ខេត្តស្វាយរៀង ៖ កាលពីរសៀលថ្ងៃទី៧ ឧសភា នៅទីស្នាក់ការកាកបាទក្រហមកម្ពុជាសាខាខេត្តស្វាយរៀងបានរៀបចំពិធីអបអរខួបទី១៤៨ទិវាពិភពលោកកាកបាទក្រហម អឌ្ឍចន្ទក្រហម៨ ឧសភា ក្រោមប្រធានបទកម្លាំងអ្នកស្ម័គ្រចិត្តប្រសិទ្ធភាពមនុស្សធម៌។ ពិធីនេះប្រព្រឹត្តទៅក្រោមអធិបតីភាពលោកជំទាវបណ្ឌិត ម៉ែន សំអន ឧបនាយករដ្ឋមន្ត្រីប្រចាំការ ព្រមទាំងមានការចូលរួមពីលោកជៀង អំ អភិបាលខេត្ត អស់លោកអភិបាលរងខេត្ត ក្រុមប្រឹក្សាខេត្ត អភិបាល អភិបាលរងក្រុង ស្រុក មន្ទីរជុំវិញខេត្ត ក្រុមប្រឹក្សាឃុំ សមាគម យុវជនកម្ពុជាខេត្ត អ្នកស្ម័គ្រចិត្តកាកបាទក្រហមស្រុក ខេត្ត ឃុំ យុវជនកាកបាទក្រហមខេត្ត លោកឧកញ៉ា អាជីវករ សប្បុរសជនជាច្រើនកុះករ។
លោកស្រី នាង សេដ្ឋា ជៀង អំ ប្រធានគណៈកម្មាធិការសាខាកាកបាទក្រហមកម្ពុជាខេត្តស្វាយរៀងថ្លែងថា សាខាកាកបាទក្រហមកម្ពុជាខេត្តស្វាយរៀងប្រារព្ធធ្វើនៅថ្ងៃនេះស្របតាមពេលវេលាជាប្រវត្តិសាស្ត្រនៃបណ្តាសមាគមជាតិកាកបាទក្រហមអឌ្ឍចន្ទក្រហម១៨៩ប្រទេសនៅលើសាកល។ ដោយឡែកកាកបាទក្រហមកម្ពុជាប្រារព្ធធ្វើនៅថ្ងៃទី៣ ឧសភា ២០១១ ក្រោមអធិបតីភាពរបស់សម្តេចអគ្គមហាសេនាបតីតេជោហ៊ុន សែន និងលោកជំទាវកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា។ ការប្រារព្ធពិធីឆ្នាំនេះសំដៅលើការទទួលស្គាល់ចំពោះសកម្មភាព និងលើកទឹកចិត្តដល់អ្នកស្ម័គ្រចិត្តដែលបានបូជាកម្លាំងចិត្តកាយប្រាជ្ញាស្មារតី ឆន្ទៈមោះមុតក្នុងក្របខណ្ឌបម្រើឱ្យបុព្វហេតុមនុស្សធម៌ក្នុងសហគមន៍ដែលងាយរងគ្រោះ មហន្តរាយ មិនថានៅទីណាឡើយ។ អ្នកស្ម័គ្រចិត្តទូទាំងពិភពលោកជាង១០០លាននាក់ កាកបាទក្រហមកម្ពុជា១១.០៧៧នាក់ និងយុវជនកាកបាទក្រហម១៤.៦៧៦នាក់ ដោយឡែកស្វាយរៀងមានអ្នកស្ម័គ្រចិត្តតាមសហគមន៍២១៤នាក់ យុវជនកាកបាទក្រហម២០០នាក់។
