នៅចុងខែសីហានេះ កម្ពុជានឹងបង្កើតរដ្ឋាភិបាលថ្មី ក្រោមការដឹកនាំរបស់លោក ហ៊ុន ម៉ាណែត ហើយរដ្ឋមន្ត្រីជាច្រើននឹងត្រូវដកចេញ ឬប្តូរដាក់អ្នកថ្មីដែលជាមនុស្សជំនាន់ថ្មី ។ ការផ្លាស់ប្តូរនោះ ក៏រួមមានផងដែរ…
នៅចុងខែសីហានេះ កម្ពុជានឹងបង្កើតរដ្ឋាភិបាលថ្មី ក្រោមការដឹកនាំរបស់លោក ហ៊ុន ម៉ាណែត ហើយរដ្ឋមន្ត្រីជាច្រើននឹងត្រូវដកចេញ ឬប្តូរដាក់អ្នកថ្មីដែលជាមនុស្សជំនាន់ថ្មី ។ ការផ្លាស់ប្តូរនោះ ក៏រួមមានផងដែរ ការផ្លាស់ប្តូររដ្ឋមន្ត្រីក្រសួងការបរទេស ។ នេះបើតាមតារាងបញ្ជីគណរដ្ឋមន្ត្រីព្រាងមួយដែលផ្សព្វផ្សាយតាមបណ្តាញសង្គម ។
តើការការឡើងកាន់អំណាចរបស់លោក ហ៊ុន ម៉ាណែត និងរដ្ឋមន្ត្រីវ័យក្មេងជាច្រើននោះនឹងជាសញ្ញាអាចនាំដល់ការផ្លាស់ប្តូរនយោបាយសំខាន់ៗរបស់កម្ពុជា ពិសេសនយោបាយការបរទេសដែរឬទេ?
តាមសារនយោបាយដែលប្រមុខដឹកនាំគណបក្សកាន់អំណាចបានប្រកាស កាលពីថ្ងៃទី២៦ ខែកក្កដាកន្លងទៅ ក្រោមការដឹកនាំរបស់លោកបណ្ឌិត ហ៊ុន ម៉ាណែត ដែលត្រូវបានគណបក្សគាំទ្រ និងជ្រើសរើសឲ្យដឹកនាំរាជរដ្ឋាភិបាលថ្មីក្រោយការបោះឆ្នោត ថ្ងៃទី២៣ ខែកក្កដា នឹងមានការររុះរើសមាជិកគណរដ្ឋមន្ត្រីច្រើន គ្រាន់តែសម្តេចនៅមិនទាន់បង្ហើបលំអិតប៉ុណ្ណោះ ។
តាមការស្ទាបស្ទង់ក្បាលម៉ាស៊ីន នៅតាមស្ថាប័នក្រសួងជាច្រើននឹងមានការប្រែប្រួល និងផ្លាស់ប្តូរដោយរួមទាំងក្រសួងការបរទេស និងសហប្រតិបត្តិការអន្តរជាតិដែលគេដឹងថា គឺជាស្ថាប័នដ៏សំខាន់សម្រាប់កំណត់គោលនយោបាយការបរទេសរបស់កម្ពុជា ។ ប៉ុន្តែទោះបីជាយ៉ាងណាក៏ដោយគោលនយោបាយការបរទេសកម្ពុជា គឺទំនងមិនផ្លាស់ប្តូរ ឬក៏ប្រែប្រួលច្រើននោះឡើយ ។
មូលហេតុដែលយើងហ៊ានសន្និដ្ឋានបែបនេះ គឺដោយផ្អែកនៅលើសារនយោបាយដែលបានថ្លែងដោយសម្តេចតេជោ ហ៊ុន សែន ប្រធានគណបក្សកាន់អំណាចនៅពេលប្រកាសបើកយុទ្ធនាការឃោសនាបោះឆ្នោតកាលពីថ្ងៃទី០១ ខែ កក្កដា កន្លងទៅ ។ សម្តេចតេជោ ហ៊ុន សែន បានថ្លែងបញ្ជាក់យ៉ាងច្បាស់ថា កម្មវិធីនយោបាយរបស់គណបក្សប្រជាជនកម្ពុជាសម្រាប់ឆ្នាំ២០២៣-២០២៨ គឺបន្តកម្មវិធីនយោបាយឆ្នាំ២០១៨-២០២៣ ហើយឆ្លើយតបនឹងការវិវត្តន៍នៃស្ថានការណ៍ជាក់ស្តែងទាំងនៅក្នុងប្រទេស និងបរទេស ។
នាឱកាសនោះ សម្តេចតេជោ បានអាននូវសារនយោបាយជាច្រើនចំណុច ប៉ុន្តែសំខាន់ គឺការពារសន្តិភាព អធិបតេយ្យភាព បូរណភាពទឹកដី និងលើកកម្ពស់កិត្យានុភាពកម្ពុជា នៅគ្រប់វេទិកាជាតិ និងអន្តរជាតិ ព្រមទាំងធានានូវការអភិវឌ្ឈប្រកបដោយនិរន្តរភាព ។
