើញសរីរៈរាងរបស់មនុស្សនៅកន្លែងចាក់សំរាមនៃកោះផាង៉ាន (Pha-ngan) ខេត្តស៊ូរ៉ាត ថានី (Surat Thani) ប្រទេសថៃ ដែលបង្កការភ្ញាក់ផ្អើលយ៉ាងខ្លាំងនៅក្នុងចំណោមអ្នកស្រុក អ្នកភូមិដែលរស់នៅម្ដុំៗនោះ។ សរីរៈរាងនោះត្រូវគេវេចខ្ចប់នៅក្នុងថង់ផ្លាស្ទិច។…
ភ្ញាក់ផ្អើលនឹងការរកឃើញសរីរៈរាងរបស់មនុស្សនៅកន្លែងចាក់សំរាមនៃកោះផាង៉ាន (Pha-ngan) ខេត្តស៊ូរ៉ាត ថានី (Surat Thani) ប្រទេសថៃ ដែលបង្កការភ្ញាក់ផ្អើលយ៉ាងខ្លាំងនៅក្នុងចំណោមអ្នកស្រុក អ្នកភូមិដែលរស់នៅម្ដុំៗនោះ។ សរីរៈរាងនោះត្រូវគេវេចខ្ចប់នៅក្នុងថង់ផ្លាស្ទិច។ សមត្ថកិច្ចជឿជាក់ថានេះជាបំណែកសាកសពបុរសជនជាតិបរទេសដែលគេមិនទាន់ស្រាវជ្រាវដឹងអត្តសញ្ញាណរបស់គាត់នៅឡើយទេ។ សូម្បីតែគាត់ជាជនជាតិអ្វីក៏គេមិនទាន់ដឹងនៅឡើយដែរ។
សមត្ថកិច្ចសន្និដ្ឋានថានេះជាបំណែកសាកសពជនជាតិបរទេស អាចប៉ែកអឺរ៉ុប ឬអាមេរិក ព្រោះឆ្អឹងត្រគាកនោះមានទំហំធំជាងពួកអាស៊ី។ ក្រោយការរកឃើញនេះ, គេបានបញ្ជូនសរីរៈរាងនោះទៅមន្ទីរពេទ្យកោះផាង៉ានដើម្បីធ្វើកោសល្យវិច័យ។ បំណែកសាកសពបានស្លាប់លើសពី៤៨ម៉ោងមុនពេលគេរកឃើញនៅវាលចាក់សំរាមនៅវេលាម៉ោង១២:៣០ថ្ងៃត្រង់។
ថង់ពណ៌ខៀវដែលវេចខ្ចប់បំណែកសាកសពនៅឡូកឡំជាមួយសំរាមដទៃទៀតដែលដឹកតាមឡានសំរាមចេញពីតំបន់បានថងសាលា (Ban Thong Sala) ដើម្បីបំបែកសំរាមទៅតាមក្រុមផ្សេងៗគ្នា។ បន្ទាប់មក, គេត្រូវដឹកបន្តទៅកន្លែងចាក់សំរាម។ គឺនៅអំឡុងពេលបំបែកសំរាមចេញពីគ្នានេះហើយដែលក្រុមការងារស្រាយថង់ និងរកឃើញបំណែកសាកសពតែម្ដង។ សមត្ថកិច្ចបានហៅអ្នកបើកឡានដឹកសំរាមទៅសាកសួរដើម្បីចង់ដឹងថាតើថង់ពណ៌ខៀវនេះរកឃើញដំបូងនៅកន្លែងណា។
សមត្ថកិច្ចសន្និដ្ឋានថាជនរងគ្រោះទំនងជារងការកាប់សម្លាប់ពីសំណាក់ជនដៃដល់ម្នាក់ ឬលើសពីម្នាក់។ ម៉្យាងទៀត ជនដៃដល់ និងជនរងគ្រោះទំនងជាស្គាល់គ្នាពីមុនមក។ សមត្ថកិច្ចបានរើកកាយសំរាមឃើញសរីរៈរាងរបស់ជនរងគ្រោះនៅក្នុងថង់មួយទៀតពណ៌ខ្មៅ។ គណៈអភិបាលខេត្តស៊ូរ៉ាតថានី រួមទាំងសមត្ថកិច្ច, បុគ្គលិកពេទ្យ និងក្រុមអ្នកធ្វើកោសល្យវិច័យបានចុះទៅកន្លែងកើតហេតុ។ គេបើកថង់ខ្មៅឃើញកំភួនជើង១គូ, អាវយឺតមួយ, ខោជើងខ្លីមួយ និងខោក្នុងពណ៌ក្រហម។
