​ខេត្តព្រៃវែង៖ ប្រជាពលរដ្ឋទូទាំងប្រទេស បានចាកចេញពីកន្លែងធ្វើការរបស់ខ្លួន ត្រឡប់​ទៅស្រុកកំណើត ដើម្បីចូលរួមបោះឆ្នោតជាតិ នៅថៃ្ងទី២៣កក្កដា ដែលធ្វើអោយដងផ្លូវសំខាន់ៗជាច្រើន មានការកកស្ទះជាខ្លាំង។ ដោយឡែក សំរាប់ផ្លូវជាតិលេខ១ ក្នុងខេត្តព្រៃវែង​ ក៏មិនខុសគ្នាដែរ នៅចំណុចលើស្ពានអ្នកលឿង រហូតដល់គល់ស្ពានស្ទឹងស្លូត ចំងាយប្រមាណជា ៤គីឡូម៉ែត្រ ក៏មានការកកស្ទះដែរ។

​សមត្ថកិច្ចមូលដ្ឋាន បានអោយដឹងថា មុនបោះឆ្នោត ១ថ្ងៃ គឺនៅរសៀលថ្ងៃទី២២កក្កដា ផ្លូវជាតិលេខ១ ចាប់ផ្តើមមានការកកស្ទះ តែមិនជាប់គាំង ដោយអាចធ្វើដំណើរទៅមុខបានតិចៗ ដើម្បីដោះស្រាយបញ្ហានេះ លោកឧត្តមសេនីយ៍ ឈឿន ប៊ុនឆន ស្នងការនគរបាលខេត្ត បានដឹក​នាំ​កំលាំងដោយផ្ទាល់ ចេញជួយអន្តរាគមន៍សម្រួលចរាចរណ៍ រហូតដល់ជិតយប់ ទើបចរាចរណ៍​លែងកកស្ទះ។ ប៉ុន្តែនៅថ្ងៃទី២៤កក្កដា ប្រជាពលរដ្ឋ ដែលបានទៅបោះឆ្នោត​នៅស្រុកកំណើត​នោះ បាននាំគ្នាសំរាកត្រឡប់ទៅកាន់រាជធានីភ្នំពេញវិញ ជាហេតុធ្វើអោយកំណាត់ផ្លូវជាតិលេខ១ ត្រង់ទីប្រជុំជនអ្នកលឿង ត្រូវកកស្ទះជាថ្មីទៀត ដោយចាប់ស្ទះតាំងពីម៉ោង ១០ព្រឹក រហូតដល់យប់តែម្តង។

បើទោះបីជាមានការកកស្ទះបែបនេះក្តី គេឃើញកំលាំងប៉ូលិសរាប់សិបនាក់ ដែលដឹកនាំ​ដោយលោកឧត្តមសេនីយ៍ទោ ឈឿន ប៊ុនឆន ស្នងការនគរបាលខេត្តព្រៃវែង បានចេញ​អន្តរាគមន៍ ជួយសម្រួលចរាចរណ៍ យ៉ាងសកម្មបំផុត ដោយធ្វើអោយប្រជាពលរដ្ឋ ជាអ្នកដំណើរ អាចចរាចរណ៍​ទៅមុខបាន ដោយ​មិនជាប់គាំងយូរប៉ុន្មាន​នោះទេ៕