សូម៉ាលីស៊ើបអង្កេតករណីយកអត្តពលិករត់មិនបានហ្វឹកហាត់ ទៅប្រកួតកីឡាអន្តរជាតិនាំភាពអាម៉ាស់
សូម៉ាលី ៖ ផ្ទុះការអំពាវនាវកក្រើកនៅក្នុងប្រទេសសូម៉ាលី ឱ្យបណ្តេញមន្ត្រីកីឡាចេញពីតំណែង បន្ទាប់
សូម៉ាលី ៖ ផ្ទុះការអំពាវនាវកក្រើកនៅក្នុងប្រទេសសូម៉ាលី ឱ្យបណ្តេញមន្ត្រីកីឡាចេញពីតំណែង បន្ទាប់ពីបានជ្រើសរើសកីឡាការិនីរត់ប្រណាំង ដែលមិនបានហ្វឹកហាត់ទៅចូលរួមប្រកួតរត់ចម្ងាយវិញ្ញាសា១០០ម៉ែត្រ នៃព្រឹត្តិការណ៍កីឡាសាកលវិទ្យាល័យលំដាប់ពិភពលោក នៅក្នុងប្រទេសចិន ដោយបញ្ចប់នៅលេខរៀងចុងក្រោយគេ ជាមួយកំណត់ត្រាដ៏អាក្រក់បំផុត។ នេះបើយោងតាមប្រភពពីសារព័ត៌មាន BBC ចេញផ្សាយនៅថ្ងៃទី០៣ ខែសីហា ឆ្នាំ២០២៣។
លោក Mohamed Barre Mohamud រដ្ឋមន្ត្រីកីឡារបស់ប្រទេសសូម៉ាលី បានចេញមុខសុំទោសជាសាធារណៈចំពោះប្រជាជនសូម៉ាលីទាំងមូល សម្រាប់ការជ្រើសរើសកីឡាការិនី Nasra Abubakar Ali ដែលគ្មានបទពិសោធន៍ក្នុងការប្រកួតកម្រិតអន្តរជាតិកំពូលពីមុនមក ទៅចូលរួមនៅព្រឹត្តិការណ៍ដ៏ធំនៅប្រទេសចិន។ កីឡាការិនីរូបនេះ បានបញ្ចប់ការរត់ប្រណាំងរបស់ខ្លួនចុងក្រោយគេ ដោយប្រើថេរវេលា ២១.៨១វិនាទី ពោលច្រើនជាង១០វិនាទីពីក្រោយអ្នកឈ្នះនៃការរត់នេះ។
ការដែលកីឡាការិនីរូបនេះ ត្រូវបានរាយការណ៍ថា គ្មានបទពិសោធន៍ក្នុងការប្រកួតប្រជែងពីមុនបានធ្វើឱ្យប្រជាជនសូម៉ាលីជាច្រើនមានចម្ងល់យ៉ាងខ្លាំងថា ហេតុអ្វីបានជានាងត្រូវបានជ្រើសរើសជាកីឡាការិនីតំណាងជាតិ? ខណៈដែលអ្នកលេងបណ្តាញសង្គមមួយចំនួនបានអះអាងថា នាងគឺជាក្មួយស្រីរបស់អនុប្រធានជាន់ខ្ពស់ នៃសហព័ន្ធអត្តពលកម្មសូម៉ាលី ប៉ុន្តែការអះអាងនេះ នៅមិនទាន់បញ្ជាក់ថា ជាការពិតឬក៏អត់នោះទេ។
នៅក្នុងសេចក្តីប្រកាសព័ត៌មាន ដែលត្រូវបានបង្ហោះលើទំព័រហ្វេសប៊ុកសមាគមកីឡាសាកលវិទ្យាល័យរបស់សូម៉ាលីបានអះអាងថា ខ្លួនមិនបានជ្រើសរើសអត្តពលិកណាម្នាក់ឱ្យចូលរួមប្រកួតក្នុងព្រឹត្តិការណ៍នេះទេ។ ពាក់ព័ន្ធជុំវិញបញ្ហានេះ សហព័ន្ធអត្តពលកម្មសូម៉ាលី តាមសេចក្តីរាយការណ៍បានយល់ព្រមបើកការស៊ើបអង្កេតលើរបៀបដែលកីឡាការិនី Nasra Abubakar Ali ត្រូវបានជ្រើសរើសតំណាងជាតិ៕
ចែករំលែកព័តមាននេះ