ខេត្តពោធិ៍សាត់ ៖ ព្រឹកថ្ងៃទី៨ ឧសភា ២០១១ លោកស៊ុយ សែម រដ្ឋមន្ត្រីក្រសួងឧស្សាហកម្ម រ៉ែ និងថាមពល និងលោកជំទាវជា ខេង លោកឧកញ៉ាឡាវ ម៉េងឃីន សមាជិកព្រឹទ្ធសភា និងលោកជំទាវជឹង សុភាព ជាភរិយា និងជានាយិកាក្រុមហ៊ុនភាពីម៉ិចបានសំណេះសំណាលចែកអំណោយដល់កម្មករ កម្មការិនី និងប្រជាជនចំនួន១.៥០០នាក់នៅស្រុកក្រគរ ខេត្តពោធិ៍សាត់។ ពិធីនេះបានប្រារព្ធធ្វើនៅការដ្ឋានក្រុមហ៊ុនភាពីម៉ិច ឃុំអន្សារចំបក់ ដោយមានការចូលរួមពីលោកពេជ សោភ័ន រដ្ឋលេខាធិការ និងជាទីប្រឹក្សាសម្តេចតេជោ លោកខូយ សុខា អភិបាលខេត្ត លោកឡាវ អ៊ុយ និងលោកជំទាវនាយកក្រុមហ៊ុនអ៊ូជីសាន ព្រមទាំងថ្នាក់ដឹកនាំមន្ទីរនានាក្នុងខេត្តមួយចំនួនទៀត។
លោកទី គឹមតុក តំណាងក្រុមហ៊ុនភាពីម៉ិចបានរាយការណ៍ថា ក្រុមហ៊ុនភាពីម៉ិចគ្រូបសហការជាមួយក្រុមហ៊ុនអ៊ូ ជីសានគ្រូប បានអនុវត្តផែនការដាំដុះដើមឈើបង្កើតជាព្រៃឈើឡើងវិញលើដីសម្បទានចំនួន៣១៥.០២៨ហិកតា ដែលស្ថិតនៅក្នុងខេត្តកំពង់ឆ្នាំង និងខេត្តពោធិ៍សាត់ ដោយចាប់អនុវត្តពីថ្ងៃទី២០ កុម្ភៈ ២០១០ ត្រង់ចំណុចការដ្ឋានទី១ ព្រែកជីក។ ពេលនេះក្រុមហ៊ុនកំពុងអនុវត្តផែនការឆ្នាំ២០១០-២០១១ ចំនួន៤០.០០០ហិកតាក្នុងអនុតំបន់១ ដោយឈូសឆាយសំអាតព្រៃបាន២១.០៥៧ហិកតា ដាំដំឡូងមីបាន១០.៨៦៣ហិកតា ដាំកូនអាកាស្យាបាន៤.០០០ហិកតា ដាំដើមខ្លុងត្បែងបាន៤.៨៦០ហិកតា ដីមិនទាន់បានដាំ១០.១៩៤ហិកតា សរុប១៩.៧២៣ហិកតា។
លោកបន្តថា ទន្ទឹមនឹងនេះយើងបានកសាងផ្លូវប្រវែង៧២៦គីឡូម៉ែត្រ កសាងស្ពានតូច ធំសរុប៧៧៩ ប្រើប្រាស់កម្មករ៧.៤៩០នាក់ ក្នុងនោះកម្មករបច្ចេកទេសចិន២១៦នាក់ និងអ្នកបកប្រែ៧៨៧នាក់។ កម្មករ កម្មការិនីម្នាក់ៗទទួលបានថវិកា៣៦០.០០០រៀល និងអង្ករ៣០គីឡូក្រាមក្នុងមួយខែ។ ចំពោះប្រជាពលរដ្ឋដែលមានដីពាក់ព័ន្ធក្នុងដីសម្បទានសេដ្ឋកិច្ចក្រុមហ៊ុនបានដោះស្រាយជូន២៣០គ្រួសារ ដោយក្នុងមួយគ្រួសារទទួលបានទទឹង៣០ម៉ែត្រ បណ្តោយ៦០ម៉ែត្រ។
ជាមួយគ្នានេះក្រុមហ៊ុនបានកំណត់ដីសហគមន៍ព្រៃឈើចំនួន៦.៧០០ហិកតាដល់ឃុំចំនួន១១សង្កាត់២ ក្នុងស្រុកទាំង៣ គឺស្រុកក្រគរ ស្រុកភ្នំក្រវាញ និងក្រុងពោធិ៍សាត់។ មិនតែប៉ុណ្ណោះបានជួយឧបត្ថម្ភស្បៀងអាហារដល់កងទ័ពសមរភូមិផងដែរ។
