ខេត្តព្រៃវែង ៖ តូបលក់គ្រឿងទេសមួយកន្លែងនៅក្នុងផ្សារព្រៃវែងចាស់ ត្រូវបានក្រុមចោរលួចចូលគាស់ទម្លុះទម្លាយ និងប្រមូលយកបារីអស់រាប់រយសុង និងគ្រឿងកំប៉ុងជាច្រើនកេស ដែលសកម្មភាពលួចគាស់តូបក្នុងផ្សារនេះ បានកើតឡើងនៅក្នុងយប់ថ្ងៃទី៣ សីហា នៅក្នុងផ្សារព្រៃវែងចាស់ ស្ថិតក្នុងភូមិលេខ៣ សង្កាត់កំពង់លាវ ក្រុងព្រៃវែង ។
តូបដែលត្រូវចោរលួចគាស់ គឺជាតូបលក់ឥវ៉ាន់ចាប់ហួយ ដែលម្ចាស់មានឈ្មោះ ប៊ុត គង់ ភេទប្រុស អាយុ៤០ឆ្នាំ មានទីលំនៅក្នុងភូមិលេខ៥ សង្កាត់កំពង់លាវ ក្រុងព្រៃវែង ។
តាមរបាយការណ៍របស់សមត្ថកិច្ច គេមិនបានដឹងថា ក្រុមចោរបានចូលធ្វើសកម្មភាពគាស់តូបរបស់អាជីវករតាំងពីម៉ោងប៉ុន្មាននោះទេ គឺរហូតដល់ព្រឹកឡើងថ្ងៃទី៤ សីហា នេះ នៅពេលដែលម្ចាស់តូបចូលមកបើកតូបលក់ដូចធម្មតា ក៏ស្រាប់តែឃើញតូបរបស់ខ្លួន ត្រូវគាស់ធ្លុះធ្លាយអស់ទៅហើយ និងបាត់របស់អស់ជាច្រើន ទើបប្តឹងមកខាងសមត្ថកិច្ចភ្លាមៗតែម្តង។
តាមការបញ្ជាក់របស់ម្ចាស់តូប ទំនិញក្នុងតូបដែលបាត់រួមមាន
១/ បារីហ្វីន ៥០ សុង
២/ បារីសេក ៥០ សុង
៣/ បារីអ៊ីសសេ ៥០ សុង
៤/ បារីម៉ៃសេវេន ៥០ សុង
៥/ ត្រីខ ១កេស១០ យូរ
៦/ ដោះគោឆៅ ១កេស ដែលសរុបគិតជាទឹកប្រាក់អស់ចំនួន ៧.៨៩៨.០០០រៀល ។
ដោយឡែក វត្ថុតាងដែលក្រុមចោរបានបន្សល់ទុកនៅកន្លែងកើតហេតុរួមមាន:
១/ កូនកាំបិតជិតផ្លែឈើ ០១
២/ តាកាប់មុខស្រួចតូច ០១
៣/ ដងរណាសម្រាប់អាមាស ០១
៤/ ដែកឆាតតូច ០១
៥/ ពិលបំភ្លឺតូច ០១
៦/ មេសោពណ៌ខ្មៅ ០១
៧/ សំបកកំប៉ុងត្រីខរូបស្រីបីនាក់០២ កំប៉ុង ។
បច្ចុប្បន្ន កម្លាំងសមត្ថកិច្ចកំពុងស្រាវជ្រាវទៅតាមជំនាញ ប៉ុន្តែនៅមិនទាន់មានពន្លឺអ្វី ដែលអាចឈានទៅរកចាប់ក្រុមចោរបាននៅឡើយទេ។
ព័ត៌មានបន្ថែម កោះសន្តិភាពនឹងមានផ្សាយជូនបន្ត ។
ចែករំលែកព័តមាននេះ