កាលពីថ្ងៃព្រហស្បតិ៍, បុគ្គលិកនៅកន្លែងចាក់សំរាមរកឃើញសរីរៈរាងមួយចំនួនរបស់ជនរងគ្រោះដូចជាត្រគាកដែលត្រូវគេកាត់ជាកង់ៗ រួមទាំងពោះវៀនមនុស្សទម្ងន់៥គីឡូក្រាម។ កាលពីថ្ងៃសុក្រ, សមត្ថកិច្ចនាំខ្លួនជនជាតិអេស្ប៉ាញម្នាក់មកសាកសួរដើម្បីចង់ដឹងថាតើគាត់មានជាប់ពាក់ព័ន្ធនឹងករណីសម្លាប់ជនរងគ្រោះដែរឬទេ។ បុរសនេះមានអាយុប្រហែល៤០ឆ្នាំ។ គាត់បានដាក់ពាក្យប្ដឹងទៅប៉ុស្តិ៍នគរបាលនៅលើកោះផាង៉ាន ដោយប្រាប់ថាគាត់បាត់មិត្តភក្ដិម្នាក់ជាជនជាតិកូឡុំប៊ី។
សូមជម្រាបថានៅកន្លែងចាក់សំរាមនេះមានការយាមកាមយ៉ាងតឹងតែង។ មានតែបុគ្គលិកធ្វើការផ្នែកគ្រប់គ្រងសំរាម និងអ្នកបើកឡានដឹកសំរាមប៉ុណ្ណោះដែលអាចចូលទៅទីនោះបាន។ ដូច្នេះ ករណីដែលថាអ្នកខាងក្រៅយកថង់ដាក់បំណែកសាកសពទៅចោលទីនោះមិនអាចទៅរួចទេ។ សមត្ថកិច្ចយល់ថាថង់ទាំងនេះដឹកចេញពីកន្លែងដទៃ។ ក្រៅពីការរើកកាយសំរាមដើម្បីស្វែងរកបំណែកដទៃទៀតនៃសាកសព, សមត្ថកិច្ចកំពុងសាកសួរមនុស្សមួយចំនួនដើម្បីប្រមូលព័ត៌មានបន្ថែម។
ក្រៅពីនេះ សមត្ថកិច្ចក៏ដើរឆែកមើលវីឌីអូឃ្លីបពីកាមេរ៉ាសុវត្ថិភាពនៅលើកោះផាង៉ាន។ ជាពិសេស នៅតាមសណ្ឋាគារ ឬកន្លែងស្នាក់នៅរបស់ជនជាតិបរទេស។ ធ្វើបែបនេះដើម្បីដេញថយក្រោយទៅរកប្រភពដើមនៃថង់ផ្លាស្ទិចដែលវេចខ្ចប់បំណែកសាកសព។ ដើម្បីទប់ស្កាត់មិនឱ្យជនសង្ស័យអាចរត់គេចខ្លួនចេញពីតំបន់នោះ, សមត្ថកិច្ចបានដាក់បារ៉ាស់បិទខ្ទប់គ្រប់ច្រកចេញចូលនៃកោះផាង៉ានយ៉ាងជិតឈឹងជាបណ្ដោះអាសន្ន។
យោងតាមកាសែតដឹណេសឹន (The Nation), សមត្ថកិច្ចកំពុងតាមប្រមាញ់ជនជាតិបរទេសម្នាក់ដែលជាជនសង្ស័យធំជាងគេនៅក្នុងសំណុំរឿងឃាតកម្មនេះ។ ក្រុមអ្នកស៊ើបអង្កេតកំពុងតាមរកបុរសនោះបន្ទាប់ពីគាត់រត់គេចខ្លួននៅក្នុងកាលៈទេសៈដ៏គួរឱ្យសង្ស័យចេញពីសណ្ឋាគារនៅលើកោះផាង៉ាន។ គេជឿជាក់ថាជនសង្ស័យរូបនេះបានចាកចេញផុតពីកោះផាង៉ានហើយនៅពេលនេះ។ សមត្ថកិច្ចស៊ើបដឹងថាមុនពេលកើតហេតុ, គាត់បានទៅផ្សារដើម្បីទិញកាំបិត និងថង់ផ្លាស្ទិច៕
ប្រភព៖ Bangkok Post និងប្រភពដទៃទៀត
https://www.bangkokpost.com/thailand/general/2623603/spaniard-questioned-over-body-parts-found-in-koh-phangan-landfill
https://www.bangkokpost.com/thailand/general/2623085/body-parts-found-on-koh-phangan
https://www.thaipbsworld.com/human-remains-found-at-garbage-dump-on-pha-ngan-island/
https://thethaiger.com/news/national/body-parts-of-a-foreign-man-found-in-trash-bag-on-koh-pha-ngan
https://www.nationthailand.com/thailand/general/40029937
ចែករំលែកព័តមាននេះ