យោធាធ្វើរដ្ឋប្រហារនៅនីហ្សេប្រកាសពីការបញ្ចប់តំណែងឯកអគ្គរដ្ឋទូតខ្លួនប្រចាំប្រទេសបារាំង និង៣ប្រទេសទៀត
ប្រទេសនីហ្សេ ៖ ពួកយោធាធ្វើរដ្ឋប្រហារនៅនីហ្សេប្រកាសនាយប់ថ្ងៃទី៣ សីហា ពីការបញ្ចប់តំណែង
ប្រទេសនីហ្សេ ៖ ពួកយោធាធ្វើរដ្ឋប្រហារនៅនីហ្សេប្រកាសនាយប់ថ្ងៃទី៣ សីហា ពីការបញ្ចប់តំណែងឯកអគ្គរដ្ឋទូតនីហ្សេប្រចាំប្រទេសបារាំង សហរដ្ឋអាមេរិក នីហ្សេរីយ៉ានិងតូហ្គោ។ សេចក្ដីប្រកាសនោះធ្វើឡើងតាមទូរទស្សន៍ជាតិ ក្នុងពេលកំពុងមានការគាបសង្កត់កាន់តែខ្លាំង ឲ្យស្ដាររបៀបរៀបរយតាមរដ្ឋធម្មនុញ្ញវិញក្នុងប្រទេសនេះ។
នាយទាហានចូលរួមធ្វើ្វរដ្ឋប្រហារម្នាក់ ថ្លែងថា យើងបានបញ្ចប់តំណែងឯកអគ្គរដ្ឋទូតប្រចាំប្រទេសបារាំង នីហ្សេរីយ៉ា តូហ្គោនិងសហរដ្ឋអាមេរិក។ មុននេះបណ្ដាមេរដ្ឋប្រហារផ្ដួលរំលំប្រធានាធិបតី លោកMOHAMED BAZOUM ប្រកាសបរិហារកិច្ចព្រមព្រៀងយោធាជាច្រើន ដែលចុះហត្ថលេខាជាមួយបារាំង ជាអតីតអាណានិគមលើនីហ្សេ ទាក់ទិនជាពិសេស ការបោះទ័ពបារាំងនិងលក្ខន្តិកៈយោធា ដែលមានវត្តមានក្នុងក្របខណ្ឌនៃការតស៊ូប្រឆាំងពួកជីហាដ។
ពួកអ្នកធ្វើរដ្ឋប្រហារក៏ព្រមានផងដែរថាពួកគេនឹងតបតវិញភ្លាមៗ ចំពោះការឈ្លានពានឬការប៉ុនប៉ងឈ្លានពានប្រឆាំងប្រទេសពួកគេរបស់សហគមន៍សេដ្ឋកិច្ចបណ្ដារដ្ឋអាហ្វ្រិកខាងលិច ខណៈសល់ពេលតែ៣ថ្ងៃទៀត ដល់ការផុតកំណត់ឱសានវាទរបស់អង្គការនេះ ឲ្យពួកអ្នកធ្វើរដ្ឋប្រហារស្ដារឡើងវិញរបៀបរបបតាមរដ្ឋធម្មនុញ្ញ។
បារាំងបានប្រកាសរួចហើយពីការបញ្ចប់់ប្រតិបត្តិការជម្លៀសជនជាតិខ្លួននិងជនបរទេសមួយចំនួនចេញពីនីហ្សេ ក្រោយការធ្វើមាតុភូមិនិវត្តន៍មនុស្សប្រមាណជាង១០០០នាក់តាមយន្តហោះ។ ចំណែកសហរដ្ឋអាមេរិកវិញ បានជួលយន្តហោះមួយគ្រឿង ទៅដឹកបុគ្កលិកស្ថានទូតខ្លួនមិនសំខាន់ព្រមទាំងពលរដ្ឋអាមេរិកដែលចង់ចាកចេញ ទៅកាន់ប្រទេសខ្លួនវិញ្៕
ចែករំលែកព័តមាននេះ