ខេត្តឧត្តរមានជ័យ ៖ ស្រុកចំនួន២ គឺស្រុកត្រពាំងប្រាសាទ និងស្រុកអន្លង់វែង បានរងការខូចខាតអស់ផ្លូវមួយចំនួន ខណៈទឹកភ្លៀងធ្លាក់ជាបន្តបន្ទាប់ជាប់ៗគ្នារយៈពេល៣ថ្ងៃមកនេះ គឺចាប់ពីថ្ងៃទី២៤ រហូតមកទល់នឹងថ្ងៃទី២៧ ខែកក្កដា ឆ្នាំ២០២៣ ដែលជាហេតុនាំឱ្យជំនន់ទឹកភ្លៀងជន់លិច និងហូរបុ.កកាត់ផ្តាច់ផ្លូវ បណ្តាលឲ្យរាំងស្ទះក្នុងការធ្វើដំណើរឆ្លងកាត់របស់បងប្អូនប្រជាពលរដ្ឋ។
យោងតាមប្រភពពីប្រជាពលរដ្ឋ បានឲ្យដឹងថា ផ្លូវមួយខ្សែដែលបំបែកចេញពីផ្លូវជាតិលេខ៦៧B ឆ្ពោះទៅភូមិអូរចាប់ត្រី និងភូមិត្រពាំងធំ ស្ថិតនៅឃុំលំទង ក្នុងស្រុកអន្លង់វែង ខេត្តឧត្តរមានជ័យ ក្នុងរយៈចំនួន២ទៅ៣ថ្ងៃនេះ ទឹកភ្លៀងបន្តធ្លាក់ជាប់ៗគ្នា ធ្វើឱ្យផ្លូវលំចំនួន២កន្លែងត្រូវជំនន់ទឹកភ្លៀងហូរបុ.កកាត់ផ្តាច់ បណ្ដាលឱ្យរងការខូចខាត។ ដោយឡែកផ្លូវលំមួយចំនួនទៀតក៏ត្រូវទឹកលិចផងដែរ បង្កឲ្យមានការស្ទះចរាចរណ៍ ដែលតម្រូវឱ្យរថយន្ត ម៉ូតូ ឬកង់ ត្រូវលើកដាក់គោយន្តកន្ត្រៃ ដើម្បីចាំចម្លង។
ប្រភពដដែលបន្តថា ចំណែកឯស្រុកត្រពាំងប្រាសាទវិញ នាព្រឹកថ្ងៃទី២៧ ខែកក្កដា ឆ្នាំ២០២៣នេះ លោក ហាំង មេង អភិបាលស្រុកត្រពាំងប្រាសាទ បានប្រាប់ឲ្យកោះសន្តិភាពដឹងថា ក្នុងរយៈពេល២ទៅ៣ថ្ងៃនេះ ទឹកភ្លៀងធ្លាក់មកជាបន្តបន្ទាប់ជាប់ៗគ្នានៅក្នុងស្រុក ធ្វើឱ្យផ្លូវលំមួយចំនួនត្រូវទឹកហូរកា.ត់ផ្លូវ ជាហេតុដែលអាចធ្វើចរាចរណ៍បានតែផ្លូវមួយខ្សែ ស្ថិតនៅចំណុចទំនប់ខ្នោ ក្នុងឃុំត្រពាំងប្រាសាទ ទើបបង្កឲ្យរាំងស្ទះមិនអាចធ្វើចរាចរណ៍បាន។ តែទោះជាបែបណា ក្រុមអាជ្ញាធរនឹងមានវិធានការដោះស្រាយជួយប្រជាពលរដ្ឋធ្វើដំណើរឡើងវិញ មិនអាចទុករយៈពេលយូរឡើយ៕
ចែករំលែកព័តមាននេះ