មុខរបរជាច្រើនបានជាប់គាំងហើយមនុស្សក៏មិនសូវហ៊ានចាយលុយ ឬរង់ចាំមើលក្រោយការបោះឆ្នោតសិន ។ ឥឡូវបោះឆ្នោតបានចប់ហើយក៏គ្មានបញ្ហាអ្វីកើតឡើង ។ ដូច្នេះ ដល់ពេលដែលត្រូវរកស៊ី និងធ្វើការអោយពេញដៃជើងដើម្បីជីវិតរស់នៅរបស់យើងវិញម្តង ។ លទ្ធផលបោះឆ្នោតក៏ដឹង…
មុខរបរជាច្រើនបានជាប់គាំងហើយមនុស្សក៏មិនសូវហ៊ានចាយលុយ ឬរង់ចាំមើលក្រោយការបោះឆ្នោតសិន ។ ឥឡូវបោះឆ្នោតបានចប់ហើយក៏គ្មានបញ្ហាអ្វីកើតឡើង ។ ដូច្នេះ ដល់ពេលដែលត្រូវរកស៊ី និងធ្វើការអោយពេញដៃជើងដើម្បីជីវិតរស់នៅរបស់យើងវិញម្តង ។
លទ្ធផលបោះឆ្នោតក៏ដឹង អនាគតនាយករដ្ឋមន្ត្រីក៏ដឹង ដូច្នេះពលរដ្ឋមួយចំនួន ដែលចាំអ៊ុតពីលទ្ធផលបោះឆ្នោតអាចផ្តើមភារកិច្ចជីវិតរបស់ខ្លួនបន្តទៀតបានហើយ ។ គេបានដឹងថា ពលរដ្ឋមួយចំនួនបានរំពឹងថា ក្រោយបោះឆ្នោតស្ថានភាពរស់នៅរបស់ពួកគាត់នឹងប្រសើរឡើង ។ ប្រសើរនៅលើមុខរបររកទទួលទាន ប្រសើរនៅក្នុងកិច្ចការចិញ្ចឹមជីវិត នៅក្នុងនោះក៏មានដែរការរំពឹងថា នឹងប្រសើរខាងសេវាសាធារណរបស់រដ្ឋចំពោះជីវភាពរស់នៅប្រចាំថ្ងៃរបស់ពលរដ្ឋបន្ទាប់ពីពួកគាត់បានជ្រើសរើសមេដឹកនាំហើយនោះ ។
ដោយសារវិបត្តិជំងឺកូវីដ១៩ និងឥទ្ធិពលសង្គ្រាមនៅអ៊ុយក្រែនបានធ្វើអោយសេដ្ឋកិច្ចកម្ពុជាមិនខុសពីប្រទេសនានានៅក្នុងសកលលោកនោះទេបានរងផលប៉ះពាល់ ។ ជាពិសេសផលប៉ះពាល់ទៅលើមុខរបររកទទួលទានរបស់ពលរដ្ឋ។ ពលរដ្ឋបានពិបាករកចំណូល ហើយទំនិញលើទីផ្សារបានឡើងថ្លៃធ្វើឱ្យសកម្មភាពទិញលក់ត្រូវគេដឹងថា បានធ្លាក់ចុះ ។
ប្រភពពីពលរដ្ឋនៅមុនការបោះឆ្នោតថា នៅតាមផ្សារនានាពុំសូវមានអ្នកទិញឡើយ ។ តាមផ្សារមានតែអ្នកលក់ ។ អ្នកលក់បានស្ងាបដាក់គ្នា ដោយសារលក់មិនដាច់ ។ គ្រប់គ្នាបានរំពឹងថា បោះឆ្នោតហើយការលក់ដូរនឹងល្អប្រសើរឡើងវិញ ។
ជាមួយគ្នានេះ បើគេក្រឡេកទៅមើលវិស័យអចលនទ្រព្យវិញ ។ សំណង់មួយចំនួនបានបញ្ឈប់សកម្មភាពសាងសង់ផ្ទះនៅតាមបូរីតូចធំ ដីធ្លីជាច្រើនកន្លែង បានលើកស្លាកលក់ ប៉ុន្តែរាប់ថ្ងៃរាប់ខែ ហាក់លក់មិនចេញពីព្រោះគ្មានអ្នកទិញឡើយ ។ សាធារណជនបានសង្ឃឹមថា ក្រោយបោះឆ្នោតស្ថានភាពដីធ្លីនឹងល្អប្រសើរឡើង ។
