មានករណីគ្រោះថ្នាក់ចរាចរណ៍រវាងរថយន្ត និងរថយន្ត បន្ទាប់មកក៏សងសំណងចំនួន១៥០ដុល្លារដើម្បីបញ្ចប់រឿងនៅនឹងកន្លែងកើតហេតុតែម្តង បង្កឱ្យមានការភ្ញាក់ផ្អើល
ខេត្តព្រះសីហនុ ៖ បើតាមសេចក្តីរាយការណ៍បានឱ្យដឹងថា មានករណីគ្រោះថ្នាក់ចរាចរណ៍រវាងរថយន្ត និងរថយន្ត បន្ទាប់មកក៏សងសំណងចំនួន១៥០ដុល្លារដើម្បីបញ្ចប់រឿងនៅនឹងកន្លែងកើតហេតុតែម្តង បង្កឱ្យមានការភ្ញាក់ផ្អើលកាលពីវេលាម៉ោង១២និង៤៥នាទីយប់រំលងអធ្រាត្រឈានចូលថ្ងៃទី០៣ ខែសីហា ឆ្នាំ២០២៣ នៅត្រង់ចំណុចផ្លូវបំបែកជាបួនកាស៊ីណូប៉ោឡាយ តាមបណ្ដោយផ្លូវឯករាជ្យ ស្ថិតក្នុងភូមិ៤ សង្កាត់៤ ក្រុងព្រះសីហនុ។
យោងតាមប្រភពព័ត៌មានពីកន្លែងកើតហេតុ បានប្រាប់ឱ្យដឹងថា មុនពេលកើតហេតុ គេបានឃើញរថយន្តមួយគ្រឿង ម៉ាក Pruse ពណ៌ស ពាក់ផ្លាកលេខ ភ្នំពេញ2AQ-0229 បើកបរដោយបុរសម្នាក់ ជាជនជាតិខ្មែរ ធ្វើដំណើរក្នុងទិសដៅពីលិចទៅកើត លុះមកដល់កន្លែងកើតហេតុ ក៏ស្រាប់តែមានរថយន្តមួយគ្រឿងទៀត ម៉ាក GS300 ពណ៌ស ពាក់ស្លាកលេខ ភ្នំពេញ2BA-0750 បើកបរដោយស្ត្រីម្នាក់ ក្នុងទិសដៅពីជើងទៅត្បូង ក៏ជ្រុលមកបុកគ្នាតែម្តង ប៉ុន្តែមិនមាននរណាម្នាក់រងរបួសនោះទេ។
ក្រោយពេលកើតហេតុ មន្ត្រីសមត្ថកិច្ចនគរបាលចរាចរណ៍ផ្លូវគោក បានធ្វើការវាស់វែង និងកំណត់ហេតុរួច ក៏បានអោយភាគីទាំងសងខាងចរចាគ្នា និងព្រមបញ្ចប់រឿង ដោយភាគីខាងរថយន្ត Pruse ព្រមសងសំណងទៅឱ្យរថយន្ត GS300 ចំនួន១៥០ដុល្លារ ដើម្បីបញ្ចប់រឿងនៅនឹងកន្លែងកើតហេតុ។
ចែករំលែកព័តមាននេះ