ខេត្តកំពង់ស្ពឺ៖ ទឹកភ្លៀង បានជន់លិចកំណាត់ផ្លូវជាតិលេខ៤ ចំណុចស្ពានអូរគគីរ ក្នុងឃុំពេជ្រនិល ស្រុកភ្នំស្រួច ខេត្តកំពង់ស្ពឺ ត្រូវទឹកជន់លិច កម្ពស់រហូតដល់ ០,៧០ម៉ែត្រ…
ខេត្តកំពង់ស្ពឺ៖ ទឹកភ្លៀង បានជន់លិចកំណាត់ផ្លូវជាតិលេខ៤ ចំណុចស្ពានអូរគគីរ ក្នុងឃុំពេជ្រនិល ស្រុកភ្នំស្រួច ខេត្តកំពង់ស្ពឺ ត្រូវទឹកជន់លិច កម្ពស់រហូតដល់ ០,៧០ម៉ែត្រ គិតត្រឹមម៉ោងប្រមាណ ១០យប់ ថ្ងៃទី២៨ ខែកក្កដានេះ។ ដូច្នេះចរាចរណ៍ឆ្លងកាត់កំណាត់ផ្លូវជាតិលេខ៤ ចំណុចទឹកភ្លៀងជន់លិចនេះ ទាំងចរាចរណ៍ មកពីស្រុកកំពង់សិលា និងពីស្រុកភ្នំស្រួច ត្រូវបានផ្អាកចរាចរណ៍ជាបណ្តោះអាសន្ន។ នេះបើតាមការបញ្ជាក់របស់សមត្ថកិច្ច។
សូមរម្លឹកថា កាលពីថ្ងៃទី២៥ ខែកក្កដា ក្រសួងធនធានទឹក និងឧតុនិយម បានប្រកាសថា ប្រទេសកម្ពុជាយើង ទទួលឥទ្ធិពលពីប្រព័ន្ធសម្ពាធទាបអូសបន្លាយលើអាងទន្លេមេគង្គភាគខាងលើ កាត់ប្រទេសថៃ ឡាវ និងភាគកណ្តាលវៀតណាម ជាមួយនឹងខ្យល់មូសុងនិរតីក្នុងកម្រិតមធ្យម។ ឯនៅក្នុងមហាសមុទ្រប៉ាស៊ីហ្វិក ភាគខាងកើតប្រទេសហ្វីលីពីន ព្យុះទី៥ ឈ្មោះ ដុកស៊ូរី បានបង្កើនកម្លាំង ទៅជា TY DOKSURI កំពុងធ្វើដំណើរឆ្ពោះទៅប្រទេសចិន ក្នុងចន្លោះប្រទេសហ្វីលីពីន និងកោះតៃវ៉ាន់។ ព្យុះនេះ នឹងអាចទៅដល់ប្រទេសចិន ក្នុងអំឡុងថ្ងៃទី២៨ ខែកក្កដា។
លក្ខណៈទាំងនេះ ត្រូវបានក្រសួងធនធានទឹក និងឧតុនិយម ប្រកាសថា នៅក្នុងសប្តាហ៍នេះ ចាប់ពីថ្ងៃទី២៦កក្កដា រហូតដល់ថ្ងៃទី១ ខែសីហា នឹងធ្វើឱ្យតំបន់ទំនាបកណ្តាល តំបន់ខ្ពង់រាប និងតំបន់មាត់សមុទ្រ អាចមានភ្លៀងធ្លាក់ ក្នុងកម្រិតពីតិច ទៅច្រើន លាយឡំដោយផ្គរ រន្ទះ និងខ្យល់កន្ត្រាក់។ នៅលើផ្ទៃសមុទ្រ នឹងមានខ្យល់បក់បោកខ្លាំង ព្រមទាំងរលកសមុទ្រមានកម្ពស់ខ្ពស់។
ចំពោះស្ថានភាពបែបនេះ ក្រសួងធនធានទឹក និងឧតុនិយម បានប្រកាសអំពាវនាវដល់សាធារណជន សូមបង្កើនការប្រុងប្រយ័ត្នចំពោះបាតុភូតធម្មជាតិ ដែលអាចកើតមានឡើងជាយថាហេតុ៕
ចែករំលែកព័តមាននេះ