រាជធានីភ្នំពេញ ៖ និយាយដល់ «លុយ» គ្មាននរណាម្នាក់ដែលថា មិនស្រលាញ់លុយនោះទេ តែមិនមែនស្រលាញ់លុយរហូតដល់ថ្នាក់ទៅប្រព្រឹត្តបទល្មើសអ្វីមួយឡើយ ។ ស្រលាញ់លុយ គឺត្រូវចេះរកលុយក្នុងវិធីដ៏ត្រឹមត្រូវ…
រាជធានីភ្នំពេញ ៖ និយាយដល់ «លុយ» គ្មាននរណាម្នាក់ដែលថា មិនស្រលាញ់លុយនោះទេ តែមិនមែនស្រលាញ់លុយរហូតដល់ថ្នាក់ទៅប្រព្រឹត្តបទល្មើសអ្វីមួយឡើយ ។ ស្រលាញ់លុយ គឺត្រូវចេះរកលុយក្នុងវិធីដ៏ត្រឹមត្រូវ ព្រោះនៅពេលមនុស្សមានស្ថេរភាពហិរញ្ញវត្ថុ នោះពួកគាត់អាចចូលរួមចំណែកយ៉ាងច្រើនដល់សង្គមគ្រួសារ និងសង្គមជាតិ ។
តែក្តីប៉ងប្រាថ្នារបស់មនុស្សម្នាក់ៗមិនដូចគ្នាទេ ។ តួយ៉ាងខ្លះកើតមកលើគំនរទ្រព្យសម្បត្តិមានឪពុកម្តាយទំនុកបម្រុងគ្រប់យ៉ាងទាំងសម្ភារៈ និងការសិក្សា ខណៈក្មេងខ្លះកើតមកក្នុងគ្រួសារដែលក្រីក្រខំប្រឹងតស៊ូទៅមុខ ដើម្បីទទួលបានការសិក្សាទាំងលំបាក។
យ៉ាងណាមិញ កើតមកជាមនុស្សពេលធំដឹងក្តី សឹងតែគ្រប់គ្នាមិនថា ស្រី ឬបុរសនោះទេ គឺតែងចង់បានគ្រួសារល្អ មានសេរីភាពហិរញ្ញវត្ថុ និងសុខភាពល្អ ។ តែមិនមែនគ្រប់យ៉ាងសុខតែសមប្រកបតាមចិត្តចង់នោះទេ ព្រោះមានកត្តាខ្លះជំរុញឱ្យមនុស្សត្រូវបោះបង់ការសិក្សា ឬត្រូវធ្វើអ្វីផ្សេងទៀតដែលចិត្តមិនចង់បាន ។
ងាកមកអ្នកជំនាញខាងហិរញ្ញវត្ថុមួយរូប បានបង្ហាញនូវការពិតដ៏កំសត់៣យ៉ាងរបស់មនុស្ស ដែលផ្ទុយពីការចង់បាន គឺគ្រួសារល្អ សេរីភាពហិរញ្ញវត្ថុ និងសុខភាពល្អ ។ លោក ង៉ែត ជូ អ្នកជំនាញហិរញ្ញវត្ថុមួយរូបនៅកម្ពុជា បានចែករំលែកថា អ្វីដែលផ្ទុយពីការចង់បានគ្រួសារល្អ សេរីភាពហិរញ្ញវត្ថុ និងសុខភាពល្អ គឺរួមមាន ៖ មនុស្សចំណាយពេល១០-២០ឆ្នាំរៀន ចំណេះដឹងទូទៅ និងជំនាញដើម្បីរកប្រាក់ចិញ្ចឹមជីវិត ។ ប៉ុន្តែគ្រប់គ្នាត្រូវប្រឈមនឹងការពិតដ៏កំសត់៣យ៉ាងគឺ ៖
១) រៀបការ ដើម្បីរៀបចំគ្រួសារតាមទម្លាប់តៗគ្នាដោយមិនបានរៀនសូត្រពីរបៀបរស់នៅ និងដឹកនាំគ្រួសារ ។ ចំណុចទី ២) លោក ង៉ែត ជូ មានប្រសាសន៍ថា «ជីវិតរស់នៅត្រូវចាត់ចែងហិរញ្ញវត្ថុ ប៉ុន្តែបងប្អូនយើងខ្លះមិនបានរៀនពីរបៀបចាត់ចែងអោយបានត្រឹមត្រូវឡើយ» ។ ចំណែកចំណុចទី៣ គឺលោក ង៉ែត ជូ បានលើកឡើងថា រឿងសុខភាពល្អវិញ គឺសំដៅដល់រាងកាយចិត្ត និងគំនិត គឺជាទ្រព្យខាងក្នុង និងជាទ្រព្យពិតដ៏មានតម្លៃបំផុត ប៉ុន្តែមួយថ្ងៃៗយើងចំណាយពេលច្រើនពេកដើម្បីរកប្រាក់ទិញសម្ភារដែលជាទ្រព្យសម្បត្តិក្រៅខ្លួនទៅវិញ ។
លោក ង៉ែត ជូ បានបន្តថា «ក្នុងន័យនេះ ខ្ញុំយល់ថា យើងគប្បីកែសំរួលកម្មវិធីសិក្សាគ្រប់កំរិតអោយស៊ីសង្វាក់នឹងទិដ្ឋភាពនៃការរស់នៅក្នុងសង្គម និងតំរូវការចាំបាច់នៃជីវិត»។
អ្នកប្រើប្រាស់បណ្តាញសង្គម និងពលរដ្ឋបានលើកឡើងថា ពលរដ្ឋខ្មែរមួយចំនួន គឺខ្វះខាតការយល់ដឹងអំពីការគ្រប់គ្រងហិរញ្ញវត្ថុ ពិសេស គឺការនិយមសម្តែងសម្ភារៈនិយម ទើបបងប្អូនមួយចំនួន ប្រឹងប្រែងសម្ញែងសម្ភារៈបង្អួតគ្នា ដោយមិនបានគិតគូរអំពីលទ្ធភាពនៃការសងបំណុល៕
ចែករំលែកព័តមាននេះ