ខេត្តព្រៃវែង ៖ បុរសជាជនជាតិវៀតណាមម្នាក់ ត្រូវគេប្រទះឃើញដេកស្លា.ប់តែម្នាក់ឯងនៅកណ្តាលថ្នល់ បង្កអោយមានការភ្ញាក់ផ្អើលដល់ប្រជាពលរដ្ឋ និងសមត្ថកិច្ច ចុះទៅពិនិត្យមើលយ៉ាងកកកុញ។ ហេតុការណ៍នេះ បានកើតឡើងកាលពីវេលាម៉ោង៨និង៤៥នាទីយប់ ថ្ងៃទី១៧ ខែកក្កដា ឆ្នាំ២០២៣ នៅលើកំណាត់ផ្លូវជាតិលេខ១ ត្រង់ចំណុចមុខផ្ទះលក់គ្រឿងទេសរបស់ឈ្មោះ រដ្ឋ លុចសារី ស្ថិតក្នុងភូមិ១ ឃុំព្រែកខ្សាយ( ខ ) ស្រុកពាមរក៍ ខេត្តព្រៃវែង។
ជនរងគ្រោះដែលបានស្លា.ប់បាត់បង់ជីវិតខាងលើនេះមានឈ្មោះ វ៉ូ ង្វៀងហ៊នមិន ភេទប្រុស អាយុ២៩ឆ្នាំ ជាជនជាតិវៀតណាម មានទីលំនៅក្នុងភូមិ១០ ឃុំ៩ ស្រុកតាំងភូ ខេត្តដុងណាយ ប្រទេសវៀតណាម។
តាមការរៀបរាប់ពីអ្នកស្រុកនៅជិតកន្លែងកើតហេតុ បានអោយដឹងថា សាកស.ពជនរងគ្រោះត្រូវបានគេប្រទះឃើញដេកស្លា.ប់នៅកណ្តាលថ្នល់ត្រង់ចំណុចកើតហេតុខាងលើ ដោយមិនដឹងថា តើមូលហេតុអ្វីនោះទេ?។ ប៉ុន្តែភ្លាមៗនោះ សមត្ថកិច្ចបានមកដល់ ហើយក៏នាំយកស.ពជនរងគ្រោះទៅរក្សាទុកនៅមន្ទីរពេទ្យបង្អែកអ្នកលឿង និងស្រាវជ្រាវជុំវិញកន្លែងកើតហេតុផងដែរ។
ប្រភពដដែលបន្តថា លុះរហូតដល់ព្រឹកស្អែកឡើង ថ្ងៃទី១៨ ខែកក្កដា ឆ្នាំ២០២៣ ទើបកម្លាំងជំនាញខេត្ត និងព្រះរាជអាជ្ញា ចុះមកពិនិត្យ និងធ្វើកោសល្យវិច័យសាកស.ពជនរងគ្រោះ ហើយបានឆែកឆេរមើលកាមេរ៉ាសុវត្ថិភាពនៅតាមផ្ទះទល់មុខនឹងកន្លែងកើតហេតុ ដើម្បីរកពន្លឺបន្ថែមទៀត។
ដោយឡែកតាមប្រភពព័ត៌មានពីខាងសមត្ថកិច្ច បានអោយដឹងថា ក្រោយពីពិនិត្យទៅលើសាកស.ពរបស់ជនរងគ្រោះ និងឆែកមើលតាមកាមេរ៉ាសុវត្ថិភាពរួចហើយ បានរកឃើញថា ជនរងគ្រោះរស់នៅប្រទេសវៀតណាម តែបានចូលមកប្រទេសកម្ពុជា តាមច្រកព្រំដែនត្រពាំងផ្លុង ខេត្តត្បូងឃ្មុំ កាលពីចុងខែមិថុនា ហើយក៏មិនដឹងថា តើជនរងគ្រោះបានទៅធ្វើអ្វីនៅកន្លែងណា ជាមួយអ្នកណាដែរ?។
ប្រភពពីសមត្ថកិច្ចបន្តថា ស្រាប់តែនៅយប់កើតហេតុ តាមរយៈកាមេរ៉ាសុវត្ថិភាពបានឃើញជនរងគ្រោះធ្លាក់ពីលើរថយន្តមួយគ្រឿង ម៉ាកឡិចស៊ីស RX300 នៅចំណុចកន្លែងកើតហេតុ ដោយមិនដឹងថា តើជនរងគ្រោះលោ.តចេញពីរថយន្ត ឬត្រូវគេបោះទម្លាក់នោះទេ? ហើយរថយន្តនោះក៏បើកទៅទិសខាងលិចបាត់ទៅ។
ទោះជាយ៉ាងណា មកដល់ពេលនេះ សមត្ថកិច្ចបានទាក់ទងរកឃើញក្រុមគ្រួសាររបស់ជនរងគ្រោះនៅប្រទេសវៀតណាមហើយ និងកំពុងស្រាវជ្រាវបន្ត ដោយសន្និដ្ឋានជំហានដំបូងថា ករណីខាងលើនេះ អាចជាអំពើឃា.តក.ម្ម។
ចែករំលែកព័តមាននេះ