លោកស្រីនាង សេដ្ឋា ជៀង អំ បន្តទៀតថា លទ្ធផលការងារនៅក្នុងឆ្នាំ២០១០ដល់ខែមេសា ២០១១ សាខាកាកបាទក្រហមស្វាយរៀងដោះស្រាយដល់ជនរងគ្រោះមហន្តរាយផ្សេងៗរួមមានអគ្គីភ័យ៦២ខ្នងផ្ទះ ខ្យល់ព្យុះមាន១៨២ខ្នង រន្ទះបាញ់ស្លាប់១៧នាក់ លង់ទឹក៧នាក់ និងអ្នកកំពុងរស់នៅជាមួយមេរោគអេដស៍១៦៩នាក់ រងគ្រោះឧបទ្ទវហេតុ និងទីទ័លក្រ៦៨នាក់ សរុប៤៩២គ្រួសារ។ យើងបានឧបត្ថម្ភអង្ករ កៅស៊ូតង់ កន្ទេលជ័រ ភួយ មុង សារុង ក្រមា ធុងទឹក ឆ្នាំងបាយ សម្ល មី ត្រីខ ទឹកដោះគោ ទឹកបរិសុទ្ធ កន្សែងពោះគោ ច្រាសដុសធ្មេញ និងថ្នាំដុសធ្មេញ សាប៊ូលុច្ស សាប៊ូម្សៅ ។ ឆ្នាំ២០១១នេះបានផ្តល់ដល់ជនរងគ្រោះ១គ្រួសារ ថវិកា៤០.០០០រៀល។ គិតជាថវិកាចំណាយសរុបអស់ចំនួន២៤.១៣០ដុល្លារ។
លោកជៀង អំ បានអានសេចក្តីថ្លែងការណ៍ របស់លោកជំទាវកិត្តិព្រឹទ្ធបណ្ឌិតប៊ុន រ៉ានី ហ៊ុន សែន ប្រធានកាកបាទក្រហមកម្ពុជាក្នុងឱកាសអបអរខួបលើកទី១៤៨ ទិវាពិភពលោកកាកបាទក្រហមអឌ្ឍចន្ទក្រហម៨ ឧសភាទាំងស្រុង។
លោកជំទាវបណ្ឌិត ម៉ែន សំអន ឧបនាយករដ្ឋមន្ត្រីប្រចាំការថ្លែងថា ក្នុងនាមរាជរដ្ឋាភិបាល និងក្នុងលោកជំទាវសូមកោតសរសើរ និងវាយតម្លៃខ្ពស់ជាពិសេសជូនចំពោះលោកជំទាវកិត្តិព្រឹទ្ធបណ្ឌិតប៊ុន រ៉ានី ហ៊ុន សែន ប្រធានកាកបាទក្រហមកម្ពុជា ថ្នាក់ដឹកនាំគ្រប់លំដាប់ថ្នាក់ បុគ្គលិកបណ្តាញអ្នកស្ម័គ្រចិត្ត និងក្រុមយុវជនស្ម័គ្រចិត្តទាំងអស់ ព្រមទាំងសប្បុរសជនអង្គការជាតិ អន្តរជាតិទាំងអស់ដែលបានគាំទ្រដ៏មុតមាំ និងសហការគ្នាយ៉ាងជិតស្និទ្ធដើម្បីចូលរួមចំណែកអនុវត្តសកម្មភាពមនុស្សធម៌ក្នុងក្របខណ្ឌនៃផែនការយុទ្ធសាស្ត្ររយៈពេលវែង២០១១-២០២០ របស់កាកបាទក្រហមកម្ពុជារហូតសម្រេចបាននូវសមិទ្ធផលជាច្រើនក្នុងការបំពេញបេសកកម្មជាប្រវត្តិសាស្ត្ររបស់ខ្លួនជូនជាតិ និងប្រជាជនយើង និងបានចូលរួមចំណែកដ៏ប្រសើរដល់ការអភិវឌ្ឍសង្គមជាតិ ការកាត់បន្ថយភាពក្រីក្ររបស់ប្រជាជន និងការការពារគុណតម្លៃមនុស្សធម៌ចំពោះមនុស្សជាតិទាំងមូល។
សប្បុរសជនដែលបានចូលរួមឧបត្ថម្ភថវិកាជូនកាកបាទក្រហមកម្ពុជាសាខាខេត្តស្វាយរៀងនាឱកាសនោះបានសរុបជាទឹកប្រាក់ចំនួន៦២.៦២៩ដុល្លារ ហើយនៅមានសប្បុរសជនចូលឧបត្ថម្ភជាបន្តទៀត ៕
ចែករំលែកព័តមាននេះ