ខេត្តព្រះសីហនុ ៖ សមត្ថកិច្ច ឲ្យ​ដឹង​ថា ជំនន់ទឹកភ្លៀង បានកើតឡើងជាថ្មីទៀត នៅផ្លូវជាតិលេខ៤ ចំណុចស្ពានអូរគគីរ គីឡូម៉ែត្រលេខ១០៦-១០៧​ ជាប់ព្រំប្រទល់ជាមួយ​ខេត្តព្រះសីហនុ នារសៀលថ្ងៃ៣សីហា ឆ្នាំ​២០២៣​នេះ។

ករណីនេះ សមត្ថកិច្ចនគរបាល បាន​ជួយ​​សម្រួល​​ចរាចរណ៍​សណ្ដាប់​ធ្នាប់​ និងសំណូមពរឲ្យ​អ្នកបើកបរ​រថយន្តធុនធំផ្អាកការឆ្លងកាត់ជាបណ្ដោះអាសន្ន ​រង់ចាំ​ទឹក​ស្រក​បន្ដិច​ ដើម្បី​ការពារកុំឲ្យ​ខូចខាតផ្លូវ ឬកើតមានគ្រោះថ្នាក់ផ្សេងៗជាយថាហេតុ​។

សូមរម្លឹកថា ក្នុងពេលមានភ្លៀងខ្លាំង កាលពីល្ងាចថ្ងៃទី២៨ ខែកក្កដា ចុងសប្តាហ៍មុន ក៏បាន​បណ្តាល​ឱ្យ​​លិច​កំណាត់ផ្លូវជាតិលេខ៤ នៅចំណុ​ចអូរគគីរ​ រហូតដល់​ផ្អាកចរាចរណ៍បណ្តោះ​អាសន្ន​ផងដែរ​។ តែក្រោយពីទឹកស្រកអស់ទៅវិញ ចរាចរណ៍បានបើកដំណើរការជាធម្មតា​ឡើងវិញ៕