Ronaldo ថាលីគអារ៉ាប៊ីសាអូឌីតល្អជាងលីគអាមេរិក ១ថ្ងៃក្រោយ Messi បង្ហាញខ្លួនជាមួយ Inter Miami
បរទេស ៖ កំពូលខ្សែប្រយុទ្ធព័រទុយហ្គាល់ Cristiano Ronaldo បានអះអាងថា លីគអារ៉ាប៊ីសាអូឌីត
បរទេស ៖ កំពូលខ្សែប្រយុទ្ធព័រទុយហ្គាល់ Cristiano Ronaldo បានអះអាងថា លីគអារ៉ាប៊ីសាអូឌីត (Saudi Pro League) គឺល្អជាងលីគសហរដ្ឋអាមេរិក (MLS) ដែលការលើកឡើងនេះ កើតឡើង១ថ្ងៃបន្ទាប់ពីកំពូលខ្សែប្រយុទ្ធអាហ្សង់ទីន Lionel Messi បង្ហាញខ្លួនជាផ្លូវការក្នុងនាមជាសមាជិកថ្មីរបស់ក្លិបអាមេរិក Inter Miami របស់លោក David Beckham កាលពីថ្ងៃទី១៦ ខែកក្កដា ឆ្នាំ២០២៣ កន្លងទៅ។ នេះបើយោងតាមប្រភពពីសារព័ត៌មាន Daily Mail ចេញផ្សាយនៅថ្ងៃទី១៨ ខែកក្កដា ឆ្នាំ២០២៣។
កំពូលខ្សែប្រយុទ្ធ Lionel Messi បានបង្ហាញវត្តមាន នៅក្នុងពិធីបង្ហាញខ្លួនជាផ្លូវការជាមួយនឹងអាវលេខ ១០ ថ្មីរបស់ក្លិប Inter Miami កាលពីថ្ងៃទី១៦ ខែកក្កដា កន្លងទៅ បន្ទាប់ពីបានចុះកិច្ចសន្យាមានសុពលភាពដល់ឆ្នាំ ២០២៥ ដោយទទួលបានថ្លៃនឿយហត់ចន្លោះ ៥០-៦០ដុល្លារនៅក្នុងមួយឆ្នាំ។ នេះយោងតាមប្រព័ន្ធផ្សព្វផ្សាយនៅសហរដ្ឋអាមេរិកបានចេញផ្សាយ។
ដោយឡែក យោងតាមការបង្ហោះនៅថ្ងៃទី១៨ ខែកក្កដា ឆ្នាំ២០២៣ ដោយលោក Fabrizio Romano អ្នកកាសែតកីឡាបាល់ទាត់ជនជាតិអ៊ីតាលីដ៏ល្បីល្បាញ កំពូលខ្សែប្រយុទ្ធព័រទុយហ្គាល់ Cristiano Ronaldo ដែលកំពុងប្រកបអាជីពជាមួយនឹងក្លិប Al Nassr នៃលីគកំពូលអារ៉ាប៊ីសាអូឌីត បាននិយាយថា «លីគអារ៉ាប៊ីសាអូឌីតល្អជាងលីគសហរដ្ឋអាមេរិក។ ខ្ញុំប្រាកដ ១០០% ថា ខ្ញុំនឹងមិនត្រឡប់ទៅលេងក្លិបនៅអឺរ៉ុបណាមួយទេ។ ខ្ញុំបានបើកផ្លូវនៅលីគអារ៉ាប៊ីសាអូឌីត ហើយឥឡូវនេះ កីឡាករជាច្រើនកំពុងមកទីនេះ»។
អតីតខ្សែប្រយុទ្ធឆ្នើមក្រុម Manchester United Real Madrid និង Juventus រូបនេះ បានបន្ថែមទៀតថា «ខ្ញុំមានអាយុ៣៨ឆ្នាំ ហើយបាល់ទាត់នៅអឺរ៉ុបក៏បាត់បង់គុណភាពច្រើនដែរ។ លីគតែមួយគត់ដែលគិតខ្ញុំថាមានគុណភាពល្អ គឺស្ថិតក្នុងកម្រិតខ្ពស់ជាងក្រុមទាំងអស់នៅ English Premier League ។ ជាក់ស្តែង លីគអេស្ប៉ាញគ្មានគុណភាពអស្ចារ្យនោះទេ លីគព័រទុយហ្គាល់ជាលីគល្អ ប៉ុន្តែមិនមែនជាលីគកំពូលទេ។ លីគអាល្លឺម៉ង់ ខ្ញុំគិតថាក៏បាត់បង់គុណភាពច្រើនផងដែរ។ ខ្ញុំប្រាកដថា ខ្ញុំនឹងមិនលេងនៅអឺរ៉ុបទៀតទេ ខ្ញុំចង់លេងនៅអារ៉ាប៊ីសាអូឌីត»។
គួររំលឹកថា Cristiano Ronaldo បានផ្លាស់ចេញពីក្លិប Man United ទៅចូលរួមជាមួយក្លិប Al Nassr ដោយបានចុះកិច្ចសន្យាដល់ឆ្នាំ ២០២៥ ដោយទទួលបានថ្លៃនឿយហត់រហូតដល់ ២០០លានអឺរ៉ូក្នុងមួយឆ្នាំ ដែលធ្វើឱ្យរូបគេក្លាយជាកីឡាករមានថ្លៃពលកម្មខ្ពស់បំផុតក្នុងប្រវត្តិសាស្ត្របាល់ទាត់៕
ចែករំលែកព័តមាននេះ