លោករដ្ឋមន្ត្រីស៊ុយ សែម មានប្រសាសន៍ថា ក្រុមហ៊ុនភាពីម៉ិច និងក្រុមហ៊ុនអ៊ូជីសាន សហការគ្នាវិនិយោគលើទឹកដីនេះ គឺជាការអនុវត្តទៅតាមគោលនយោបាយរបស់រាជរដ្ឋាភិបាលក្នុងការបើកចំហជើងមេឃលើវិស័យកសិឧស្សាហកម្មដែលបានឆ្លងកាត់ក្រុមប្រឹក្សាអភិវឌ្ឍន៍ និងក្រសួងជំនាញតាមច្បាប់ត្រឹមត្រូវ។ រាជរដ្ឋាភិបាលបានគិតច្បាស់លាស់ណាស់អំពីដីព្រៃដែលត្រូវរក្សាទុក ដីសម្បទានសេដ្ឋកិច្ច និងដីសម្បទានសង្គមកិច្ច។ ប៉ុន្តែដីទីនេះជាដីព្រៃរេចរឹលប៉ុន្មានរយឆ្នាំមកហើយនៅតែប៉ុណ្ណឹង គ្មានការលូតលាស់ទេ ទើបពេលនេះប្រគល់ឱ្យក្រុមហ៊ុនធ្វើការវិនិយោគដើម្បីបង់ពន្ធជូនរដ្ឋបានថវិកាកសាងប្រទេស។
លោករដ្ឋមន្ត្រីបន្តទៀតថា កម្មករម្នាក់ទទួលបាន៣៦០.០០០រៀល អង្ករ៣០គីឡូក្រាមក្នុងមួយខែ ពិតជាជួយសំរួលជីវភាពគ្រួសារបានមួយកម្រិតធំ ព្រោះយើងមិនចំណាយលើថ្លៃទឹក ថ្លៃភ្លើង ឬជួលផ្ទះដូចកម្មករកម្មការិនីនៅភ្នំពេញទេ ពិសេសកាត់បន្ថយការធ្វើចំណាកស្រុកទៀតផង។ លោកណែនាំឱ្យប្រជាពលរដ្ឋជំរុញកូនចៅចូលរៀនឱ្យបានគ្រប់ៗគ្នាដើម្បីឆ្លងផុតពីគ្រោះអវិជ្ជា។ ចំណែកកូនចៅដែលគ្មានការងារធ្វើត្រូវនាំគ្នាចូលបំរើការនៅក្រុមហ៊ុនភាពីម៉ិចដើម្បីទទួលបានប្រាក់កំរៃដ៏សមរម្យមកផ្គត់ផ្គង់ជីវភាពគ្រួសារចៀសវាងចលាចលតាមការញុះញង់របស់ក្រុមមួយក្តាប់តូចដែលតែងបង្កការរាំងស្ទះដល់ដំណើរការអភិវឌ្ឍរបស់រាជរដ្ឋាភិបាលក្រោមការដឹកនាំរបស់សម្តេចតេជោហ៊ុន សែន ។
ក្នុងឱកាសនោះក្រុមហ៊ុនភាពីម៉ិចបានចែកឃីតមួយកញ្ចប់ម្នាក់ដល់កម្មករ កម្មការិនី និងប្រជាពលរដ្ឋឃុំអន្សារចំបក់ និងឃុំក្បាលត្រាចចំនួន១.៥០០នាក់ ក្នុងនោះមានភួយ ក្រមា កន្ទេល អង្រឹង អំបិល ប៊ីចេង ឆៃប៉ូវ ថ្នាំពេទ្យ និងថវិកា៣០.០០០រៀល។ ឧបត្ថម្ភអភិបាលស្រុកក្រគរ មេឃុំក្បាលត្រាច និងមេឃុំអន្សារចំបក់ម្នាក់១.០០០.០០០រៀល។ ចំណែកកំលាំងការពារប៉ូលិស ប៉េអឹម និងយោធាសរុប៦២នាក់ ក្នុងម្នាក់១០.០០០រៀល ៕
ចែករំលែកព័តមាននេះ