សកម្មភាពសេដ្ឋកិច្ចបានធ្លាក់ចុះដោយសារឥទ្ធិពលសកល និងជំងឺរាតត្បាត នៅក្នុងនោះស្ថានការណ៍សង្គមកម្ពុជាក៏ជាផ្នែកមួយបានចូលរួមទាក់ទាញទម្លាក់សេចក្តីសុខរបស់ពលរដ្ឋដែរ ។ បទពិសោធន៍ប្រវត្តិសាស្ត្រដែលកម្ពុជាជួបសង្គ្រាម និងបទពិសោធន៍ដែលកម្ពុជាជួបវិបត្តិនយោបាយនៅមុន និងក្រោយពេលបោះឆ្នោតបានធ្វើឱ្យផ្គត់គំនិតពលរដ្ឋមួយចំនួនគិតដល់ភាពអវិជ្ជមានដែលអាចកើតមាន ។ ដូច្នេះក្នុងគ្រានោះទោះពួកគាត់មានបំណងវិនិយោគ មានបំណងចេញធ្វើការចេញរកទទួលទានក៏សុខចិត្តផ្អាកមួយរយៈសិនរង់ចាំការបោះឆ្នោតឱ្យចប់រួចរាល់ទើបបោះជំហានទៅមុខទៀត ។
ឥឡូវពលរដ្ឋបានបំពេញកាតព្វកិច្ចរួចរាល់ហើយ ដូច្នេះពួកគាត់សង្ឃឹមថា អ្វីៗនឹងបានល្អប្រសើរ ។ ពលរដ្ឋមានបំពណងទិញផ្ទះថ្មីអាចផ្តើមដើរមើលផ្ទះដែលកំពុងមានវត្តមាននៅលើទីផ្សារ ។ ពលរដ្ឋបម្រុងបើកអាជីវកម្មអាចបើកដំណើរការបានហើយ ។
ប្រសិនជាអ្នកឈប់ហើយរង់ចាំពេលវេលាអ្នកដែលគេដើរទៅមុខគេប្រាកដជាបានដល់គោលដៅមុន ។ នៅក្នុងសង្គមកម្ពុជាមានឧទាហរណ៍តូចៗជាច្រើន ដែលកើតមានឡើងនៅពេលជំងឺកូវីដ១៩ រាតត្បាត ។ រយៈពេលពីរបីឆ្នាំកន្លងមកនេះមានយុវជនមួយចំនួនបានរងចាំឱ្យជំងឺកូវីដ១៩ រលត់រលាយសិន ។
អ្នកខ្លះខ្លាចកូវីដរហូតសម្រេចចិត្តព្យួរការសិក្សា អ្នកខ្លះឈប់ពីការងារទៅស្រុកកំណើត ។ ផ្ទុយទៅវិញមានមនុស្សមួយចំនួនបានយកឱកាសមិនអាចចេញពីផ្ទះបាននោះទៅបង្កើតមុខជំនួញតាមអនឡាញ និងបង្កើនចំណេះដឹងតាមរយៈសិក្សាពីចម្ងាយ ហើយនៅទីបញ្ចប់អ្នកទាំងនោះទទួលបានជោគជ័យកើនចំណេះ កើនមុខរបរទទួលបានសញ្ញាបត្រកាន់ខ្ពស់ ។ ខុសពីមនុស្សមួយចំនួន បានត្រឹមរង់ចាំខាត ពេលវេលាប៉ុណ្ណោះ។
ចូរចាំថាពេលវេលាមិនរង់ចាំអ្នកឡើយ ។ មែនទែនទៅនៅក្នុងទ្រឹស្តីជំនួញពេលណាឧបសគ្គក៏ជាឱកាសនោះដែរ ។ ដូចអ្នកជំនួញជោគជ័យគេតែងតែលើកឡើងថា នៅពេលមនុស្សជាទូទៅមើលឃើញឧបសគ្គ អ្នកឆ្លាតបានមើលឃើញនោះជាឱកាសទៅវិញ៕ ដោយ ៖ ប្រេវីន និងសារ៉ាន់
ចែករំលែកព័តមាននេះ