ពិសេសណាស់! រកឃើញបាក់តេរី១ប្រភេទ អាចជួយបញ្ឈប់ការចម្លងជំងឺគ្រុនចាញ់
អេស្ប៉ាញ ៖ ក្រុមអ្នកវិទ្យាសាស្ត្របានរកឃើញបាក់តេរីកើតឡើងតាមធម្មជាតិ១ប្រភេទ ដែលអាច
អេស្ប៉ាញ ៖ ក្រុមអ្នកវិទ្យាសាស្ត្របានរកឃើញបាក់តេរីកើតឡើងតាមធម្មជាតិ១ប្រភេទ ដែលអាចជួយបញ្ឈប់ការចម្លងជំងឺគ្រុនចាញ់ពីមូសទៅមនុស្ស។ ក្រុមអ្នកវិទ្យាសាស្ត្របានរកឃើញវាដោយចៃដន្យ បន្ទាប់ពីហ្វូងមូសក្នុងការពិសោធន៍មួយមិនបានបង្កើតប៉ារ៉ាស៊ីតបង្កជំងឺគ្រុនចាញ់។ នេះបើយោងតាមប្រភពពីសារព័ត៌មាន BBC ចេញផ្សាយនៅថ្ងៃទី០៤ ខែសីហា ឆ្នាំ ២០២៣ ។
ក្រុមអ្នកស្រាវជ្រាវបានអះអាងថា បាក់តេរីនេះ អាចជាសមាសភាពដំសំខាន់ថ្មី សម្រាប់ប្រយុទ្ធប្រឆាំងនឹងជំងឺដ៏ចំណាស់បំផុតមួយរបស់ពិភពលោក ដែលបានសម្លាប់មនុស្សប្រមាណ ៦០ម៉ឺននាក់ជារៀងរាល់ឆ្នាំ ខណៈដែលការសាកល្បងវាយតម្លៃសុវត្ថិភាពរបស់វានៅក្នុងពិភពពិត ឥឡូវនេះកំពុងតែប្រព្រឹត្តទៅហើយ។
ក្រុមអ្នកវិទ្យាសាស្ត្រនៅឯកន្លែងស្រាវជ្រាវមួយក្នុងប្រទេសអេស្ប៉ាញ ដែលគ្រប់គ្រងដោយក្រុមហ៊ុនឱសថ GSK បានធ្វើរបកគំហើញនេះ បន្ទាប់ពីបានកត់សម្គាល់ឃើញថា សត្វមូសនៅក្នុងការពិសោធន៍ ដែលត្រូវបានប្រើប្រាស់សម្រាប់ការអភិវឌ្ឍថ្នាំបានបញ្ឈប់ការចម្លងជំងឺគ្រុនចាញ់។ វេជ្ជបណ្ឌិត Janneth Rodrigues ដែលដឹកនាំកម្មវិធីបាននិយាយថា «អត្រានៃការឆ្លងនៅក្នុងសត្វមូសចាប់ផ្តើមថយចុះ ហើយដូច្នេះនៅចុងឆ្នាំនេះ មូសនឹងមិនត្រូវបានឆ្លងប៉ារ៉ាស៊ីតគ្រុនចាញ់នោះទេ»។
ក្រុមអ្នកវិទ្យាសាស្ត្រនេះ បានបង្កកសំណាកពីការពិសោធន៍ឆ្នាំ ២០១៤ របស់ពួកគេ ហើយយកមកធ្វើការពិសោធន៍វិញ នៅ២ឆ្នាំក្រោយ ដើម្បីស្វែងយល់ពីអ្វីដែលបានកើតឡើង។ ការសិក្សាបន្ថែមបានបង្ហាញថា បាក់តេរីជាក់លាក់មួយប្រភេទ «TC1» ដែលមានវត្តមាននៅក្នុងបរិស្ថានធម្មជាតិបានបញ្ឈប់ការវិវត្តនៃប៉ារ៉ាស៊ីតជំងឺគ្រុនចាញ់នៅក្នុងពោះវៀនរបស់មូស។ វេជ្ជបណ្ឌិត Rodrigues បន្តថា «នៅពេលដែលវាគ្រប់ដណ្តប់លើមូស វាមានរយៈពេលពេញមួយជីវិត។ ហើយយើងបានរកឃើញថា វាគឺជាបាក់តេរីដែលមានតួនាទីកាត់បន្ថយការចម្លងតាមមូសទាំងនោះ»។
ទិន្នន័យថ្មី ដែលបានចុះផ្សាយក្នុងទស្សនាវដ្ដីវិទ្យាសាស្ត្របានបង្ហាញថា បាក់តេរីអាចកាត់បន្ថយការផ្ទុកប៉ារ៉ាស៊ីតរបស់មូសបានដល់ទៅ ៧៣%។ បាក់តេរីនេះ ធ្វើការដោយសម្ងាត់នូវម៉ូលេគុលតូចមួយ ដែលត្រូវបានគេស្គាល់ថា Harmane ដែលរារាំងដំណាក់កាលដំបូងនៃប៉ារ៉ាស៊ីតជំងឺគ្រុនចាញ់ ដែលរីកលូតលាស់នៅក្នុងពោះវៀនរបស់មូស។
យ៉ាងណាមិញ ការសាកល្បងបន្ថែមទៀត ឥឡូវនេះ កំពុងធ្វើឡើងនៅឯកន្លែងស្រាវជ្រាវវាលដែលមានឈ្មោះ MosquitoSphere នៅក្នុងប្រទេសបួគីណាហ្វាសូ ដើម្បីវាយតម្លៃថា តើវាមានប្រសិទ្ធភាព និងសុវត្ថិភាពប៉ុនណាក្នុងការប្រើ Harmane តាមមាត្រដ្ឋាននៅក្នុងពិភពពិត?
ក្តីសង្ឃឹមនោះគឺថា តាមរយៈការបង្កើតអន្តរាគមន៍ ដែលផ្អែកលើបាក់តេរីនេះទៅក្នុងផលិតផលមួយ អ្នកវិទ្យាសាស្ត្រអាចនឹងមានសមាសភាពដ៏សំខាន់មួយផ្សេងទៀត ដើម្បីប្រឆាំងនឹងជំងឺគ្រុនចាញ់ដ៏កា.ចសាហា.វ។
គួរបញ្ជាក់ថា ជំងឺគ្រុនចាញ់បានសម្លាប់មនុស្សប្រហែល ៦២០,០០០នាក់ក្នុងមួយឆ្នាំ ដែលជារឿយៗជាកុមារដែលមានអាយុក្រោម៥ឆ្នាំ។ ឥឡូវនេះ វ៉ាក់សាំងត្រូវបានបង្កើតឡើង ប៉ុន្តែនៅតែស្ថិតក្នុងដំណាក់កាលដំបូងនៃការដាក់ឱ្យប្រើប្រាស់នៅទ្វីបអាហ្វ្រិក៕
ចែករំលែកព័តមាននេះ