ខេត្តព្រះសីហនុ ៖ កាលពីព្រឹកថ្ងៃទី៧ ឧសភា លោកទិត វុទ្ធី អភិបាលស្រុកព្រៃនប់ និងជាប្រធានអនុសាខាកាកបាទក្រហមស្រុកបានអញ្ជើញទៅចូលរួមក្នុងពិធីប្រគល់លំនៅឋានមួយខ្នងដែលទើបនឹងសាងសង់រួចក្រោមការជួយឧបត្ថម្ភពីសប្បុរសជនមួយចំនួនក្នុងស្រុកព្រៃនប់ ជូនលោកយាយចាស់ជរាទុរគតដែលមានទីតាំងស្ថិតក្នុងក្រុម១២ ភូមិវាលមាស ឃុំវាលរេញ ស្រុកព្រៃនប់។ អញ្ជើញចូលរួមក្នុងពិធីនោះដែរមានលោកហែម វុទ្ធី ក្រុមប្រឹក្សាស្រុក និងលោកស្រីជាភរិយា លោកហៀង ពៅ លោកផូ ប៊ុនថា និងលោកស្រីជា គឹមលឿន ជាសប្បុរសជន លោកមេឃុំ មេភូមិ និងប្រជាពលរដ្ឋជាច្រើននាក់ទៀត ។
នៅក្នុងឱកាសនោះ លោកទិត វុទ្ធី បានថ្លែងថា បន្ទាប់ពីមានរបាយការណ៍តាមរយៈមេភូមិ មេឃុំ ស្តីពីការលំបាកក្នុងជីវភាពរបស់លោកយាយវិត យ៉ែម អាយុ៨៩ឆ្នាំ ព្រោះតែចាស់ជរាគ្មានទីពឹង ហើយរស់នៅក្រោមខ្ទមដ៏តូចលិចលើលិចក្រោម ដែលមើលទៅគួរឱ្យអាសូរ លោកក៏ផ្តួចផ្តើមកសាងផ្ទះមួយខ្នងមានទំហំ៣ម៉ែត្រគុណ៣,៥០ម៉ែត្រ ប្រក់ស័ង្កសី ជញ្ជាំងក្តារ រនាបក្តារ ដែលចំណាយថវិកាអស់៥៥ម៉ឺនរៀល។ ថវិកាចំណាយនេះមានការចូលរួមឧបត្ថម្ភពីលោកផូ ប៊ុនថា និងលោកស្រីជា គឹមលឿន ជាភរិយាប្រជាពលរដ្ឋភូមិបឹងវែង៣០ម៉ឺនរៀល លោកហែម ពៅ ប្រជាពលរដ្ឋភូមិចំការកៅស៊ូ៥ម៉ឺនរៀល លោកវិត គង់ មេឃុំវាលរេញ១០ម៉ឺនរៀល លោកហែម វុទ្ធី ក្រុមប្រឹក្សាស្រុក និងលោកស្រី១០ម៉ឺនរៀល ភេសជ្ជៈមួយកេស មីមួយកេស និងអង្ករ២០គីឡូក្រាម ព្រះតេជគុណឈឹម យុត ព្រះអនុគណស្រុកព្រៃនប់់ ភួយ១ កន្ទេល១ ខ្នើយ១ ឆ្នាំង២ ។ ចំណែករូបលោកបានចូលរួមប្រាក់១០ម៉ឺនរៀល ឃីតមួយកញ្ចប់។
លោកអភិបាលស្រុកបានបន្តទៀតថា ចំពោះប្រាក់ដែលបានមកពីសប្បុរសជនហើយសល់ពីការកសាងផ្ទះ លោកនិងសប្បុរសជនដែលចូលរួមបានសម្រេចប្រគល់ជូនលោកយាយជាម្ចាស់ផ្ទះ និងជូនលោកយាយដែលបានមកចូលរួមចំនួន៧នាក់ ក្នុងម្នាក់ៗចំនួន២ម៉ឺនរៀល ។ នៅក្នុងឱកាសនោះដែរ លោកអភិបាលស្រុក ក៏បានថ្លែងអំណរគុណយ៉ាងជ្រាលជ្រៅដល់សប្បុរសជនទាំងអស់ ដែលចូលរួមចំណែកជួយឧបត្ថម្ភដល់លោកយាយទុរគតនាពេលនេះ ៕
ចែករំលែកព័តមាននេះ