មានហេតុការណ៍ដ៏គួរឲ្យភ្ញាក់ផ្អើលដល់អ្នកភូមិទាំងកណ្ដាលថ្ងៃត្រង់ ខណៈពេលដែលម្ចាស់ផ្ទះជាប់រវល់ទៅចម្ការដកដំឡូមី ហើយចាក់សោផ្ទះទុកចោល ក៏ស្រាប់តែត្រូវចោ.រចូលមកគាស់ទ្វារផ្ទះ រួចរើកកាយអីវ៉ាន់រកទ្រព្យសម្បត្តិ ប៉ុន្តែ
ខេត្តឧត្តរមានជ័យ ៖ បើតាមសេចក្តីរាយការណ៍បានឱ្យដឹងថា មានហេតុការណ៍ដ៏គួរឲ្យភ្ញាក់ផ្អើលដល់អ្នកភូមិទាំងកណ្ដាលថ្ងៃត្រង់ ខណៈពេលដែលម្ចាស់ផ្ទះជាប់រវល់ទៅចម្ការដកដំឡូមី ហើយចាក់សោផ្ទះទុកចោល ក៏ស្រាប់តែត្រូវចោ.រចូលមកគាស់ទ្វារផ្ទះ រួចរើកកាយអីវ៉ាន់រកទ្រព្យសម្បត្តិ ប៉ុន្តែចៃដន្យម្ចាស់ផ្ទះមកទាន់ រត់គេចខ្លួនបាត់ស្រមោលតែម្តង។ ហេតុការណ៍នេះបង្កឱ្យមានការភ្ញាក់ផ្អើលកាលពីវេលាម៉ោង១២រសៀល ថ្ងៃទី២៥ ខែកក្កដា ឆ្នាំ២០២៣ ស្ថិតនៅត្រង់ចំណុចភូមិផ្អុង សង្កាត់កូនក្រៀល ក្រុងសំរោង ខេត្តឧត្តរមានជ័យ។
បើតាមសមត្ថកិច្ចមូលដ្ឋាន បានបញ្ជាក់ប្រាប់ឲ្យដឹងនៅល្ងាចថ្ងៃទី២៥ ខែកក្កដា ឆ្នាំ២០២៣ថា ក្រោយពីទទួលបានព័ត៌មានពីម្ចាស់ផ្ទះមកថា មានករណីចោ.រគាស់ទ្វារចូលផ្ទះរុះរើអីវ៉ាន់ ភ្លាមៗនោះកម្លាំងមូលដ្ឋានក៏បានសហការគ្នាចុះទៅអន្តរាគមន៍ដល់កន្លែងទីតាំងកើតហេតុតែម្តង។
សមត្ថកិច្ចមូលដ្ឋានបានបញ្ជាក់ប្រាប់បន្ថែមថា នៅក្នុងហេតុការណ៍ខាងលើ ម្ចាស់ផ្ទះមានឈ្មោះ សាន ឡុង អាយុ២៧ឆ្នាំ និងមានប្រពន្ធឈ្មោះ សេក ណែត អាយុ២៦ឆ្នាំ មុខរបរកសិករ រស់នៅភូមិ-ឃុំកើតហេតុខាងលើ។
ហើយបើតាមប្រភពពីម្ចាស់ផ្ទះឈ្មោះ សេក ណែត បានប្រាប់ឲ្យដឹងថា នៅមុនពេលកើតហេតុ រូបគាត់និងប្តីបានចាក់សោផ្ទះ រួចក៏នាំគ្នាចេញទៅចម្ការនៅម៉ោង៧ព្រឹក ថ្ងៃទី២៥ ខែកក្កដា ឆ្នាំ២០២៣ ដើម្បីដកដំឡូងមី ពីព្រោះកាលពីម្សិលមិញរវល់ទៅចូលរួមបោះឆ្នោត។ រហូតដល់ម៉ោងប្រមាណជា១១ព្រឹក ក៏ស្រាប់តែបងប្រុសគាត់ដែលរស់នៅក្បែរគ្នានោះ បានជិះម៉ូតូទៅប្រាប់គាត់ដល់ចម្ការតែម្តង ដោយបានប្រាប់ថា «ផ្ទះរបស់ខ្ញុំទ្វារចំហរអត់ចាក់សោទេ»។ នៅពេលឮដូច្នេះរួចមក គាត់ក៏ប្រញាប់ប្រញាល់ចេញពីចម្ការមកផ្ទះវិញ ក៏ស្រាប់តែឃើញទ្វារផ្ទះចំហរពិតមែន បន្ទាប់មកគាត់ក៏ដើរចូលទៅមើល ហើយក៏ឃើញនៅក្នុងផ្ទះមានចោ.រចូលរើកកាយពិតប្រាកដមែន។
យោងតាមរបាយការណ៍របស់សមត្ថកិច្ចមូលដ្ឋាន នៅពេលចុះទៅពិនិត្យទីតាំងកន្លែងកើតហេតុជាក់ស្តែងវិញ ឃើញថា សកម្មភាពចោ.រចូលគាស់ផ្ទះ បានបើកទូដាក់ខោអាវ រួចរើកកាយចេញមកខាងក្រៅទូ និងកេសដាក់ឯកសារទៀត ដើម្បីរករបស់របរដែលមានតម្លៃនៅក្នុងទូផងដែរ។ ចំណែកករណីចោ.រគាស់ទ្វារចូលផ្ទះនេះដែរ ទ្រព្យសម្បត្តិផ្សេងៗពុំមានបាត់បង់របស់របរអ្វីដែលមានតម្លៃនោះឡើយ។
សូមជម្រាបផងដែរថា បច្ចុប្បន្ន ក្រោយពេលពិនិត្យកន្លែងកើតហេតុរួច សមត្ថកិច្ចជំនាញមូលដ្ឋានកំពុងសហការគ្នាយ៉ាងយកចិត្តទុកដាក់ និងធ្វើការស្រាវជ្រាវបន្តទៀត ដើម្បីស្វែងរក និងកំណត់មុខសញ្ញាចោ.រដែលធ្វើសកម្មភាពគាស់ទ្វារចូលផ្ទះប្រជាពលរដ្ឋនោះ យកមកអនុវត្តចាត់ការតាមនីតិវិធីច្បាប់ឲ្យខានតែបាន៕
ចែករំលែកព័តមាននេះ