រាជធានីភ្នំពេញ ៖ មូលនិធិស្ត្រីសម្តេចរស្មីសោភ័ណ ដែលមានទីតាំងនៅជាប់ក្រសួងឧស្សាហកម្ម រ៉ែ និងថាមពល បានរៀបចំពិធីចែកអំណោយដល់កុមារក្រីក្របំផុតចំនួន១៣៥នាក់។ ពិធីចែកអំណោយនេះធ្វើឡើងកាលពីថ្ងៃទី១០ ឧសភា នៅទីស្នាក់ការមូលនិធិ ក្រោមអធិបតីភាពព្រះអង្គម្ចាស់ក្សត្រី នរោត្តម ម៉ារី ទីប្រឹក្សាអមព្រះរាជខុទ្ទកាល័យព្រះមហាក្សត្រ។
កុមារម្នាក់ៗទទួលបានអាវភ្លៀង១ ប៊ិច ខ្មៅដៃ ទឹកសណ្តែក ទឹកសុទ្ធ នំធុងម្នាក់១កញ្ចប់ និងប្រាក់៧ម៉ឺនរៀល។ មូលនិធិស្ត្រីសម្តេចរស្មីសោភ័ណ គឺជាអង្គការក្រៅរដ្ឋាភិបាលមួយដែលធ្វើការផ្តោតទៅលើការជួយចិញ្ចឹមដល់ស្ត្រី និងកុមារដែលមានគ្រួសារក្រីក្របំផុតមិនមានលទ្ធភាពទៅសាលារៀនបាន។ មូលនិធិស្ត្រីសម្តេចរស្មីសោភ័ណជួយឧបត្ថម្ភកុមាររហូតដល់បញ្ចប់បឋមសិក្សាដោយផ្គត់ផ្គង់ដូចជាសៀវភៅ ប៊ិច ខោអាវ សាប៊ូ ស្បែកជើង និងថវិកាប្រចាំខែម្នាក់ៗ១០ដុល្លារ។
មូលនិធិស្ត្រីសម្តេចរស្មីសោភ័ណមានគម្រោងចំនួន៤ដែលបាននិងកំពុងអនុវត្តនាពេលបច្ចុប្បន្ន គឺទី១-ផ្តោតទៅលើការយកចិត្តទុកដាក់ក្នុងការជួយស្ត្រី និងកុមារឱ្យបានចូលសាលារៀន, ទី២-ផ្តល់ជំនាញវិជ្ជាជីវិៈតម្បាញដល់ស្ត្រីដែលប្រកបការងារតម្បាញ ដើម្បីឱ្យមានជំនាញវិជ្ជាជីវៈពិតប្រាកដ, ទី៣-ចែករទេះជនពិការដល់ជនពិការនៅក្នុងប្រទេសកម្ពុជាដែលរហូតមកទល់នឹងពេលនេះ គឺមានរទេះជនពិការចំនួន២.២០០រទេះហើយដែលបានផ្តល់ដល់ដៃជនពិការក្នុងប្រទេសកម្ពុជា និងទី៤-កម្មវិធីកែច្នៃសូត្រខ្មែរឱ្យក្លាយជាផលិតផលមានគុណភាពតាមស្តង់ដា ទំនើបទាន់សម័យ ដើម្បីប្រកួតប្រជែងនៅក្នុងទីផ្សារអន្តរជាតិ៕
ចែករំលែកព័តមាននេះ