តាមឯកសារដែលយើងទទួលបាន បានឲ្យដឹងថា នៅលើជំហរការបរទេសកម្ពុជាប្រកាន់ខ្ជាប់នូវនយោបាយការបរទេសដែលបម្រើលើកស្ទួយ និងការពារផលប្រយោជន៍ជាតិដោយផ្តោតលើការងារទាំង៥ ដូចខាងក្រោម ៖ ១. ការពារឯករាជ្យ អធិបតេយ្យភាពជាតិ បូរណភាពទឹកដី អព្យាក្រឹត្យភាព រក្សាការពារឱ្យបានគត់មត់នូវសន្តិភាព សន្តិសុខ ស្ថិរភាព សណ្តាប់ធ្នាប់ និងឯកភាពសង្គម ។ ២. បង្កើនមិត្តខាងក្រៅ ដោយឈរលើស្មារតីឯករាជ្យជាតិ ។ ៣. ជំរុញការងារការទូតសេដ្ឋកិច្ច។ ៤. បន្តគាំទ្រ និងពង្រឹងពហុភាគីនិយម ។ និង៥. លើកកម្ពស់គុណភាព ប្រសិទ្ធភាពការងារ និងការអភិវឌ្ឍសមត្ថភាពមន្ត្រីការទូត ។
កម្ពុជានឹងខិតខំបន្តពង្រឹងចំណងទំនាក់ទំនងមិត្តភាព សហប្រតិបត្តិការ និងភាពជាដៃគូដែលមានស្រាប់ជាមួយប្រទេសជាមិត្តនានាឱ្យបានកាន់តែល្អប្រសើរស្តារឡើងវិញនូវទំនាក់ទំនងសហប្រតិបត្តិការជាមួយមិត្តចាស់ និងស្វែងរកកសាងទំនាក់ទំនងល្អជាមួយមិត្តថ្មី ជាពិសេសនៅអឺរ៉ុបខាងកើត និងកណ្តាល នៅអាស៊ីកណ្តាល នៅអាហ្វ្រិក មជ្ឈិមបូព៌ា និងអាមេរិកឡាទីន ។
ប៉ុន្តែទោះបីជាយ៉ាងណាក៏ដោយចុះភាពប្រកួតប្រជែងគ្នាដណ្តើមឧត្តមភាព នៅតំបន់អាស៊ីរវាងចិន និងអាមេរិកនឹងនៅតែបន្តធ្វើអោយកម្ពុជាពិបាកនៅក្នុងការកសាងទំនាក់ទំនងល្អជាមួយមហាអំណាចទាំងពីរ ។ ទំនាក់ទំនងរវាងកម្ពុជា និងចិននឹងបន្តរីកលូតលាស់ និងកាន់តែស៊ីជម្រៅ ខណៈដែលកម្ពុជានឹងពិបាកក្នុងការកសាងទំនាក់ទំនងដ៏កាន់ តែល្អប្រសើរមួយជាមួយអាមេរិក ។
ក្រោយលទ្ធផលបឋមនៃការបោះឆ្នោត កាលពីថ្ងៃទី២៣ ខែកក្កដា មេដឹកនាំចិនបានរួសរាន់មុនគេ ក្នុងការអបអរសាទរដល់ជ័យជំនះរបស់គណបក្សប្រជាជនកម្ពុជាដែលដឹកនាំដោយសម្តេចតេជោ ហ៊ុន សែន។ នេះជាកាយវិការបញ្ជាក់ពីជំហរចិននៅក្នុងការកសាងទំនាក់ទំនង ល្អជាមួយកម្ពុជា ទោះបីជាកម្ពុជានឹងមាននាយករដ្ឋមន្ត្រីថ្មី គឺលោក ហ៊ុន ម៉ាណែត ចាប់ពីចុងខែសីហាទៅក្តី ។
ផ្ទុយពីចិន រដ្ឋាភិបាលអាមេរិកវិញបានរិះគន់ដល់ដំណើរការបោះឆ្នោតកាលពីថ្ងៃទី២៣ ខែកក្កដា ថា វាមិនដំណើរការក្រោមបរិយាកាសសេរីនិងត្រឹមត្រូវនោះឡើយ ទោះបីជាគណកម្មាធិការជាតិរៀបចំការបោះឆ្នោតបានប្រកាសថា ដំណើរការបោះឆ្នោតបានប្រព្រឹត្តទៅយ៉ាងត្រឹមត្រូវ និងសេរីតាមគោលការណ៍ប្រជាធិបតេយ្យក្តី ។ សារនេះរបស់អាមេរិកនឹងធ្វើអោយកម្ពុជា និងអាមេរិកនៅតែពិបាកមើលមុខគ្នាអោយចំ ។
