ខេត្តសៀមរាប ៖ អនុរដ្ឋលេខាធិការក្រសួងទេសចរណ៍នៃប្រទេសកម្ពុជាបានថ្លែងថា ហិបបរិច្ចាគប្រាក់មួយដែលមានឈ្មោះ «កម្មវិធីស្ត្រីផ្សារភ្ជាប់ជាមួយសមរភូមិមុខ» នឹងត្រូវបង្កើតឡើងនាពេលខាងមុខនេះតាមរយៈតំណាងស្ត្រី ក្នុងសវនកម្មឧស្សាហ៍កម្មទេសចរណ៍នានានៅទូទាំងប្រទេស ដើម្បីប្រមូលថវិកាយកទៅប្រគល់ជូនកងយោធពលខេមរភូមិន្ទ
ខេត្តសៀមរាប ៖ អនុរដ្ឋលេខាធិការក្រសួងទេសចរណ៍នៃប្រទេសកម្ពុជាបានថ្លែងថា ហិបបរិច្ចាគប្រាក់មួយដែលមានឈ្មោះ «កម្មវិធីស្ត្រីផ្សារភ្ជាប់ជាមួយសមរភូមិមុខ» នឹងត្រូវបង្កើតឡើងនាពេលខាងមុខនេះតាមរយៈតំណាងស្ត្រី ក្នុងសវនកម្មឧស្សាហ៍កម្មទេសចរណ៍នានានៅទូទាំងប្រទេស ដើម្បីប្រមូលថវិកាយកទៅប្រគល់ជូនកងយោធពលខេមរភូមិន្ទនៅសមរភូមិមុខដែលកំពុងតែបំពេញបេសកកម្មការពារបូរណភាពដែនដីនៅតាមព្រំដែនខ្មែរ-សៀម។
ថ្លែងកាលពីថ្ងៃទី៦ ឧសភា ឆ្នាំ២០១១ ក្នុងឱកាសបិទវគ្គបណ្តុះបណ្តាលការបញ្ជ្រាបយេនឌ័រក្នុងវិស័យទេសចរណ៍រយៈពេល២ថ្ងៃនៅឯខេត្តសៀមរាប លោកស្រីសម មុន្នីកា អនុរដ្ឋលេខាធិការទទួលបន្ទុកការងារយេនឌ័រ និងក្រុមការងារលុបបំបាត់ការរើសអើងស្ត្រីបានមានប្រសាសន៍ថា ស្ត្រី និងបុរសមានភាពស្មើគ្នាចំពោះកិច្ចការបម្រើជាតិមាតុភូមិ ដូច្នេះតាមរយៈការផ្តួចផ្តើមរបស់លោកថោង ខុន រដ្ឋមន្ត្រីក្រសួងទេសចរណ៍ ក្នុងការបើកវគ្គបណ្តុះ បណ្តាលស្តីពីការបញ្ជ្រាបយេនឌ័រក្នុងវិស័យទេសចរណ៍ដែលនឹងត្រូវរៀបចំឡើងទូទាំងរាជធានីខេត្ត-ក្រុង យើងបានឃោសនាដល់តំណាងស្ត្រីនៅក្នុងសវនកម្មទេសចរណ៍ដែលមកចូលរួមក្នុងវគ្គដ៏មានសារប្រយោជន៍នេះឱ្យបង្កើតហិបបរិច្ចាគប្រាក់មួយដោយដាក់ឈ្មោះថា «កម្មវិធីស្ត្រីផ្សារភ្ជាប់ជាមួយសមរភូមិមុខ» ដើម្បីប្រមូលប្រាក់យកទៅឧបត្ថម្ភដល់វីរកងយោធពលខេមរភូមិន្ទ កំពុងការពារព្រំដែននៅសមរភូមិមុខ។
លោកស្រីបញ្ជាក់ថា ការបង្កើតឱ្យមានហិបឧបត្ថម្ភប្រាក់នៅតាមសវនកម្មឧស្សាហកម្មទេសចរណ៍នៅទូទាំងប្រទេសនេះ គឺវាបានបញ្ជាក់យ៉ាងច្បាស់ពីតួនាទីរបស់ស្ត្រីក្នុងកិច្ចការការពារជាតិ ទោះបីជាមិនបានប្រយុទ្ធតតាំងជាមួយសត្រូវឈ្លានពានដោយផ្ទាល់ក្តី ក៏បានដោយប្រយោលដែរ តាមរយៈលើកទឹកចិត្តពីសមរភូមិក្រោយដល់កងយោធពលខេមរភូមិន្ទដ៏អង់អាចប្រយុទ្ធតតាំងជាមួយសត្រូវសៀមឈ្លានពានទឹកដីនៅតាមតំបន់ព្រំដែនកម្ពុជា-សៀម។
