នគរបាលអន្ដរាគមន៍ខេត្តកំពង់ស្ពឺ បាននាំគ្នាជួយសង្គ្រោះរថយន្ត និងជនជាតិចិនចំនួន២នាក់ ដែលព្យាយាមបើករថយន្ដឆ្លងកាត់ទឹកហូរ នៅចំណុចស្ពានអូរគគី
ខេត្តកំពង់ស្ពឺ៖ ជនជាតិចិនចំនួន២នាក់ ដែលព្យាយាមបើករថយន្តឆ្លងកាត់ឧបសគ្គខ្សែទឹកកំពុងហូរខ្លាំងនៅលើកំណាត់ផ្លូវជាតិលេខ៤ ត្រង់ចំណុចស្ពានអូរគគី ស្ថិតក្នុងឃុំយាយម៉ៅពេជ្រនិល ហើយជាប់ផុងទៅមុខមិនរួច ត្រូវបានកម្លាំងសមត្ថកិច្ចជួយសង្គ្រោះឱ្យផុតពីគ្រោះថ្នាក់ដោយជោគជ័យ នៅព្រឹកថ្ងៃទី៣០ ខែកក្កដា ឆ្នាំ២០២៣នេះ។
សមត្ថកិច្ចបានឱ្យដឹងថា ជនជាតិចិនទាំងពីរនាក់ខាងលើនេះ ធ្វើដំណើរតាមរថយន្តស៊េរីទំនើបមួយគ្រឿងក្នុងទិសដៅពីលិចទៅកើត លុះមកដល់ចំណុចកើតហេតុ បានព្យាយាមបើកឆ្លងកំណាត់ផ្លូវដែលមានទឹកហូរកាត់ខ្លាំង បណ្តាលឱ្យរថយន្តរលត់ជាប់ផុងនៅក្នុងខ្សែទឹកនោះ ដែលងាយនឹងរងគ្រោះថ្នាក់ដល់អាយុជីវិត។
សមត្ថកិច្ចបន្តថា ដោយពិនិត្យឃើញស្ថានភាពដូច្នេះ កម្លាំងសមត្ថកិច្ចដែលប្រចាំការត្រួតពិនិត្យ និងសម្រួលចរាចរណ៍ បានបើកប្រតិបត្តិការជួយសង្គ្រោះភ្លាមៗ ដើម្បីសង្គ្រោះមនុស្សដែលជាប់គាំងនៅក្នុងរថយន្តនោះ។ ប៉ុន្តែដោយសារខ្សែទឹកហូរខ្លាំងពេក ធ្វើឱ្យសមត្ថកិច្ចពិបាកក្នុងការចូលទៅយកមនុស្ស តែទោះយ៉ាងណា ប្រតិបត្តិការនោះទទួលបានជោគជ័យ ដោយជួយសង្គ្រោះបានទាំងមនុស្ស និងរថយន្តចេញពីខ្សែទឹកជំនន់។
លោអភិបាលខេត្តកំពង់ស្ពឺ បានឱ្យដឹងថា នៅពេលនេះ ទឹកនៅតាមបណ្តោយផ្លូវជាតិលេខ៤ បានស្រកវិញហើយ ៕
ចែករំលែកព័តមាននេះ