ប៉ុន្តែក្នុងទិដ្ឋភាពនយោបាយការបរទេសរបស់ខ្លួនកម្ពុជានឹងរួមចំណែកកាន់តែសំខាន់ថែមទៀតក្នុងការកសាងសហគមន៍អាស៊ាន ដោយសំដៅបំរើប្រជាជន និងយកប្រជាជនជាស្នូលរក្សា និងពង្រឹងឯកភាពនិងមជ្ឈភាពរបស់អាស៊ាន ហើយតាមរយៈអាស៊ានជំរុញ និងពង្រឹងទំនាក់ទំនងជាមួយដៃគូខាងក្រៅ ដើម្បីការអភិវឌ្ឍ និងកំណើនសេដ្ឋកិច្ច និងសង្គមផ្អែកលើគោលការណ៍គ្រឹះ២ គឺការប្រកាន់កុងសង់ស៊ុសក្នុងរាល់សេចក្តីសម្រេច និងការមិនជ្រៀតជ្រែកចូលកិច្ចការផ្ទៃក្នុងផងគ្នា ។
ផ្អែកតាមទស្សនៈវិស័យទាំងនេះ កម្ពុជានឹងបន្តដំណើរលើផ្លូវនៃសេរីភាវូបនីយកម្មសេដ្ឋកិច្ច ពាណិជ្ជកម្មបើកចំហ និងសកលភាវូបនីយកម្ម ក៏ដូចជា ជំរុញពាណិជ្ជកម្មពហុភាគីនិយម ជាមួយអង្គការពាណិជ្ជកម្មពិភពលោក និងសហគមន៍អន្តរជាតិ ។
មកដល់ពេលនេះ កម្ពុជាក៏បានរួមចំណែកក្នុងកិច្ចប្រឹងប្រែងឈានទៅចុះហត្ថលេខាលើកិច្ចព្រមព្រៀងភាពជាដៃគូសេដ្ឋកិច្ចតំបន់គ្រប់ជ្រុងជ្រោយ (RCEP) និងបន្តចរចាកិច្ចព្រមព្រៀង ពាណិជ្ជកម្មសេរីជាមួយបណ្តាប្រទេសជាមិត្តនានា ដូចជា សាធារណរដ្ឋកូរ៉េ និងសហភាព សេដ្ឋកិច្ចអឺរ៉ុប-អាស៊ី និងមជ្ឈឹមបូព៌ារជាដើម ។ នៅក្នុងការចាត់ចែងកិច្ចការពិភពលោក និងរួមចំណែកក្នុងកិច្ចប្រឹងប្រែងជាសកលក្នុងការដោះស្រាយបញ្ហា ការប្រឈម និងគ្រោះថ្នាក់នានាដែលគំរា.មកំហែងដល់សន្តិភាពសន្តិសុខ របៀបរបបអន្តរជាតិមួយ ដែលផ្អែកលើច្បាប់ និងការអភិវឌ្ឍប្រកបដោយចីរភាព ។
កម្ពុជាក៏នឹងបន្តចូលរួមយ៉ាងសកម្មដល់បុព្វហេតុសន្តិភាពលើពិភពលោក ដោយបញ្ជូនកងកម្លាំងខ្លួនចូលរួមក្នុងបេសកកម្មរក្សាសន្តិភាពរបស់អង្គការសហប្រជាជាតិ បំពេញភារកិច្ច មនុស្សធម៌ប្រកបដោយវិជ្ជាជីវៈខ្ពស់ ការគោរពយ៉ាងម៉ឺងម៉ាត់នូវវិន័យ និងច្បាប់អន្តរជាតិ និងកសាងទំនាក់ទំនងល្អជាមួយអង្គភាព និងប្រជាជនមូលដ្ឋាន។
កម្ពុជាក៏នឹងបន្តស្វាគមន៍ និងគាំទ្រនូវរាល់គំនិតផ្តួចផ្តើមទាំងឡាយណា ដែលលើកកម្ពស់ សន្តិភាព ស្ថិរភាព និងវិបុលភាពក្នុងតំបន់ និងផ្តោតលើកិច្ចសហប្រតិបត្តិការដែលផ្តល់ផលប្រយោជន៍រួមគ្នា និងបំពេញឱ្យគ្នាទៅវិញទៅមក ។ ការធ្វើឱ្យស៊ីសង្វាក់គ្នា និងការបំពេញ ឱ្យគ្នាទៅវិញទៅមក នូវគំនិតផ្តួចផ្តើមតំបន់នានាមាន «ខ្សែក្រវ៉ាត់ និងផ្លូវ» «យុទ្ធសាស្ត្រ ឥណ្ឌូ-ប៉ាស៊ីហ្វិក» និងនយោបាយរបស់ប្រទេសធំៗ ក្នុងតំបន់ ដែលសម្លឹងមកតំបន់អាស៊ីអាគ្នេយ៍ ក៏ដូចជាកិច្ចសហប្រតិបត្តិការនានា ក្នុងក្របខ័ណ្ឌទន្លេមេគង្គ គឺសំខាន់ និងចាំបាច់ ៕ ដោយៈ ប្រេវីន និងហេង ចេស្តារ
ចែករំលែកព័តមាននេះ