ជនសង្ស័យម្នាក់បានយកកាំបិតដេញចាក់មនុស្ស បណ្ដាលឱ្យរងរបួស៩នាក់ និងបើកឡានដេញបុកមនុស្ស៤នាក់ទៀតបណ្ដាលឱ្យរងរបួសដូចគ្នានៅទីក្រុងសឹងណាម (Seongnam) ជិតទីក្រុងសេអ៊ូល ប្រទេសកូរ៉េខាងត្បូង។ នេះបើយោងតាមការអះអាងរបស់សមត្ថកិច្ច។ មនុស្សយ៉ាងតិចម្នាក់បានស្លាប់ដោយសារមុខរបួសដែលចាក់នឹងកាំបិតមានសភាពធ្ងន់ធ្ងរពេក។
ក្រោយមក សមត្ថកិច្ចចាប់ខ្លួនជនសង្ស័យម្នាក់។ ហេតុការណ៍នេះ កើតឡើងនៅស្ថានីយរថភ្លើងស៊ូហ៊ីយន់ (Seohyeon) ដែលស្ថិតនៅចម្ងាយម្ភៃគីឡូម៉ែត្រពីទីក្រុងសេអ៊ូល និងជាតំបន់ដែលមានអគារលក់ទំនិញដ៏ធំ មានហាងលក់ដូរ និងផ្ទះរបស់អ្នកស្រុក។ សមត្ថកិច្ចអះអាងថាជនរងគ្រោះ១២នាក់ត្រូវគេដឹកយកទៅព្យាបាលមុខរបួសនៅមន្ទីរពេទ្យ។ តាមរយៈរូបថតមួយចំនួន, គេឃើញថាកម្រាលឥដ្ឋប្រឡាក់ដយតំណក់ឈាម និងឃើញឧទ្ធម្ភាគចក្រ១គ្រឿងនៅក្បែរទីតាំងកើតហេតុ។
សូមរម្លឹកថាកាលពីថ្ងៃទី២១ ខែកក្កដា ក៏មានហេតុការណ៍ដេញចាក់មនុស្សស្រដៀងគ្នានឹងហេតុការណ៍នេះដែរ។ ហេតុការណ៍នោះកើតឡើងនៅទីក្រុងសេអ៊ូល បណ្ដាលឱ្យមនុស្សម្នាក់ស្លាប់ និង៣នាក់រងរបួស។ សឹងណាមជាទីក្រុងរណប និងជាចំណុចប្រសព្វនៃទីក្រុងសេអ៊ូល និងសង្កាត់ប៊ុនដាង (Bundang)។ ទីនេះធ្លាប់មានសុវត្ថិភាពល្អណាស់សម្រាប់អ្នកដំណើរតាមយានជំនិះ ឬអ្នកដំណើរថ្មើរជើង។
ប៉ុន្តែបន្ទាប់ពីមានហេតុការណ៍ចាក់មនុស្សស្រស់ៗចំនួន២ដងត្រឹមតែរយៈពេលប៉ុន្មានថ្ងៃនេះធ្វើឱ្យមនុស្សសម្ដែងការព្រួយបារម្ភនៅលើបណ្ដាញសង្គម។ អ្នកខ្លះសរសេរនៅលើបណ្ដាញទ្វីតថឺថាករណីចាក់មនុស្សនៅក្បែរស្ថានីយរថភ្លើងនៃទីក្រុងសឹងណាមនោះ គួរឱ្យភ័យខ្លាចខ្លាំងមែនទែន។ ពួកគេដាក់ជាសំណួរថាតើឱ្យយើងធ្វើដំណើរទៅណាម្ដងៗមានអារម្មណ៍ស្រណុកខ្លួនយ៉ាងម៉េចនឹងកើតបើហេតុការណ៍បែបហ្នឹងបានកើតឡើងរួចទៅហើយ?
ប្រភព៖ Channel News Asia
https://www.channelnewsasia.com/asia/seoul-stabbing-south-korea-thirteen-3675351
ចែករំលែកព័តមាននេះ