យោងតាមរបាយការណ៍បិទវគ្គបណ្ដុះបណ្ដាលស្ដីពីការបញ្ជ្រាបយេនឌ័រក្នុងវិស័យទេសចរណ៍របស់លោកង៉ូវ សេងកាក់ ប្រធានមន្ទីរទេសចរណ៍ខេត្ដសៀមរាប បានឱ្យដឹងថា វគ្គបណ្ដុះបណ្ដាលនោះមានរយៈពេល២ថ្ងៃគឺចាប់ថ្ងៃទី៥ ដល់ទី៦ ឧសភា ឆ្នាំ២០១១ ដោយមានអ្នកចូលរួមភាគច្រើនជាស្ដ្រីចំនួន១៣៦នាក់ ដែលសុទ្ធសឹងជាជនបង្គោលនៅតាមមន្ទីរទេសចរណ៍ខេត្ដ អង្គភាពពាក់ព័ន្ធប្រតិបត្ដិការ ទេសចរណ៍ រួមមានសណ្ឋាគារ ផ្ទះសំណាក់ ភោជនីយដ្ឋាន ហាងម៉ាស្សា ខារ៉ាអូខេ និងសាលាបណ្ដុះបណ្ដាលនានានៅក្នុងខេត្ដសៀមរាប។
លោកប្រធានមន្ទីររូបនោះបានបន្ថែមទៀតថា ក្នុងគោលបំណងផ្សព្វផ្សាយបញ្ជ្រាបយេនឌ័រ អនុសញ្ញាស្ដីពីការលុបបំបាត់រាល់ទម្រង់នៃការរើសអើងប្រឆាំងនារីភេទ និងលើកកម្ពស់សីលធម៌សង្គម តម្លៃស្ដ្រី និងគ្រួសារខ្មែរ សុជីវធម៌។ ទន្ទឹមនោះយើងក៏បានធ្វើការឃោសនាឱ្យជនបង្គោលស្ដ្រីទាំងអស់នោះបង្កើតនូវហិបកម្មវិធីស្ដ្រីផ្សារភ្ជាប់ជាមួយសមរភូមិមុខ ដែលរំពឹងថា កម្មវិធីដ៏ មានប្រយោជន៍នេះនឹងជោគជ័យនាពេលឆាប់ៗខាងមុខ ដើម្បីបង្ហាញថា ស្ដ្រីក៏មានភារកិច្ចរួមចំណែកក្នុងការចូលរួមការពារជាតិស្មើបុរសដែរ ហើយហិបបរិច្ចាគប្រាក់នោះនឹងត្រូវប្រមូលជារៀងរាល់ខែយកមកឱ្យមន្ទីទេសចរណ៍ខេត្ដតាមរយៈតំណាងស្ដ្រីនៅក្នុងសេវាកម្មទេសចរណ៍ដើម្បីប្រគល់ទៅឱ្យក្រសួងនាំទៅចាត់ចែងជូនដល់វីរយុទ្ធវជននៅសមរភូមិមុខ។
សូមរំឭកផងដែរ ក្រោយពីមានការរំលោភឈ្លានពានពីសំណាក់ប្រទេសសៀមមកលើប្រទេសកម្ពុជាតាំងពីខែកក្កដា ឆ្នាំ២០០៨ រហូតមកប្រតិភូក្រសួងទេសចរណ៍នៃប្រទេសកម្ពុជា ដឹកនាំដោយលោករដ្ឋមន្ដ្រីថោង ខុន បានចុះទៅសួរសុខទុក្ខ និងនាំយកអំណោយជាគ្រឿងបរិភោគឧបភោគ រួមទាំងថវិកាជាច្រើនដងរួចមកហើយជូនដល់វីរយុវជននៅសមរភូមិមុខ ជាពិសេសសមភូមិទិសប្រាសាទព្រះវិហារ ប្រាសាទតាមាន់ធំ និងប្រាសាទតាក្របី ហើយការជួយឧបត្ថម្ភមិនត្រូវបានរាថយទេ។ ផ្ទុយទៅវិញ ថែមទាំងបានផ្ដួចផ្ដើមបង្កើតជាហិបបរិច្ចាគប្រាក់ក្នុងនាមស្ដ្រីសម្រាប់ជួយលើកទឹកចិត្ដយោធាថែមទៀត ដើម្បីផ្ដល់ឱកាសដល់ខេមរបុត្រប្រុស-ស្រី បានចូលរួមចំណែកក្នុងការការពារជាតិមាតុភូមិនៅគ្រាមានការរំលោភឈ្លានពានពីសត្រូវសៀម៕
ចែករំលែកព័តមាននេះ