សំណង់បេតុងដ៏រឹងមាំមួយ ដែលសង់រំលោ.ភលើដីច្រាំងទន្លេ នៅមុខអធិការដ្ឋាននគរបាលស្រុកពាមរក៍ កំពុងក្លាយជាប្រធានបទដ៏ក្តៅគគុកមួយ ដែលគេលើកយកមកជជែកវែកញែកនៅតាមតៀមកាហ្វេ
ខេត្តព្រៃវែង ៖ សំណង់បេតុងដ៏រឹងមាំមួយ ដែលសង់រំលោ.ភលើដីច្រាំងទន្លេ នៅមុខអធិការដ្ឋាននគរបាលស្រុកពាមរក៍ កំពុងក្លាយជាប្រធានបទដ៏ក្តៅគគុកមួយ ដែលគេលើកយកមកជជែកវែកញែកនៅតាមតៀមកាហ្វេ ក្នុងស្រុកពាមរក៍ ដោយរិះគន់ទៅលើអាជ្ញាធរមូលដ្ឋានថា អសមត្ថភាព បណ្តែតបណ្តោយឱ្យគេរំលោ.ភយកដីច្រាំងទន្លេស្រេចតែចិត្ត ។
សំណង់បេតុងដែលរំលោ.ភលើដីច្រាំងទន្លេនេះ គេសាងសង់បានប្រមាណ៣០ភាគរយហើយ ដែលតាមគម្រោងរបស់ម្ចាស់សំណង់នេះ គឺគេធ្វើជាហាងលក់បាយផង និងកាហ្វេផង ហើយម្ចាស់សំណង់បានអះអាងថា គាត់ធ្វើហាងនេះ គឺក្មួយរបស់គាត់ ឯកឧត្តម ពេជ្រ ជីវ័ន្ត ជាអ្នកអនុញ្ញាតឱ្យធ្វើ ។
ចំពោះករណីសំណង់រំលោ.ភលើដីច្រាំងទន្លេនេះ លោកស្រី សេង ទៀង អភិបាលស្រុកពាមរក៍ បានឲ្យដឹងថា កាលមុនពេលបោះឆ្នោត អាជ្ញាធរស្រុកធ្លាប់បានហៅម្ចាស់សំណង់មកធ្វើកិច្ចសន្យាបញ្ឈប់ការសាងសង់ នៅសាលាស្រុកម្តងរួចមកហើយ និងបានចាត់ឲ្យលោកមេឃុំ ចាំតាមមើលផងដែរ ។ ដូច្នេះ បើគេនៅធ្វើទៀត ត្រូវសួរទៅលោកមេឃុំ ហេតុអ្វីឲ្យគេធ្វើទៀត ?
ដោយឡែកលោក អឿ លុច មេឃុំពាមរក៍ បានឲ្យដឹងថា ចំពោះសំណង់នេះ លោកបានបញ្ជាឲ្យគេចុះទៅឃាត់ហើយ ប៉ុន្តែម្ចាស់សំណង់រឹងរូស មិនស្តាប់អាជ្ញាធរ ហើយនៅតែបន្តធ្វើទៀត ពេលនេះលោកក៏មិនដឹងធ្វើម៉េចដែរ ។
ជុំវិញបញ្ហាខាងលើនេះ មហាជនបានលើកឡើងថា គេមិនចង់បានការដោះសារយករួចខ្លួន តាមរបៀបឆ្លើយដាក់គ្នា ពីស្រុកទៅឃុំ ពីឃុំទៅស្រុកបែបនេះទេ គឺគេចង់ឃើញចំណាត់ការដែលមានប្រសិទ្ធភាពរបស់អាជ្ញាធរ បើឃាត់គេមិនស្តាប់ តើចាត់ការបែបណាទៀត ?
ចែករំលែកព័តមាននេះ